ເພື່ອປະຕິບັດຕາມພາລະບົດບາດ, ສິດ ແລະ ໜ້າທີ່ໃນການເປັນຕົວແທນແຫ່ງສິດຜົນປະໂຫຍດອັນຊອບທຳຂອງປະຊາຊົນບັນດາເຜົ່າ ໃຫ້ສຳເລັດຕາມລະດັບຄາດໝາຍ ໃນວັນທີ 13 ມັງກອນ 2025 ສະພາປະຊາຊົນແຂວງຫລວງນ້ຳທາ (ສພຂ) ໂດຍທ່ານ ພົຕ ປອ ວົງສັກ ພັນທະວົງ ຄະນະປະຈຳສະພາແຫ່ງຊາດ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ທ່ານ ຄຳຟອງ ອີນມານີ ປະທານສະພາປະຊາຊົນແຂວງ ພ້ອມດ້ວຍສະມາຊິກສະພາປະຊາຊົນແຂວງ ໄດ້ເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ຢູ່ທີ່ສະໂມສອນແຂວງຫລວງນໍ້າທາ, ເຂົ້າຮ່ວມຮັບຟັງມີ ນາຍ ແລະ ພົນທະຫານ, ນາຍ ແລະ ພົນຕຳຫລວດຂອງແຂວງເຂົ້າຮ່ວມຢ່າງພ້ອມພຽງ.
ເພື່ອນຳເອົາເນື້ອໃນຈິດໃຈຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີII ເຜີຍແຜ່ໃຫ້ສອງກໍາລັງພາຍໃນແຂວງ ໄດ້ຮັບຮູ້ເຊື່ອມຊຶມ ໃນພິທີທ່ານ ພົຕ ປອ ວົງສັກ ພັນທະວົງ ໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 8 ກອງປະຊຸມໄດ້ພິຈາລະນາ, ຮັບຮອງເອົາວຽກງານສຳຄັນຂອງຊາດຄື: ພິຈາລະນາ, ຮັບຮອງການຈັດຕັ້ງການປະຕິບັດ ແຜນພັດທະນາເສດຖະກິດ-ສັງຄົມ ແຫ່ງຊາດ ປະຈຳປີ 2024, ຮັບຮອງການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2024, ຮັບຮອງຜົນການກວດສອບ ບົດສະຫຼຸບຂາດຕິດການຈັດຕັ້ງພະຕິບັດແຜນງົບປະມານແຫ່ງລັດ ປະຈຳປີ 2023 ຕາມການລາຍງານຂອງອົງການກວດສອບແຫ່ງລັດພິຈາລະນາ ແລະ ພິຈາລະນາ ແລະ ຮັບຮອງຜົນການກວດສອບ ບົດສະຫຼຸບຂາດຕິດການຈັດຕັ້ງພະຕິບັດແຜນງົບປະມານແຫ່ງລັດ ປະຈຳປີ 2023 ຕາມການລາຍງານຂອງອົງການກວດສອບແຫ່ງລັດ, ຮັບຮອງເອົາວິໄສທັດ ຮອດປີ 2040 ແລະ ຍຸດທະສາດ ການຄຸ້ມຄອງ ແລະ ການພັດທະນາທີ່ດິນກະສິກຳ ຮອດປີ 2030 ປະກອບມີ 5 ຍຸດທະສາດ 5 ເປົ້າໝາຍ 12 ຄາດໝາຍ 30 ວຽກຈຸດສຸມ ແລະ ຮັບຮອງເອົາບົດລາຍງານຂອງລັດຖະບານກຽວກັບການຈັດຕັ້ງປະຕິບັດວຽກງານ 3 ສ້າງ.
ທ່ານ ຄຳຟອງ ອີນມານີ ໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຊຸດທີ2 ກອງປະຊຸມໄດ້ພິຈາລະນາ ແລະ ຮັບຮອງເອົາບັນຫາສໍາຄັນຂອງແຂວງຫລາຍບັນຫາເປັນຕົ້ນ: ພິຈາລະນາຮັບຮອງເອົາວຽກງານອົງການປົກຄອງແຂວງປະຈຳປີ 2024 ແລະ ທິດທາງວແຜນການປີ 2025; ວຽກງານໄອຍະການ ແລະ ສານປະຊາຊົນແຂວງ; ວຽກງານສະພາປະຊາຊົນແຂວງ ປະຈຳປີ 2024 ແລະ ທິດທາງແຜນການປີ 2025, ຮັບຮອງເອົາຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນສົ່ງເສີມ ແລະ ພັດທະນາກິລາກາຍຍະກໍາຂອງແຂວງ (ສະບັບປັບປຸງ) ແລະ ຮັບຮອງຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ (ສະບັບປັບປຸງ); ຮັບຮອງເອົາບົດລາຍງານກ່ຽວກັບ ການຈັດຕັ້ງປະຕິບັດແຜນຟື້ນຟູ-ປັບປຸງຊີວິດການເປັນຢູ່ ຂອງປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າທາ 1 ເມືອງນາແລ ໄລຍະທີ 1 (2020-2023) ແລະ ແຜນ ການໄລຍະທີ 2 (2025-2028),
ພ້ອມດຽວກັນ ທ່ານ ພົຈວ ປອ ວັນທອນ ສຸລິສັກ ສະມາຊິກສະພາແຫ່ງຊາດປະຈຳເຂດເລືອກຕັ້ງ ຍັງໄດ້ລາຍງານ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະຜ່ານມາ, ເປັນຕົ້ນສະພາບການຂອງໂລກ, ພາກພື້ນ, ການແກ້ໄຂບັນຫາສິ່ງເສບຕິດ, ຂໍ້ຫຍຸ້ງຍາກ ແລະ ຜົນສຳເລັດອັນພົ້ນເດັ່ນຂອງການຈັດຕັ້ງປະຕິບັດວາລະແຫ່ງຊາດໃນການແກ້ໄຂບັນຫາຢາເສບຕິດ ແລະ ການຈັດຕັ້ງປະຕິບັດແຜນການໃນປີ 2025.
ພາບຂ່າວ ວັນນີ ແຝງບົວວັນ