ກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ ຊຸດທີ II ໄດ້ອັດລົງດ້ວຍຜົນສໍາເລັດອັນຈົບງາມ ພາຍຫຼັງດໍາເນີນກອງປະຊຸມ ເກືອບ 3 ວັນ ເລີ່ມແຕ່ວັນທີ 14-16 ມັງກອນ 2025, ຢູ່ທີ່ສະໂມສອນໃຫຍ່ຂອງແຂວງ ສາລະວັນ, ພາຍໃຕ້ການເປັນປະທານຂອງ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ, ກອງປະຊຸມໄດ້ໃຫ້ກຽດຕ້ອນ ຮັບການເຂົ້າຮ່ວມຂອງ ທ່ານ ປອ ດາວວົງ ພອນແກ້ວ ກໍາມະການສູນກາງພັກ, ເລຂາພັກແຂວງ-ເຈົ້າແຂວງສາລະວັນ, ທ່ານ ສຸບັນ ສະວະບຸດ ຄະນະປະຈໍາສະພາແຫ່ງຊາດ, ປະທານກໍາມາທິການວຽກງານສະມາຊິກສະພາແຫ່ງຊາດ, ມີສະມາຊິກສະພາແຫ່ງຊາດ ປະຈໍາເຂດເລືອກຕັ້ງ 14, ສະມາຊິກສະພາປະຊາຊົນແຂວງ, ບັນດາທ່ານຜູ້ນໍາພັກ-ລັດຂັ້ນສູງຂອງແຂວງ, ອະດີດການນໍາຂອງແຂວງ; ອະດີດສະມາຊິກສະພາແຫ່ງຊາດປະຈໍາເຂດເລືອກຕັ້ງ 14; ບັນດາຫົວໜ້າພະແນກການ; ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ລັດວິສາຫະກິດ, ທະນາຄານ, ພະນັກງານ-ລັດຖະ ກອນ ແລະ ສື່ມວນຊົນ ເຂົ້າຮ່ວມທັງໝົດ 200 ກວ່າທ່ານ.
ການດໍາເນີນກອງປະຊຸມ ຄັ້ງນີ້ ໄດ້ຮັບຟັງການລາຍງານ ຂອງທ່ານເຈົ້າແຂວງ ໂດຍສັງເຂບກ່ຽວກັບກ່ຽວກັບການເຄື່ອນໄຫວວຽກງານພົ້ນເດັ່ນຂອງອົງການ ປົກຄອງແຂວງ ປະຈໍາປີ 2024 ແລະ ແຜນການ ປະຈໍາປີ 2025 ຕິດພັນກັບວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການແກ້ໄຂບັນຫາຢາເບຕິດ, ວຽກງານຂອງອົງການສອບ ປະຈໍາພາກໃຕ້, ວຽກງານຂອງອົງການກວດກາລັດແຂວງ, ການເຄື່ຶອນໄຫວວຽກງານຂອງອົງການໄອະການປະຊາຊົນແຂວງ, ສານປະຊາຊົນແຂວງ, ວຽກງານສະພາປະຊາຊົນແຂວງໃນການເຄື່ອນໄຫວວຽກງານປະຈໍາປີ 2024 ແລະ ວາງທິດທາງແຜນການປະຈໍາປີ 2025;
ກອງປະຊຸມໄດ້ຮັບຟັງການຊີ້ແຈງ ຕໍ່ຄໍາຊັກຖາມທີ່ສະມາຊິກສະພາປະຊາຊົນແຂວງ ກໍຄືປະຊາຊົນບັນດາເຜົ່າພາຍໃນແຂວງ ທີ່ມີຄວາມສົນໃຈຫຼາຍ ຈາກທ່ານຮອງເຈົ້າແຂວງ, ຫົວໜ້າພະແນກແຜນການ ແລະ ການລົງທຶນ, ຫົວໜ້າພະແນກການເງິນ, ພະແນກອຸດສາຫະກໍາ ແລະ ການຄ້າ, ພະແນກໂຍທາທິການ ແລະ ຂົນສົ່ງ, ພະແນກສຶກສາທິການ ແລະ ກິລາ, ພະແນກພາຍໃນ, ປະທານອົງການກວດສອບປະຈໍາພາກໃຕ້, ປະທານອົງການກວດກາລັດແຂວງ, ພະແນກແຮງງານ ແລະ ສະຫວັດດີການ-ສັງຄົມ, ພະແນກກະສິກໍາ ແລະ ປ່າໄມ້, ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມ, ພະແນກພະລັງງານ ແລະ ບໍ່ແຮ່, ພະແນກສາທາລະນະສຸກ ທັງໝົດ 14 ທ່ານ.
ໃນວາລະການດໍາເນີນກອງປະຊຸມຄັ້ງນີ້ ແມ່ນເຕັມໄປດ້ວຍບັນຍາກາດແຫ່ງການເສີມຂະຫຍາຍປະຊາທິປະໄຕ ຂອງສະມາຊິກສະພາປະຊາຊົນແຂວງ ໄດ້ສຸມທຸກສະຕິປັນຍາໃນການຄົ້ນຄວ້າຢ່າງຖີ່ຖ້ວນ ດ້ວຍຄວາມຮັບຜິດຊອບສູງ ປະກອບຄໍາເຫັນຢ່າງກົງໄປກົງມາ ຕໍ່ເນື້ອໃນທີ່ນໍາມາ ພິຈາລະນາ ແລະ ຮັບຮອງເອົາໃນກອງປະຊຸມ ຢ່າງມີຄວາມເປັນເອກະພາບສູງ, ຊຶ່ງໄດ້ລົງຄະແນນສຽງຮັບຮອງເອົາມະຕິກອງປະຊຸມ ຈໍານວນ 11 ສະບັບຄື:
1. ມະຕິວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈໍາປີ 2024 ແລະ ແຜນການ ປະຈໍາປີ 2025 ຂອງແຂວງ; ແຜນການລົງທຶນຂອງລັດ ປະຈໍາປີ 2025;
2. ມະຕິວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດ ຂອງແຂວງ ປະຈໍາປີ 2024 ແລະ ແຜນການ ປະຈໍາປີ 2025;
3. ມະຕິວ່າດ້ວຍການຮັບຮອງເອົາການຈັດຕັ້ງປະຕິບັດວຽກງານສາມສ້າງຂອງແຂວງ ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ;
4. ມະຕິວ່າດ້ວຍການຮັບຮອງເອົາການຈັດຕັ້ງປະຕິບັດຍຸດທະສາດການປະຕິຮູບລະບົບການສຶກສາ, ການພັດທະນາຊັບພະຍາກອນມະນຸດແຫ່ງຊາດ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ ຂອງແຂວງ;
5. ມະຕິວ່າດ້ວຍການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການ ປະຈຳປີ 2025; ບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ ປະຈຳປີ 2023;
6. ມະຕິວ່າດ້ວຍການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການ ປະຈຳປີ 2025; ບົດລາຍງານຜົນການກວດກາ ຕາມຜົນການກວດສອບ ປີ 2022
7. ມະຕິວ່າດ້ວຍການຮັບຮອງເອົາບົດລາຍງານຂອງອົງການໄອຍະການປະຊາຊົນແຂວງ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການ ປະຈໍາປີ 2025;
8. ມະຕິວ່າດ້ວຍການຮັບຮອງເອົາບົດລາຍງານຂອງສານປະຊາຊົນແຂວງກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການ ປະຈຳປີ 2025;
9. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາບົດລາຍງານຂອງສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2024 ແລະ ແຜນການ ປະຈຳປີ 2025;
10. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາ ຂໍ້ຕົກລົງວ່າດ້ວຍ ການຄຸ້ມຄອງການຂົນສົ່ງສິນຄ້າທາງບົກ ພາຍໃນແຂວງສາລະວັນ (ສະບັບປັບປຸງ);
11. ມະຕິກອງປະຊຸມສະພາປະຊາຊົນແຂວງ ວ່າດ້ວຍ ການຮັບຮອງເອົາຂໍ້ຕົກລົງວ່າດ້ວຍ ການກໍານົດເຂດປະເມີນລາຄາທີ່ດິນທົ່ວແຂວງສາລະວັນ (ສະບັບປັບປຸງ).

ພາບ-ຂ່າວ ດີລໍາພົນ ພົມມະຈັນ