(ສພຊ) ຕອນເຊົ້າວັນທີ 18 ກໍລະກົດ 2018, ທີ່ນະຄອນຫລວງຮ່າໂນ້ຍ ສສ.ຫວຽດນາມ, ສະຫາຍ ແສງນວນ ໄຊຍະລາດ  ເລຂາທິການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປລາວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ເຈີນ ດາຍ ກວາງ ກໍາມະການກົມການເມືອງສູນກາງພັກກອມມູນິດຫວຽດນາມ, ປະທານປະເທດ ແຫ່ງ ສສ.ຫວຽດນາມ, ໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສສ.ຫວຽດນາມ ລະຫວ່າງວັນທີ 16-20 ກໍລະກົດ 2018.

ສະຫາຍ ແສງນວນ ໄຊຍະລາດ ໄດ້ສະແດງຄວາມຂອບໃຈ ມາຍັງສະຫາຍປະທານປະເທດ ແລະ ສະ ຫາຍນາຍົກລັດຖະມົນຕີ ແຫ່ງ ສສ.ຫວຽດນາມ ທີ່ສະລະເວລາອັນມີຄຸນຄ່າ ໃນການຕ້ອນຮັບ ແລະ ໄດ້ລາຍງານ ກ່ຽວກັບການພົບປະຢ້ຽມຢາມ ແລະ ແລກປ່ຽນບົດຮຽນກັບສະພາແຫ່ງຊາດຫວຽດນາມ ໂດຍສະເພາະແມ່ນການ ພົບປະກັບສະຫາຍ ນາງ ຕ໋ອງ ທິ ຝ໋ອງ ຮອງປະທານ, ຜູ້ປະຈໍາການສະພາແຫ່ງຊາດຫວຽດນາມ ພ້ອມດ້ວຍຄະນະ ເຊິ່ງໄດ້ແລກປ່ຽນບົດຮຽນນໍາກັນ ກ່ຽວກັບການຮ່ວມມື ແລະ ເຄື່ອນໄຫວວຽກງານຕ່າງປະເທດ ຂອງສະພາແຫ່ງ ຊາດ ໃນເວທີພາກພື້ນ ແລະ ສາກົນ.  ສະຫາຍຮອງປະທານສະພາແຫ່ງຊາດ ຍັງໄດ້ສະແດງຄວາມຮູ້ບຸນຄຸນ ແລະ ຂອບໃຈອັນໝົດຈິດໝົດໃຈ ຕໍ່ການຊ່ວຍເຫລືອອັນລໍ້າຄ່າຂອງພັກ ແລະ ລັດຖະບານຫວຽດນາມ ໃຫ້ແກ່ພັກ, ລັດຖະບານ ແລະ ປະຊາຊົນລາວຕະຫລອດມາ, ໂດຍສະເພາະແມ່ນໂຄງການກໍ່ສ້າງ ຫໍສະພາແຫ່ງຊາດລາວຫລັງໃໝ່ ແລະ ການຊ່ວຍເຫລືອຂອງສະພາປະຊາຊົນນະຄອນໂຮ່ ຈີ ມິ່ງ ດ້ານທຶນຮອນ ແລະ ວິຊາການສໍາລັບຈັດສໍາມະນາ ເພື່ອສ້າງຄວາມເຂັ້ມແຂງໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ຂັ້ນແຂວງ ຂອງ ສປປລາວ ແລະ ອື່ນໆ ເຊິ່ງເປັນການປະກອບສ່ວນອັນໃຫຍ່ຫລວງໃຫ້ແກ່ການເສີມຂະຫຍາຍມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ແໜ້ນ ແຟ້ນຍິ່ງຂຶ້ນ.

ສະຫາຍ ເຈີນ ດາຍ ກວາງ ໄດ້ສະແດງຄວາມຍິນດີຕ້ອນຮັບຢ່າງຈິງໃຈ ແລະ ໃຫ້ຄໍາໝັ້ນສັນຍາວ່າ ຈະສືບ ຕໍ່ສະໜັບສະໜູນ ແລະ ຊີ້ນໍາເອົາໃຈໃສ່ຕໍ່ໂຄງການຊ່ວຍເຫລືອຕ່າງໆ ໃຫ້ໄດ້ຮັບໝາກຜົນສູງສຸດ; ພັກ, ລັດ ແລະ ປະ ຊາຊົນສອງຊາດ ຫວຽດນາມ-ລາວ ຍາມໃດກໍຢູ່ຄຽງບ່າຄຽງໄຫລ່ ເຊິ່ງກັນ ແລະ ກັນ ໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດລາວ ໃຫ້ຈະເລີນຮຸ່ງເຮືອງຢ່າງບໍ່ຢຸດຢັ້ງ.

ຕອນບ່າຍຂອງວັນດຽວກັນ ສະຫາຍ ແສງ ນວນ ໄຊຍະລາດ ຮອງປະທານສະພາແຫ່ງຊາດລາວ ພ້ອມ ດ້ວຍຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ຫງວຽນ ຊວານ ຟຸກ ກໍາມະການກົມການເມືອງສູນກາງພັກກອມມູນິດ ຫວຽດນາມ, ນາຍົກລັດຖະມົນຕີ ແຫ່ງ ສສ.ຫວຽດນາມ.