ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງຄໍາມ່ວນ ຊຸດທີ II ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນອັງຄານ ວັນທີ 21 ມັງກອນ 2025 ທີ່ສະໂມສອນໃຫ່ຍ 21 ມີນາ ຂອງແຂວງ ໂດຍການເປັນປະທານຂອງທ່ານ ບຸນມີ ພິມມະສອນ ປະທານສະພາປະຊາຊົນແຂວງຄໍາມ່ວນ, ເປັນກຽດເຂົ້າຮ່ວມມີ ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາຄະນະປະຈຳພັກແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 12 ແຂວງຄໍາມ່ວນ, ສະມາຊິກສະພາປະຊາຊົນຂັ້ນແຂວງ, ຫົວໜ້າພະແນກການ, ເຈົ້າເມືອງ, ມີບັນດາທ່ານ ອາດີດການນໍາຂັ້ນສູງຂອງແຂວງ ແລະ ແຂກຖືກເຊີນ.
ພາຍຫຼັງທ່ານ ບຸນມີ ພິມມະສອນ ໄດ້ກ່າວສູນທອນພົດເປີດກອງປະຊຸມຢ່າງເປັນທາງການ. ກອງປະຊຸມໄດ້ຮັບຟັງບົດລາຍງານຂອງ ທ່ານ ເຈົ້າແຂວງຄຳມ່ວນ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ຄາດໝາຍພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງປະຈຳປີ 2024 ແລະ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ຄາດໝາຍພັດທະນາຊົນນະບົດ ແລະ ແກ້ໄຂຄວາມທຸກຍາກ ຂອງແຂວງ ປະຈໍາປີ 2025. ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນຂັ້ນແຂວງ ຕາງໜ້າໃຫ້ຄະນະປະຈຳສະພາປະຊາຊົນຂັ້ນແຂວງ ກໍໄດ້ປະກອບຄຳເຫັນຕໍ່ບົດລາຍງານຂອງທ່ານເຈົ້າແຂວງ.
ຫຼັງຈາກນັ້ນ, ປະທານກອງປະຊຸມໄດ້ມີຄຳເຫັນເຈາະຈີ້ມ ທັງໃຫ້ທິດຊີ້ນຳໃນການຄົ້ນຄວ້າປະກອບຄຳເຫັນຕໍ່ບົດລາຍງານ; ບັນດາທ່ານ ສສຂ ກໍໄດ້ພ້ອມກັນສຸມໃສ່ຄົ້ນຄວ້າ ແລະ ປະກອບຄຳເຫັນໃສ່ບົດລາຍງານຂອງອົງການປົກແຂວງ; ກອງປະຊຸມໄດ້ຮັບຟັງ ການຊີ້ແຈງ ແລະ ຕອບຄຳຊັກຖາມຈາກ 6 ພາກສວ່ນ ໂດຍຕິດພັນກັບບົດລາຍງານ ຂອງອົງການປົກຄອງແຂວງຕາມຫົວຂໍ້ສະເພາະ ທີ່ຄະນະປະຈໍາສະພາປະຊາຊົນຂັ້ນແຂວງ ໄດ້ຕັ້ງຂຶ້ນກ່ອນການດໍາເນີນກອງປະຊຸມ ຄື: ພະແນກແຜນການ ແລະ ການລົງທຶນແຂວງ, ພະແນກການເງິນແຂວງ, ພະແນກກະສິກຳ ແລະ ປ່າໄມ້ແຂວງ, ພະແນກອຸດສາຫະກຳ ແລະ ການຄ້າແຂວງ, ພະແນກໂຍທາທິການ ແລະ ຂົນສົ່ງແຂວງ ແລະ ພະແນກສຶກສາທິການ ແລະ ກິລາ ແຂວງ; ພ້ອມດຽວກັນນັ້ນຍັງໄດ້ຕອບຄຳຊັກຖາມທີ່ສະມາຊິກສະພາປະຊາຊົນຂັ້ນ ທີ່ໄດ້ຍົກຂືຶ້ນໃນວາລະດໍາເນີນກອງປະຊຸມ.ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄຳມ່ວນ ຊຸດທີ II ຈະໄດ້ດໍາເນີນໄປຈົນຮອດວັນທີ 24 ມັງກອນ 2025 ເປັນເວລາ 4 ວັນເຕັມ, ຄະນະເລຂາທິການສະພາປະຊາຊົນຂັ້ນແຂວງ ໄດ້ຈັດຕັ້ງຄະນະຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນ ທີ່ຈະສົ່ງໄປຍັງກອງປະຊຸມ ໝາຍເລກໂທລະສັບ 051 156 (ໃນໂມງລັດຖະການ) ໂດຍບໍ່ເສຍຄ່າ.
-ທ່ານສາມາດຕິດຕາມຂໍ້ມູນ-ຂ່າວສານໄດ້ທີ່ລິ້ງດັ່ງລຸ່ມນີ້: