ເນື່ອງໃນໂອກາດວັນເກີດປະທານ ສຸພານຸວົງ ອະດີດປະທານປະເທດ ແລະຜູ້ນຳປະຕິວັດຮຸ່ນທຳອິດຂອງ ສປປລາວ ຄົບຮອບ 109 ປີ (13/7/1909-13/7/2018) ໃນວັນທີ 11 ກໍລະກົດ 2018, ທີ່ອະນຸສອນສະຖານປະທານ ສຸພານຸວົງ, ສະຫາຍ ວິໄລວົງ ບຸດດາຄໍາ ກຳມະການຄະນະພັກສະພາແຫ່ງຊາດ ປະທານກຳມາທິການແຜນການ, ການເງິນ ແລະ ການກວດສອບ ຜູ້ຊີ້ນຳວຽກງານອົງການຈັດຕັ້ງມະຫາຊົນສະພາແຫ່ງຊາດ ແລະ ສະຫາຍ ວິໄລສຸກ ພິມມະສອນ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9 ແຂວງຊຽງຂວາງ ພ້ອມດ້ວຍຄະນະ ໄດ້ເຂົ້າວາງກະຕ່າດອກໄມ້ຕໍ່ໜ້າຮູບປັ້ນປະທານ ສະພານຸວົງ.
ທັງນີ້, ເພື່ອສະແດງຄວາມເຄົາລົບ, ຄວາມອາໄລຮັກ, ຄວາມກະຕັນຍູຮູ້ບຸນຄຸນຕໍ່ປະທານ ສຸພານຸວົງ ທີ່ມີຄຸນງາມຄວາມດີຕໍ່ປະເທດຊາດ, ຕໍ່ການປະຕິວັດ ແລະ ຕໍ່ປະຊາຊົນລາວບັນດາເຜົ່າ ໃນພາລະກິດປົດປ່ອຍຊາດ, ປະທານສຸພານຸວົງ ແມ່ນຜູ້ນຳຮຸ່ນອາວຸໂສທີ່ສຳຄັນຂອງພັກ-ລັດ ທີ່ໄດ້ສ້າງຜົນງານ ແລະຄຸນງາມຄວາມດີອັນໃຫຍ່ຫລວງໃຫ້ແກ່ປະເທດຊາດ ແລະປະຊາຊົນລາວບັນດາເຜົ່າ, ປະທານ ສຸພານຸວົງ ແມ່ນຜູ້ນຳປະຕິ ວັດທີ່ມີນ້ຳໃຈເສຍສະຫລະອັນສູງສົ່ງ, ເດັດດ່ຽວອາດຫານ ແລະປີຊາສາມາດ ທີ່ໄດ້ອຸທິດປັນຍາ ແລະກຳລັງວັງຊາ ເພື່ອຄວາມເປັນເອກະລາດ ແລະ ຄວາມຮັ່ງມີເຂັ້ມແຂງຂອງປະເທດຊາດ ເພື່ອອິດສະ ຫລະພາບ ແລະຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າ ເຊິ່ງມັນໄດ້ເປັນບົດຮຽນອົດລ້ຳຄ່າໃຫ້ແກ່ເຮົາ ກໍຄືຮຸ່ນລູກຫລານທີ່ຄວນຮ່ຳຮຽນເອົາ ເປັນຕົ້ນນຳໃຈເສຍສະຫລະ, ຄຸນສົມບັດສິນທຳປະຕິວັດອັນດີເດັ່ນ ຍອມເສຍສະຫລະຄວາມສຸກສ່ວນຕົວ ເພື່ອຜົນປະໂຫຍດສ່ວນລວມ ເຊິ່ງເປັນແບບຢ່າງທີ່ດີງາມ ທີ່ພວກເຮົາທຸກຄົນຄວນຮ່ຳຮຽນເອົາ; ພ້ອມນີ້, ສະຫາຍ ວິໄລວົງ ພ້ອມດ້ວຍຄະນະ ຍັງໄດ້ຢ້ຽມຊົມພາບການເຄື່ອນໄຫວຂອງທ່ານສຸພານຸວົງໃນພິພິຕະພັນ ແລະ ມອບຄອມພິວເຕີພ້ອມດ້ວຍປິນເຕີ1 ໜ່ວຍໃຫ້ແກ່ພິພິຕະພັນດັ່ງກ່າວອີກດ້ວຍ.
(ນາງ ອາລິນ ສຸພິມມະປະດິດ)