ໃນ         ວັນທີ 4 ກຸມພາ 2022 ທີ່ຜ່ານມານີ້ ກົມສື່ມວນຊົນ ສະພາແຫ່ງຊາດ (ສພຊ) ລົງເຄື່ອນໄຫວເຝີກອົບຮົມວຽກງານສື່ມວນຊົນໃນຫົວຂໍ້: ຍຸດທະສາດໃໝ່ແຫ່ງການກະຈາຍຂໍ້ມູນ-ຂ່າວສານຜ່ານລະບົບແອັບພິເຄຊັນຂອງມືຖື, ໃຫ້ແກ່ພະນັກງານ-ວີຊາການ ທີ່ຮັບຜິດຊອບວຽກງານຂໍ້ມູນ-ຂ່າວສານ ຂອງສະພາປະຊາຊົນແຂວງຈໍາປາສັກ ນຳໂດຍ ທ່ານ ຂັນທະວີ ວົງພະຈັນ ຮອງຫົວໜ້າກົມສື່ມວນຊົນ ສພຊ ພ້ອມຄະນະ, ຕ້ອນຮັບໂດຍ ທ່ານ ທີບພະສອນ ສາມາເລີກ ຄະນະເລຂາທິການ ສພຂ ມີບັນດາທ່ານໃນຄະນະເລຂາທິການ ແລະ ພະນັງານວິຊາການໃນຂະແໜງຄົ້ນຄວ້າ-ສັງລວມ ແລະ ຂໍ້ມູນຂ່າວສານ ແລະ ໄອທີ ເຂົ້າຮ່ວມເປັນນັກສໍາມະນາກອນ.

ທ່ານ ຂັນທະວີ ວົງພະຈັນ ຮອງຫົວໜ້າກົມສື່ມວນຊົນສະພາແຫ່ງຊາດ ໄດ້ກ່າວຈຸດປະສົງຂອງການຈັດຝຶກອົບຮົມວຽກງານສື່ມວນຊົນໃນຄັ້ງນີ້ວ່າ: ເພື່ອຍົກສູງຄຸນນະພາບຂອງວຽກງານຂໍ້ມູນຂ່າວສານ ໃຫ້ທັນກັບເຫດການ ໃນຍຸກແຫ່ງເຕັກໂນໂລຊີທີ່ທັນສະໄໝ, ໃນຖານະເປັນກະບອກສຽງອັນສຳຄັນ ເພື່ອໂຄສະນາເຜີຍແຜ່ພາລະບົດບາດ, ສິດ ແລະ ໜ້າທີ່ ຂອງ ສພຊ ແລະ ສພຂ, ສະໜອງຂໍ້ມູນ-ຂ່າວສານ ໃຫ້ແກ່ ສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນແຂວງ ໂດຍຜ່ານລະບົບການເຂົ້າເວັບໄຊ ແລະແອັບພິເຄຊັນ ຂອງສະພາແຫ່ງຊາດ ໃຫ້ເຂົ້າເຖິງສັງຄົມ, ກໍຄືປະຊາຊົນຢ່າງທົ່ວເຖິງ.

ພ້ອມດຽວກັນ, ທ່ານ ທີບພະສອນ ສາມາເລີກ ເລຂາທິການສະພາປະຊາຊົນແຂວງ ໄດ້ມີຄໍາເຫັນລາຍງານສະພາບການຈັດຕັ້ງປະຕິບັດວຽກງານໃນໄລຍະຜ່ານມາ ເຊິ່ງເຫັນໄດ້ຍົກໃຫ້ເຫັນຜົນງານດ້ານດີ, ຂໍ້ສະດວກ ແລະ ຂໍ້ຫຍຸ້ງຍາກບາງດ້ານ ທີ່ຈະໄດ້ສືບຕໍ່ປັບປຸງແກ້ໄຂ ເພື່ອເຮັດໃຫ້ວຽກງານສື່ມວນຊົນຂອງສະພາປະຊາຊົນແຂວງມີຄວາມເຂັ້ມແຂງໃນຕໍ່ໜ້າ. ຈາກນັ້ນ, ນັກສໍາມະນາກອນທີ່ເຂົ້າຮ່ວມໄດ້ມີການສົນທະນາຕັ້ງຄໍາຖາມແລກປ່ຽນບົດຮຽນ ບົນພື້ນຖານແນວຄິດສ້າງສັນໃນການຄົ້ນຄວ້າເຊື່ອມຊຶມເອົາຄວາມຮູ້ຄວາມເຂົ້າໃຈຕໍ່ບົດຮຽນທີ່ນັກວິທະຍາກອນຂອງກົມສື່ມວນຊົນສະພາແຫ່ງຊາດ ຝຶກແອບໃຫ້ຢ່າງຝົດຟື້ນ

(ພາບ-ຂ່າວ ສົມວິຈິດ ໄຊມົນຕີ)