ກອງປະຊຸມສະຫຼຸບຕີລາຄືນກ່ຽວກັບການຈັດຕັ້ງປະຕິບັດເຄື່ອນໄຫວວຽກງານ ປະຈຳປີ 2024 ແລະ ທິດທາງແຜນການ ປະຈຳປີ 2025 ຂອງຄະນະເລຂາທິການສະພາປະຊາຊົນແຂວງຊຽງຂວາງ ໄດ້ໄຂຂຶ້ນຢ່າງເປັນທາງການ ໃນວັນທີ 9 ມັງກອນ 2025 ຢູ່ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຮ່ວມຂອງທ່ານ ວຽງໄຊ ສີວິໄລ ຮອງປະທານສະພາປະຊາຊົນແຂວງ, ຜູ້ຊີ້ນຳວຽກງານຄະນະເລຂາທິການ ແລະ ທ່ານ ນ. ສາຍພູເງິນ ອຸດົມສຸກ ເລຂາທິການສະພາປະຊາຊົນແຂວງ, ມີບັນດາທ່ານຮອງປະທານຄະນະກຳມະການ, ຄະນະເລຂາທິການ, ຮອງຫົວໜ້າຫ້ອງວ່າການແຂວງຫົວໜ້າ-ຮອງຫົວໜ້າບັນດາຂະແໜງ ແລະ ພະນັກງານຂອງສະພາປະຊາຊົນແຂວງເຂົ້າຮ່ວມ.

ເພື່ອຕີລາຄາຄືນກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ, ທ່ານ ຄຳແພງ ວົງພະເດັດ ຮອງເລຂາທິການສະພາປະຊາຊົນແຂວງໄດ້ຂຶ້ນຜ່ານ ຮ່າງບົດສະຫຼຸບ ການເຄື່ອນໄຫວວຽກງານ ປະຈຳປີ 2024 ແລະ ທິດທາງແຜນການ ປີ 2025 ຂອງຄະນະເລຂາທິການສະພາປະຊາຊົນແຂວງ ໃນໄລຍະ 1 ປີຜ່ານມາ, ເຊິ່ງຄະນະເລຂາທິການສະພາປະຊາຊົນແຂວງ ມີພາລະບົດບາດ, ສິດ ແລະ ໜ້າທີ່ ເປັນເສນາທິການ ຮັບຜິດຊອບວຽກປິ່ນອ້ອມ ໃຫ້ແກ່ການນຳຂອງສະພາປະຊາຊົນແຂວງ ເປັນຕົ້ນແມ່ນການສະໜອງຂໍ້ມູນ, ການກະກຽມເອກະສານປິ່ນອ້ອມ ບັນດາເນື້ອໃນກອງປະຊຸມຕ່າງໆຂອງສະພາປະຊາຊົນແຂວງ, ປະສານສົມທົບກັບພາກສ່ວນກ່ຽວຂ້ອງໃນການສ້າງແຜນ, ໃຫ້ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ລົງເຜີຍແຜ່ຜົນສຳເລັດຂອງກອງປະຊຸມສະໄໝສາມັນ ແຕ່ລະເທື່ອ, ອຳນວຍຄວາມສະດວກທາງດ້ານງົບປະມານ, ພາຫະນະ, ອຸປະກອນຮັບໃຊ້ໃຫ້ແກ່ການເຄື່ອນໄຫວວຽກງານຕ່າງໆ; ຄຽງຄູ່ກັບດ້ານດີຍັງມີວຽກງານບາງດ້ານຍັງບໍ່ທັນເຮັດໄດ້ດີເທົ່າທີຄວນ, ຜູ້ແທນກອງປະຊຸມໄດ້ຍົກຂຶ້ນມາປຶກສາຫາລື ປະກອບຄຳເຫັນໃສ່ຮ່າງບົດສະຫຼຸບຢ່າງກົງໄປກົງມາ ແລະ ເລິກເຊິ່ງ, ເພື່ອກຳນົດທິດທາງແຜນການ ຜັນຂະຫຍາຍເຂົ້າໃນການປະຕິບັດວຽກງານ ວິຊາສະເພາະຂອງແຕ່ລະຂະແໜງການ ຂອງຄະນະເລຂາທິການສະພາປະຊາຊົນແຂວງ ໄດ້ຮັບຜົນສຳເລັດ ແລະ ຖືກຕ້ອງສອດຄອງກັບລະບຽບ, ກົດໝາຍ.

ໃນຕອນທ້າຍ ທ່ານ ວຽງໄຊ ສີວິໄລ ຍັງໄດ້ມີຄຳເຫັນຕໍ່ກອງປະຊຸມ ຊື່ງທ່ານໄດ້ຍ້ອງຍໍ, ຊົມເຊີຍຕໍ່ຜົນສຳເລັດໃນການຈັດຕັ້ງປະຕິວຽກງານຂອງຄະນະເລຂາທິການໃນໄລຍະຜ່ານມາ ແລະ ໃຫ້ເອົາໃຈໃສ່ຕື່ມບາງວຽກງານທີ່ຍັງບໍ່ທັນອະອຽດຈະແຈ້ງ, ການພົວພັນປະສານງານກັບພາກສ່ວນກ່ຽວຂ້ອງໃຫ້ກົມກຽວ ເຮັດໃຫ້ວຽກງານສຳເລັດທັນກັບເວລາ, ຕິດຕາມການເຄື່ອນໄຫວ ແລະ ປະຕິບັດໜ້າທີ່ຂອງພະນັກງານເປັນປົກກະຕິ, ພ້ອມທັງສືບຕໍ່ຂໍຄຳເຫັນ, ຂໍທິດຊີ້ນຳຈາກຂັ້ນເທິງ ເພື່ອເຮັດໃຫ້ວຽກງານຂອງຄະນະເລຂາທິການ ມີປະສິດທິພາບ ແລະ ປະສິດທິຜົນໃນຕໍ່ໜ້າ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ