ໃນຕອນເຊົ້າວັນທີ 09 ກຸມພາ 2022 ທ່ານ ສຸບັນ ສະວະບຸດ ຄະນະປະຈຳສະພາແຫ່ງຊາດ ປະທານກໍາມາທິການວຽກງານສະມາຊິກສະພາແຫ່ງຊາດ ພ້ອມຄະນະ ຮ່ວມກັບ ທ່ານ ພູທອນ ພຸດທະຂັນຕິ ຄະນະປະຈໍາສະພາປະຊາຊົນແຂວງ ເລຂາທິການສະພາປະຊາຊົນແຂວງ ໄດ້ເຄື່ອນໄຫວເຮັດວຽກທີ່ ເມືອງພີນ ແຂວງສະຫວັນນະເຂດ ໂດຍການຕ້ອບຮັບຂອງທ່ານ ສາລີ ວິນລາວັນ ກໍາມະການພັກແຂວງ ເລຂາພັກເມືອງ ເຈົ້າເມືອງໆພີນ ພ້ອມດ້ວຍ ບັນດາທ່ານ ສສຂ ປະຈຳເຂດເລືອກຕັ້ງເມືອງດັ່ງກ່າວເຂົ້າຮ່ວມ.

ຈຸດປະສົງຂອງການເຄື່ອນໄຫວໃນຄັ້ງນີ້ກໍ່ເພື່ອຕິດຕາມຊຸກຍູ້ ແລະ ເກັບກໍາຂໍ້ມູນການເຄື່ອນໄຫວວຽກງານຂອງຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງພີນ ໃນເບື້ອງ ທ່ານ ແກ້ວວິໃສ ອິນທິລາດ ຮອງເລຂາພັກເມືອງ ປະທານກວດກາພັກ-ລັດເມືອງ ທັງເປັນປະທານຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງພີນ ກໍໄດ້ລາຍງານສະພາບການເຄື່ອນໄຫວຂອງຄະນະສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງຂອງຕົນໃນໄລຍະ ພ້ອມທັງໄດ້ແລກປ່ຽນຄໍາຄິດຄໍາເຫັນກ່ຽວກັບບັນຫາຕ່າງໆເປັນຕົ້ນແມ່ນ: ຂໍ້ສະດວກ ແລະ ຂໍ້ຫຍຸ້ງຍາກ ຈາກການຈັດຕັ້ງປະຕິບັດວຽກງານ ການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍແຂວງ, ການຕິດຕາມກວດການ ການປະຕິບັດລັດຖະທຳມະນູນ, ກົດໝາຍ, ມະຕິກອງປະຊຸມຂອງສະພາແຫ່ງຊາດ ແລະ ສະພາປະຊາຊົນແຂວງ, ການລົງພົບປະຜູ້ມີສິດເລືອກຕັ້ງຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ, ການກະກຽມກອງປະຊຸມສະພາປະຊາຊົນແຂວງ, ໂຄງປະກອບການຈັດຕັ້ງຂອງຄະນະສະມາຊິກ ສພຂ ລວມທັງອຸປະກອນ ແລະ ອື່ນໆ ເພື່ອຮັບໃຊ້ເຂົ້າໃນການເຄື່ອນໄຫວວຽກງານດັ່ງກ່າວ. ບັນຫາສໍາຄັນແມ່ນການປະຕິບັດສິດ ແລະ ໜ້າທີ່ຂອງ ສສຊ ແລະ ສສຂ ໃນການເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ ພ້ອມນີ້ ຍັງໄດ້ສະເໜີແລກປ່ຽນບາງບັນຫາ ແນ່ໃສ່ເພື່ອເປັນຂໍ້ມູນວາງແຜນປັບປຸງ ແລະ ພັດທະນາວຽກງານ ສພຂ ກໍ່ຄືການຈັດຕັ້ງ ແລະ ການເຄື່ອນໄຫວວຽກງານ ສສຂ ໃຫ້ມີຄຸນນະພາບຕື່ມອີກ.