(ສພຊ) – ກອງປະຊຸມໃຫຍ່ຄັ້ງທີ II ຂອງກໍາມະບານຮາກຖານຄະນະເລຂາທິການສະພາແຫ່ງຊາດ (ຄລສ) ໄດ້ໄຂຂຶ້ນໃນຕອນເຊົ້າຂອງວັນທີ 31 ມັງກອນ 2025 ໂດຍການເປັນປະທານຮ່ວມຂອງສະຫາຍ ນາງ ອໍາໄພວອນ ລ້ອມບຸນແພງ ກຳມະການສຳຮອງສູນກາງພັກ, ຄະນະປະຈຳພັກ, ເລຂາຄະນະພັກຮາກຖານຄະນະເລຂາທິການສະພາແຫ່ງຊາດ, ສະຫາຍ ໂພສີ ເຕັມເມລາດ ຮອງປະ ທານຄະນະບໍລິຫານງານສະຫະພັນກໍາມະບານສະພາແຫ່ງຊາດ (ສພຊ), ສະຫາຍ ເປຄໍາ ລໍຄໍາສອນ ຮັກສາການປະທານກໍາມະບານຮາກຖານຄະນະເລຂາທິການສະພາແຫ່ງຊາດ; ມີຜູ້ແທນສົມບູນ ແລະ ບັນດາສະຫາຍຕາງໜ້າຈາກໜ່ວຍກໍາມະບານຮາກຖານອ້ອມຂ້າງ ແລະ ແຂກຖືກເຊີນເຂົ້າຮ່ວມ.
ກອງປະຊຸມໄດ້ເປັນເອກະພາບຮັບຮອງເອົາບົດລາຍງານການເມືອງ ເຊິ່ງໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບາງບົດຮຽນທີ່ຖອດຖອນໄດ້ ໃນການຊີ້ນຳ-ນຳພາ ແລະ ການຈັດຕັ້ງປະຕິບັດວຽກງານໃນໄລຍະຜ່ານມາ (ປີ 2019-2024) ແລະ ທິດທາງແຜນການ 5 ປີ ນັບແຕ່ປີ 2025-2029; ພ້ອມນັ້ນ, ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະກໍາມະບານຮາກຖານຄະນະເລຂາທິ ການສະພາແຫ່ງຊາດຊຸດໃໝ່ ບົນພື້ນຖານຫຼັກການລວມສູນປະຊາທິປະໄຕ, ຖືກຕ້ອງສອດ ຄ່ອງກັບມາດຕະຖານ ແລະ ເງື່ອນໄຂທີ່ກຳນົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງ 11 ສະຫາຍ ແລະ ເລືອກໄດ້ 7 ສະຫາຍ; ກອງປະຊຸມຄັ້ງປະຖົມມະລືກຂອງກໍາມະບານຮາກຖານ ຄລສ ສະໄໝທີ II ໄດ້ເປັນເອກະ ພາບເລືອກເອົາສະຫາຍ ຂັນທອງ ແພງສີໃຈ ເປັນປະທານ, ສະຫາຍ ໄຊປັນຍາ ພົມວິຫານ ເປັນຮອງປະທານ ທັງເປັນປະທານກວດກາ, ສະຫາຍ ຂັນທອງ ເພັງລາສີ ເປັນຮອງປະ ທານກວດກາ, ສະຫາຍ ແກ້ວລະກາ ຊ້ອຍໄຊຍະ, ສະຫາຍ ປອ. ຈັນທີ ປັດຊະຍາ, ສະຫາຍ ພົນລາວັນ ວິໄລທອງ ແລະ ສະຫາຍ ຄຳສິງ ທາດາສະຫວັນ ເປັນກຳມະການ.
ສະຫາຍ ນາງ ອໍາໄພວອນ ລ້ອມບຸນແພງ ໄດ້ໂອ້ລົມ ແລະ ໃຫ້ທິດຊີ້ນໍາ ເຊິ່ງສະຫາຍໄດ້ຍ້ອງຍໍຊົມເຊີຍ ແລະ ຕີລາຄາສູງຕໍ່ຜຜົນງານການເຄື່ອນໄຫວ ແລະ ການສ້າງຂະບວນການຕ່າງໆ ທີ່ບັນດາສະຫາຍສະມາຊິກກໍາມະບານໄດ້ຕັ້ງໜ້າປະກອບສ່ວນຈັດຕັ້ງປະຕິບັດຢ່າງຫ້າວຫັນ ຕິດພັນກັບການພັດທະນາວຽກງານວິຊາສະເພາະຂອງຄະນະເລຂາທິການສະພາແຫ່ງຊາດໃນໄລຍະຜ່ານມາ ໂດຍສະເເພາະການເປັນເສນາທິການໃຫ້ແກ່ຄະນະເລຂາທິການ ແລະ ຄະນະປະຈຳສະພາແຫ່ງຊາດ ເປັນຕົ້ນວຽກງານຈັດຕັ້ງ-ພະນັກງານ, ວຽກງານກວດກາ, ວຽກງານເລຂານຸການ-ເນື້ອໃນ, ວຽກງານສື່ມວນຊົນ, ວຽກງານບໍລິຫານ-ພິທີການ, ວຽກງານການເງິນ-ງົບປະມານ ແລະ ວຽກງານຄຸ້ມຄອງເຄຫາສະຖານ ໄປຄຄຽງຄູ່ກັບການປະຕິບັດຂໍ້ແຂ່ງຂັນເນື້ອໃນ 5 ເປັນເຈົ້າ, ຂະບວນການຮັກຊາດ ແລະ ພັດທະນາ, ການກໍ່ສ້າງໜ່ວຍພັກໃຫ້ປອດໃສ ເຂັ້ມແຂງ ແລະ ໜັກແໜ້ນ; ພ້ອມນັ້ນ, ສະຫາຍຍັງໄດ້ເນັ້ນໜັກຕໍ່ຄະນະ ແລະ ສະມາຊິກກໍາມະບານຮາກຖານຄະນະເລຂາທິການສະພາແຫ່ງຊາດ ຕ້ອງໄດ້ເອົາໃຈໃສ່ບຸກບືນ ແລະ ຈັດຕັ້ງປະຕິບັດໜ້າທີ່ການເມືອງ ໃຫ້ໄດ້ຮັບຜົນສຳເລັດເປັນຢ່າງດີ.
ກອງປະຊຸມຍັງຮຽກຮ້ອງໃຫ້ຜູ້ແທນທຸກສະຫາຍ ຈົ່ງໄດ້ນໍາເອົາເນື້ອໃນຈິດໃຈທັງໝົດຂອງກອງປະຊຸມໃຫຍ່ຄັ້ງທີ II ໂດຍສະເພາະແມ່ນທິດທາງ ແລະ ບັນດາຄາດໝາຍສູ້ຊົນຮອດປີ 2029 ໄປຈັດຕັ້ງປະຕິບັດຜັນຂະຫຍາຍເປັນອັນລະອຽດ ແລະ ເຜີຍແຜ່ໃຫ້ສະມາຊິກກໍາມະບານທຸກສະຫາຍພາຍໃນໜ່ວຍກໍາມະບານ ທີ່ຂຶ້ນກັບກໍາມະບານຮາກຖານຄະນະເລຂາທິການສະພາແຫ່ງຊາດ ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ ດ້ວຍຄວາມຮັບຜິດຊອບສູງ, ປາກົດຜົນເປັນຈິງ ແລະ ມີຜົນສຳເລັດຢ່າງຈົບງາມ.
(ນາງ ອາລິນ ສຸພິມມະປະດິດ)