(ສພຊ) – ພະນັກງານຂອງສະພາແຫ່ງຊາດ (ສພຊ) ສປປລາວ ຈໍານວນ 4 ທ່ານ ແລະ ຈາກລັດຖະສະພາກຳປູເຈຍ, ໄທ, ອິນໂດເນເຊຍ, ຟີລິປິນ, ອິນເດຍ, ຝຣັ່ງ ແລະ ການາດາ ລວມທັງໝົດ 47 ທ່ານ ໄດ້ສຳເລັດການເຂົ້າຮ່ວມກອງປະຊຸມເຝິກອົບຮົມກ່ຽວກັບວຽກງານລັດຖະສະພາ ເຊິ່ງຈັດຂຶ້ນໃນວັນທີ 16-21 ທັນວາ 2024 ທີ່ນະຄອນຊຽມຣຽບ, ລາຊະອານາຈັກກຳປູເຈຍ ໂດຍການຮ່ວມມືລະຫວ່າງລັດຖະສະພາຝຣັ່ງ ກັບ ສູນລັດຖະສະພາອາຊີ (PCAsia).

ຜູ້ເຂົ້າຮ່ວມໄດ້ແລກປ່ຽນຂໍ້ມູນຂ່າວສານ ແລະ ປະສົບການທີ່ດີກ່ຽວກັບວຽກງານລັດຖະສະພາຂອງແຕ່ລະປະເທດ ພ້ອມທັງແລກປ່ຽນຄວາມຮູ້ໃນການນຳໃຊ້ລະບົບເຕັກໂນໂລຊີທັນສະໄໝ ແລະ ນະວັດຕະກຳອັດສະລິຍະ ໃນການປະຕິບັດພາລະບົດບາດດ້ານນິຕິບັນຍັດ; ການສ້າງ ແລະ ປັບປຸງກົດໝາຍ; ການພິຈາລະນາ ແລະ ຮັບຮອງກົດໝາຍຢູ່ກອງປະຊຸມ; ການຮ່າງບົດບັນທຶກລາຍງານຜົນກອງປະຊຸມ; ການຕັ້ງຄຳຊັກຖາມຕໍ່ລັດຖະບານຢູ່ກອງປະຊຸມ; ການຮັບ, ຄົ້ນຄວ້າ ແລະ ແກ້ໄຂຄຳຮ້ອງຂໍຄວາມເປັນທຳ; ການພົວພັນປະສານງານລະຫວ່າງລັດຖະສະພາ ກັບ ອົງການປົກຄອງຂັ້ນສູນກາງ ແລະ ທ້ອງຖິ່ນ; ການຄຸ້ມຄອງ-ບໍລິຫານ ແລະ ວຽກງານຄຸ້ມຄອງ-ພັດທະນາບຸກຄະລາກອນ; ວຽກງານພະລາທິການ, ບໍລິຫານ-ຄຸ້ມຄອງ, ກວດກາ ແລະ ອື່ນໆ. ພ້ອມກັນນີ້, ຍັງໄດ້ເຂົ້າຮ່ວມຮ່າງກົດໝາຍ, ນິຕິກໍາ ແລະ ມະຕິ ພາຍໃຕ້ 2 ຫົວຂໍ້: “ການຄຸ້ມຄອງສະພາບການປ່ຽນແປງດິນຟ້າອາກາດໃນພາກພື້ນອາຊີຕາເວັນອອກສຽງໃຕ້” ແລະ “ການຄຸ້ມຄອງວິກິດການມົນລະພິດພາດສະຕິກຂອງໂລກ” ເຊິ່ງພະນັກງານ ສພຊ ລາວ ກໍໄດ້ຂຶ້ນສະເໜີບົດ ແລະ ແລກປ່ຽນຄໍາຄິດຄໍາເຫັນຢ່າງຕັ້ງໜ້າ.

ໂອກາດເຂົ້າຮ່ວມເຝິກອົບຮົມ, ພະນັກງານຂອງສະພາແຫ່ງຊາດລາວ ຍັງໄດ້ຮ່ວມປຶກສາຫາລືຊອກຫາຊ່ອງທາງໃນການຮ່ວມມື, ສະໜັບສະໜູນ ແລະ ຊ່ວຍເຫຼືອເຊິ່ງກັນແລະກັນ ໃນວຽກງານການແລກປ່ຽນ, ການສ້າງລະບົບນຳໃຊ້ຖານຂໍ້ມູນຂ່າວສານຂອງລັດຖະສະພາໃນຕໍ່ໜ້າ; ຢ້ຽມຢາມສະຖານທີ່ມູນເຊື້ອທາງດ້ານປະຫວັດສາດຂອງນະຄອນຊຽມຣຽບ ອີກດ້ວຍ.