(ສພຊ) – ກອງປະຊຸມເຝິກອົບຮົມວຽກງານສື່ມວນຊົນ ພາຍໃຕ້ຫົວຂໍ້ “ສ້າງຄວາມຊໍານານງານໃນການຜະລິດລາຍການໂທລະພາບ” ໄດ້ປິດລົງດ້ວຍຜົນສຳເລັດເມື່ອວັນອັງຄານທີ 7 ມັງກອນຜ່ານມາ ພາຍຫຼັງດຳເນີນມາເປັນເວລາ 3 ວັນເຄິ່ງ ໂດຍການເປັນປະທານກ່າວປິດຂອງທ່ານ ປອ. ພິດສະໄໝ ບຸນວິໄລ ຫົວໜ້າກົມສື່ມວນຊົນຂອງ (ສພຊ) ເຊິ່ງມີວິທະຍາກອນທີ່ເປັນພະນັກງານ ແລະ ອະດີດພະນັກງານຂອງກະຊວງຖະແຫຼງຂ່າວ, ວັດທະນະທໍາ ເເລະ ທ່ອງທ່ຽວ ພ້ອມດ້ວຍນັກເຝິກອົບຮົມທີ່ເປັນພະນັກງານຜູ້ຮັບຜິດຊອບວຽກງານສື່ມວນຊົນຂອງສະພາແຫ່ງຊາດ ແລະ ສະພາປະຊາ ຊົນຂັ້ນແຂວງ (ສພຂ), ຕາງໜ້າຈາກວິທະຍຸກະຈາຍສຽງແຫ່ງຊາດລາວ, ໂທລະພາບແຫ່ງຊາດລາວ, ໂທລະພາບກອງ ທັບປະຊາຊົນລາວ, ໂທລະພາບປ້ອງກັນຄວາມສະຫງົບ, ໜັງສືພິມປະຊາຊົນ, ໜັງສືພິມປະເທດລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມຫຼາຍກວ່າ 60 ທ່ານ.

ກອງປະຊຸມໄດ້ຮັບຟັງການສະເໜີ, ການຖ່າຍທອດບົດຮຽນຕ່າງໆຈາກບັນດາທ່ານນັກວິທະຍາກອນ ເປັນຕົ້ນແມ່ນຮູບແບບຂອງການນໍາສະເໜີຂ່າວ-ບົດທີ່ມີມາດຕະຖານ, ເຕັກນິກໃນການປະຕິບັດໜ້າທີ່ເປັນພິທີກອນແບບມືອາ ຊີບ, ການຕັດຕໍ່ວີດີໂອແບບມືອາຊີບ; ຈາກນັ້ນ, ກໍໄດ້ພ້ອມກັນຄົ້ນຄວ້າ, ປະກອບຄໍາເຫັນ, ແລກປ່ຽນບົດຮຽນຢ່າງກົງໄປກົງມາ ຕິດພັນກັບບົດຮຽນຕົວຈິງ ເຊິ່ງເປັນການຍົກສູງຄວາມຮັບຜິດຊອບໃນການຄົ້ນຄວ້າ, ກະກຽມເນື້ອໃນຕ່າງໆ ເພື່ອຮັບປະກັນໃນການອອກຂ່າວຜ່ານສື່ຕ່າງໆ ໃຫ້ມີປະສິດທິພາບ, ປະສິດທິຜົນ ແລະ ມີການຫັນປ່ຽນເທື່ອລະກ້າວ.

ທ່ານ ປອ. ພິດສະໄໝ ບຸນວິໄລ ກ່າວວ່າ: ບັນດາຫົວຂໍ້ທີ່ນຳມາຖ່າຍທອດບົດຮຽນປະສົບການຄັ້ງນີ້ ເປັນບົດ ຮຽນທີ່ລໍ້າຄ່າທີ່ຫາໄດ້ຍາກທີ່ສຸດ ຈຶ່ງຮຽກຮ້ອງໃຫ້ນັກເຝິກອົບຮົມ ເອົາໃຈໃສ່ກໍາແໜ້ນຕໍ່ແນວທາງນະໂຍບາຍຂອງພັກ, ລະບຽບກົດໝາຍ, ມະຕິຄໍາສັ່ງ, ຄໍາແນະນໍາຕ່າງໆ ເພື່ອເປັນບ່ອນອີງ ແລະ ເຄື່ອງມືໃຫ້ແກ່ການປະຕິບັດໜ້າທີ່ວຽກງານຂອງສື່ມວນຊົນ ໃຫ້ມີການຫັນປ່ຽນທີ່ດີຂື້ນເລື້ອຍໆ; ນໍາເອົາບົດຮຽນດັ່ງກ່າວ ໝູນໃຊ້ເຂົ້າໃນການປະຕິບັດໜ້າທີ່ວຽກງານຕົວຈິງ ເພື່ອໃຫ້ເກີດຜົນປະໂຫຍດສູງສຸດແລະ ມີຜົນສໍາເລັດດີຂຶ້ນກວ່າເກົ່າ.

ການເຝິກອົບຮົມທີ່ຈັດຢູ່ເມືອງວັງວຽງ ແຂວງວຽງຈັນ ໂດຍໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPS) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ນາງ ອາລິນ ສຸພິມມະປະດິດ)