(ສພຊ) ໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງ (ສພຂ) ຫລວງນໍ້າທາ ຊຸດທີ II ໃນວັນທີ 29 ມັງກອນຜ່ານມາ, ທ່ານ ພົຕ. ວົງສັກ ພັນທະວົງ ປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ (ກປຊສ) ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຊູກຍູ້, ຕິດຕາມກວດກາ ແລະ ເປີດກອງປະຊຸມຮ່ວມກັບໂຄງການຊ່ວຍເຫລືອລ້າ ການກໍ່ສ້າງບ້ານຈັດສັນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ແລະ ດ່ານບໍ່ເຕ່ນແດນງາມ.

ກອງປະຊຸມ ໄດ້ຮັບຟັງການລາຍງານຫຍໍ້ຂອງໂຄງການຊ່ວຍເຫລືອລ້າການກໍ່ສ້າງບ້ານຈັດສັນທີ່ຖືກຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ວ່າ: ມາເຖິງທ້າຍເດືອນມັງກອນ 2022 ໂຄງການໄດ້ສຳເລັດການກໍ່ສ້າງອາຄານເຮືອນທັງໝົດ 159 ຫລັງ ສຳເລັດ 100%, ເສັ້ນທາງພາຍນອກ 90%, ເສັ້ນທາງພາຍໃນ 100%, ຫ້ອງການບ້ານ, ສຸກສາລາ, ໂຮງຮຽນອານຸບານ, ໂຮງຮຽນປະຖົມ, ໄຟຟ້າ, ນ້ຳປະປາແມ່ນ 100% ລວມສະພາບຄວາມຄືບໜ້າທີ່ສຳເລັດແມ່ນ 96%; ນອກນັ້ນ, ຍັງໄດ້ຮັບຟັງການລາຍງານຫຍໍ້ສະພາບຂອງດ່ານສາກົນບໍ່ເຕ່ນ ເຊິ່ງເລີ່ມແຕ່ມີການລະບາດຂອງພະຍາດໂຄວິດ–19  ເປັນຕົ້ນມາ ແມ່ນມີຄວາມຫຍຸ້ງຍາກຫລາຍສົມຄວນ ເນື່ອງຈາກມີຫລາຍດ່ານຂອງ ສປປລາວ  ຕິດກັບ ສປຈີນ ຖຶກປິດ ຍັງແຕ່ດ່ານສາກົນບໍເຕ່ນ-ບໍ່ຫານທີ່ເປີດ (ສະເພາະສິນຄ້າ) ເຮັດໃຫ້ລົດສິນຄ້າຂອງລາວ ກໍຄືສິນຄ້າຂ້າມແດນເຂົ້າໃຊ້ບໍລິການຈຸດດຽວ ແລະ ລົດຂົນສົ່ງສິນຄ້າທຸກປະເພດທີ່ຈະເຂົ້າໄປດ່ານບໍ່ເຕ່ນສະເລ່ຍວັນລະ 400-450 ກວ່າຄັນ ແຕ່ຄວາມສາມາດທີ່ຈະນໍາເຂົ້າ ພຽງແຕ່ວັນລະ 200 ຄັນຕໍ່ມື້ ຈຶ່ງເຮັດໃຫ້ລົດຕົກຄ້າງເປັນຈຳນວນຫລາຍ, ການສັນຈອນແອອັດ; ຈາກນັ້ນ, ຜູ້ເຂົ້າຮ່ວມໄດ້ສະເໜີບັນຫາຕ່າງໆທີ່ພົບຄວາມຫຍຸ້ງຍາກ, ແລກປ່ຽນປະກອບຄຳຄິດເຫັນຕໍ່ກັບສະພາບດັ່ງກ່າວ ເພື່ອເຮັດໃຫ້ການຈັດຕັ້ງປະຕິບັດວຽກງານໃຫ້ມີຄວາມສະດວກ ແລະ ເປັນປົກກະຕິ.

ທ່ານ ພົຕ. ວົງສັກ ພັນທະວົງ ໄດ້ມີຄຳເຫັນໂອ້ລົມ ພ້ອມທັງສະແດງຄວາມຍ້ອງຍໍຊົມເຊີຍຕໍ່ກັບການຈັດຕັ້ງປະຕິບັດວຽກງານ ເຊິ່ງເຫັນວ່າໄດ້ຮັບຜົນສຳເລັດຫລາຍດ້ານ, ກ່ຽວກັບບັນຫາທີ່ພົບຄວາມຫຍຸ້ງຍາກ ຂໍຮຽກຮ້ອງໃຫ້ທຸກພາກສ່ວນພ້ອມກັນຈັດຕັ້ງປະຕິບັດໃຫ້ລຸລ່ວງຕາມເປົ້າໝາຍທີ່ວາງໄວ້ ແລະ ຄຳສະເໜີຕ່າງໆ ທາງແຂວງ ກໍຄືສູນກາງຈະນຳໄປສະເໜີ, ປຶກສາຫາລືຂັ້ນເທິງຊອກທິດແກ້ໄຂ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າມີຄວາມຖືກຕ້ອງສອດຄ່ອງກັບສະພາບວຽກງານຕົວຈິງ.

(ພາບ ແລະ ຂ່າວ: ວັນນີ ແຝງບົວວັນ)