(ສພຊ) – ເພື່ອສະຫຼຸບຕີລາຄາການເຄື່ອນໄຫວປະຕິບັດໜ້າທີ່ວຽກງານຕະ ຫຼອດໄລຍະ 1 ປີຜ່ານມາ ແລະ ກຳນົດທິດທາງແຜນການເຄື່ອນໄຫວປະຈຳປີ 2025 ພ້ອມທັງຍົກໃຫ້ເຫັນດ້ານຜົນສໍາເລັດ, ຂໍ້ຄົງຄ້າງ, ສາເຫດ ແລະ ບົດຮຽນຖອດຖອນໄດ້ ແນໃສ່ເຮັດໃຫ້ເປັນການປັບປຸງແກ້ໄຂວຽກງານຂອງຄະນະເລຂາທິການສະພາແຫ່ງຊາດ (ຄລສ) ໃຫ້ນັບມື້ດີຂຶ້ນກວ່າເກົ່າ; ເພື່ອນໍາເອົາບົດຮຽນຂອງຄະນະເລຂາທິ ການສະພາປະຊາຊົນຂັ້ນແຂວງ (ສພຂ) ຈຳນວນໜຶ່ງ ມາແລກປ່ຽນກັນ ລວມທັງປຶກສາຫາລືແລກປ່ຽນຄໍາຄິດຄໍາເຫັນລະຫວ່າງ ຄລສ ກັບບັນດາກົງຈັກພາຍໃນສະ ພາແຫ່ງຊາດ (ສພຊ) ແລະ ຄະນະເລຂາທິການ ສພຂ ໃນການຊອກຫາວິທີການແກ້ ໄຂວຽກງານຕ່າງໆ ໃນຖານະເປັນເສນາທິການໃຫ້ ສພຊ ແລະ ສພຂ ໃຫ້ນັບມື້ມີຄຸນ ນະພາບດີໃນຕໍ່ໜ້າ ທັງເປັນການເຜີຍແຜ່ນິຕິກຳທີ່ສໍາຄັນຈຳນວນໜຶ່ງ ຮັບປະກັນໃຫ້ແກ່ວຽກງານຂອງ ຄລສ, ບັນດາກົງຈັກພາຍໃນ ສພຊ ແລະ ຄະນະເລຂາທິການ ສພຂ ເປັນບ່ອນອີງໃນການຜັນຂະຫຍາຍ ແລະ ຈັດຕັ້ງປະຕິບັດໃຫ້ທັນກັບສະພາບ ການເຄື່ອນໄຫວໃນປັດຈຸບັນ, ໃນໄລຍະໃໝ່.
ວັນທີ 25-26 ມັງກອນນີ້ ທີ່ເມືອງແກ້ວອຸດົມ ແຂວງວຽງຈັນ ໄດ້ມີກອງປະຊຸມຄະນະເລຂາທິການສະພາແຫ່ງຊາດ ປະຈຳປີ 2024 ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ເລຂາທິການສະພາແຫ່ງຊາດ; ມີບັນດາທ່ານຮອງປະທານກຳມາທິການ, ຮອງເລຂາທິການ, ຮອງຫົວໜ້າສະຖາບັນຄົ້ນຄວ້ານິຕິກຳ ສພຊ, ເລຂາທິການ-ຮອງເລຂາທິການສະພາປະຊາຊົນແຂວງ-ນະຄອນຫຼວງ ພ້ອມດ້ວຍຄະນະກົມ, ສູນ ແລະ ຫ້ອງການ, ຄະນະພະແນກ ແລະ ລັດຖະກອນ ຈາກ ສພຊ ເຂົ້າຮ່ວມຫຼາຍກວ່າ 120 ທ່ານ.
ທ່ານ ນາງ ອໍາໄພວອນ ລ້ອມບຸນແພງ ມີຄໍາເຫັນວ່າ: ໃນໄລຍະປີ 2024 ຜ່ານມາ ໃນນາມກົງຈັກທີ່ເປັນເສນາທິການທີ່ຮັບໃຊ້ວຽກງານຢ່າງໃກ້ຊິດຂອງສະພາແຫ່ງ ຊາດ, ຄະນະເລຂາທິການສະພາແຫ່ງຊາດ ໄດ້ມີຄວາມພະຍາຍາມ ແລະ ເອົາໃຈໃສ່ຈັດ ຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ໃນການຈັດຕັ້ງຜັນຂະຫຍາຍແຜນການເຄື່ອນໄຫວວຽກງານຂອງສະພາແຫ່ງຊາດ, ຄະນະປະຈໍາສະພາແຫ່ງຊາດ ເຊິ່ງສາມາດຈັດຕັ້ງປະຕິບັດວຽກງານມີຜົນສຳເລັດເປັນຢ່າງດີ ສະແດງອອກໃນການເປັນເສນາທິການການກະກຽມວຽກງານຮອບດ້ານ ເປັນຕົ້ນດ້ານເນື້ອໃນໃນການຮັບໃຊ້ກອງປະຊຸມສະໄໝສາມັນຂອງສະພາແຫ່ງຊາດ, ກອງປະຊຸມຄະນະປະທານຄະນະປະຈໍາສະພາແຫ່ງຊາດ, ກອງປະຊຸມຄະນະປະຈໍາສະພາແຫ່ງຊາດ, ກອງປະຊຸມຮ່ວມກັບພາກສ່ວນກ່ຽວຂ້ອງ; ວຽກງານການປັບປຸງກົງຈັກການຈັດຕັ້ງ, ການກໍ່ສ້າງ ແລະ ບໍາລຸງສ້າງພະນັກງານ, ວຽກງານບໍລິຫານ-ພິທີການ, ວຽກງານການເງິນ, ວຽກງານສື່ມວນຊົນ, ວຽກງານກວດກາ, ວຽກງານຄຸ້ມຄອງຫໍສະພາແຫ່ງຊາດ, ການອໍານວຍຄວາມສະດວກໃຫ້ການເຄື່ອນໄຫວຢູ່ພາຍໃນ ແລະ ຕ່າງປະເທດ, ການປັບປຸງແບບ ແຜນວິທີເຮັດວຽກຢູ່ພາຍໃນຄະນະເລຂາທິການສະພາແຫ່ງຊາດ, ຄວາມເປັນເຈົ້າ ການຂອງພະນັກງານ-ລັດຖະກອນທີ່ຮັບຜິດຊອບວຽກຕ່າງໆ ເຊິ່ງເປັນເງື່ອນໄຂອໍາ ນວຍໃຫ້ແກ່ການເຄື່ອນໄຫວວຽກງານລວມຂອງສະພາແຫ່ງຊາດ ໄດ້ມີການຫັນປ່ຽນຢ່າງຕັ້ງໜ້າ ແລະ ໄດ້ຮັບການປັບປຸງໃຫ້ມີຄວາມສອດຄ່ອງດີຂຶ້ນເປັນກ້າວໆ; ທັງ ໝົດນັ້ນ ແມ່ນຍ້ອນໄດ້ຮັບຄວາມເອົາໃຈໃສ່ຊີ້ນໍາຢ່າງໃກ້ຊິດຈາກຄະນະພັກ, ຄະນະປະຈໍາ ແລະ ການສະໜັບສະໜູນຮ່ວມມືເປັນຢ່າງດີຈາກບັນດາກົງຈັກການຈັດຕັ້ງພາຍ ໃນສະພາແຫ່ງຊາດ ເປັນຕົ້ນ: ບັນດາກໍາມາທິການ, ສະຖາບັນຄົ້ນຄວ້ານິຕິກໍາ, ຄະນະເລຂາທິການສະພາປະຊາຊົນຂັ້ນແຂວງ ກໍຄືພາກສ່ວນກ່ຽວຂ້ອງຕ່າງໆ. ຄຽງຄູ່ກັບຜົນງານ ແລະ ຜົນສໍາເລັດໃນ 1 ປີຜ່ານມາ, ກໍຍັງພົບກັບຄວາມຫຍຸ້ງຍາກສິ່ງທ້າ ທ້າຍຈຳນວນໜຶ່ງ ທີ່ຈະຕ້ອງໄດ້ສືບຕໍ່ປັບປຸງແກ້ໄຂໃນຊຸມປີຕໍ່ໜ້າ ເປັນຕົ້ນ: ກົນໄກການແກ້ໄຂວຽກບາງດ້ານຍັງຊັກຊ້າ, ການປະສານວຽກງານຈໍານວນໜຶ່ງຍັງບໍ່ທັນໂລ່ງລ່ຽນ; ການປັບປຸງກົງຈັກການຈັດຕັ້ງ, ການກຳນົດພາລະບົດບາດ, ສິດ ແລະ ໜ້າທີ່ບາງອັນຍັງຊ້ຳຊ້ອນ; ການບໍາລຸງສ້າງບຸກຄະລາກອນທີ່ເປັນເສນາທິການໃຫ້ແກ່ສະພາແຫ່ງຊາດ ຍັງບໍ່ຕໍ່ເນື່ອງ, ຂາດການປະເມີນຕິດຕາມຊຸກຍູ້ກໍ່ສ້າງ; ການສະ ໜອງອຸປະກອນຮັບໃຊ້ວຽກງານຕ່າງໆ ຍັງບໍ່ທັນຕອບສະໜອງຕາມຄວາມຮຽກຮ້ອງຕ້ອງການຕົວຈິງ.
ຜູ້ເຂົ້າຮ່ວມໄດ້ຮັບຟັງບັນດາເອກະສານທີ່ສຳຄັນຄື: ຜ່ານຮ່າງບົດສະຫຼຸບການເຄື່ອນໄຫວວຽກງານຂອງຄະນະເລຂາທິການສະພາແຫ່ງຊາດ ປະຈຳປີ 2024 ແລະ ແຜນການປະຈຳປີ 2025 ໂດຍທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງ ຊາດ; ບົດປະກອບຄຳເຫັນການເປັນເສນາທິການດ້ານວຽກງານຈັດຕັ້ງ-ພະນັກງານ ຈາກທ່ານເລຂາທິການສະພາປະຊາຊົນແຂວງຜົ້ງສາລີ; ບົດປະກອບຄຳເຫັນການເປັນເສນາທິການດ້ານເນື້ອໃນໃຫ້ແກ່ສະມາຊິກສະພາປະຊາຊົນແຂວງ, ຄະນະສະມາຊິກສະ ພາແຫ່ງຊາດປະຈຳເຂດເລືອກຕັ້ງ ຈາກທ່ານເລຂາທິການສະພາປະຊາຊົນແຂວງຄຳມ່ວນ; ບົດປະກອບຄຳເຫັນການຈັດຕັ້ງປະຕິບັດວຽກງານບໍລິຫານ ແລະ ການຄຸ້ມ ຄອງໂຄງການລົງທຶນ ຈາກທ່ານເລຂາທິການສະພາປະຊາຊົນແຂວງໄຊສົມບູນ; ເຜີຍ ແຜ່ມະຕິຄະນະປະຈໍາສະພາແຫ່ງຊາດ ວ່າດ້ວຍການປະເມີນຄວາມໄວ້ວາງໃຈຕໍ່ບຸກຄະລາກອນທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ ໂດຍທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ. ຈາກນັ້ນ, ກໍໄດ້ສຸມໃສ່ຄົ້ນຄວ້າ, ຕີລາຄາ, ແລກປ່ຽນບົດຮຽນ ແລະ ປະກອບຄໍາເຫັນໃສ່ບັນດາເນື້ອໃນທີ່ໄດ້ນໍາເຂົ້າມາປຶກສາຫາລື ເພື່ອຍົກໃຫ້ເຫັນດ້ານດີ, ດ້ານອ່ອນ, ສາເຫດ ແລະ ສະເໜີວິທີການແກ້ໄຂຢ່າງກົງໄປກົງມາ ເຊິ່ງຈະເປັນຂໍ້ມູນນໍາໄປປັບປຸງ, ແກ້ໄຂວຽກງານໃນຕໍ່ໜ້າ.
(ຂ່າວ: ນາງ ສຸພາວັນ ຫອມສະນິດ; ພາບ: ສອນສັກ ວັນວິໄຊ)