(ສພຊ) – ເພື່ອຜັນຂະຫຍາຍບັນດານິຕິກຳທີ່ກ່ຽວຂ້ອງ ເປັນຕົ້ນ: ກົດໝາຍວ່າດ້ວຍການລົງທຶນຂອງລັດ, ຄຳແນະນໍາການຈັດຕັ້ງປະຕິບັດກົດໝາຍວ່າດ້ວຍການລົງທຶນຂອງລັດ ໂດຍສະເພາະການສ້າງແຜນການ, ການປະເມີນໂຄງ ການເຂົ້າແຜນ, ການຄຸ້ມຄອງແຜນການລົງທຶນຂອງລັດ, ການຄົ້ນຄວ້າດັດແກ້ມູນຄ່າໂຄງການ, ການຊຳລະງົບປະມານ ແລະ ວຽກປິ່ນອ້ອມອື່ນໆ ໃຫ້ແກ່ຄະນະນຳສະພາປະຊາຊົນແຂວງ (ສພຂ) ພາກເໜືອ, ພາກກາງ ແລະ ໜ່ວຍງານຮັບ ຜິດຊອບຄຸ້ມຄອງແຜນການລົງທຶນຢູ່ສູນກາງ ແລະ ທ້ອງຖິ່ນ ໃຫ້ຮັບຮູ້, ເຂົ້າໃຈ ພ້ອມທັງນຳໄປຈັດຕັ້ງປະຕິບັດເຂົ້າສູ່ວຽກງານຕົວຈິງ; ເພື່ອປຶກສາຫາລືກົນໄກປະສານງານລະຫວ່າງສູນກາງກັບທ້ອງຖິ່ນ ໃນການຄຸ້ມຄອງແຜນການລົງທຶນຂອງລັດຂອງສະພາແຫ່ງຊາດ (ສພຊ) ທີ່ຕັ້ງຢູ່ 9 ແຂວງພາກເໜືອ ແລະ ພາກກາງ ໃຫ້ມີຄວາມໂລ່ງລ່ຽນ ແລະ ໃກ້ຊິດຕິດແທດກັນຫຼາຍຂຶ້ນ ທັງເປັນການພົບປະ ແລະ ແລກປ່ຽນບົດຮຽນວຽກງານຄຸ້ມຄອງແຜນການລົງທຶນຂອງລັດຂອງ ສພຊ ລະຫວ່າງສູນກາງກັບທ້ອງຖິ່ນ ໂດຍສະເພາະກົມບໍລິຫານ-ພິທີການ ເຊິ່ງເປັນເສນາທິການໃຫ້ແກ່ຄະນະເລຂາທິການສະພາແຫ່ງຊາດ ກັບ ສະມາຊິກສະພາແຫ່ງຊາດ ແລະ ຄະນະເລຂາທິການ ສພຂ ເພື່ອໃຫ້ຮັບຮູ້ ແລະ ເຂົ້າໃຈກ່ຽວກັບການເຄື່ອນໄຫວວຽກງານຄຸ້ມຄອງແຜນການລົງທຶນຂອງລັດຂອງ ສພຊ ນັບມື້ນັບຫຼາຍຂຶ້ນ.

ວັນທີ 20-21 ທັນວານີ້ ທີ່ຫ້ອງປະຊຸມຫ້ອງວ່າການປົກຄອງແຂວງອຸດົມໄຊ ໄດ້ມີກອງປະຊຸມເຝິກອົບຮົມວຽກງານຄຸ້ມຄອງແຜນການລົງທຶນຂອງລັດຂອງສະພາແຫ່ງຊາດ ໃນການສ້າງຄວາມເຂັ້ມແຂງໃຫ້ແກ່ຄະນະນຳຂອງສະພາປະຊາຊົນຂັ້ນແຂວງ 9 ແຂວງພາກເໜືອ ແລະ ພາກກາງ ຄື: ຜົ້ງສາລີ, ຫຼວງນ້ຳທາ, ອຸດົມໄຊ, ບໍ່ແກ້ວ, ຫຼວງພະບາງ, ໄຊຍະບູລີ, ຫົວພັນ, ຊຽງຂວາງ ແລະ ຄຳມ່ວນ ໂດຍການເປັນປະທານຮ່ວມຂອງທ່ານ ນາງ ອຳໄພວອນ ລ້ອມບຸນແພງເລຂາທິການສະພາແຫ່ງຊາດ ແລະ ທ່ານ ຄຳດີ ວົງລ້ອມ ປະທານສະພາປະຊາຊົນແຂວງອຸດົມໄຊ; ເຂົ້າຮ່ວມມີບັນດາທ່ານວິທະຍາກອນຈາກກະຊວງແຜນການ ແລະ ການລົງທຶນ ແລະ ຈາກ ສພຊ ພ້ອມດ້ວຍສຳມະນາກອນຈາກພາກສ່ວນທີ່ກ່ຽວຂ້ອງ ແລະ ແຂກຖືກເຊີນ.

ທ່ານ ນາງ ອຳໄພວອນ ລ້ອມບຸນແພງ ໄດ້ມີຄຳເຫັນເນັ້ນໜັກໃຫ້ຜູ້ເຂົ້າຮ່ວມເອົາໃຈໃສ່ຮັບຟັງ ແລະ ສຸມສະຕິປັນຍາເຂົ້າໃນການຄົ້ນຄວ້າບັນດາເນື້ອໃນທີ່ນໍາມາສະເໜີ ຢ່າງຟົດຟື້ນ, ສ້າງສັນ, ແລກປ່ຽນບົດຮຽນທາງດ້ານທິດສະດີ ແລະ ສົມທຽບໃສ່ການປະຕິບັດວຽກງານຕົວຈິງ; ນອກຈາກບົດຮຽນແລ້ວ, ຍັງມີການສົນທະນາແລກປ່ຽນປະສົບການຕົວຈິງທີ່ໄດ້ພົບພໍ້ມາ ໂດຍສະເພາະແມ່ນການຄຸ້ມຄອງແຜນການລົງທຶນຂອງລັດຢູ່ສະພາປະຊາຊົນແຂວງ. ສະນັ້ນ, ຖ້າມີບັນຫາໃດເພີ່ມຕື່ມ, ເໝາະສົມ ທີ່ນອນຢູ່ໃນຂອບເຂດຄວາມຮັບຜິດຊອບ, ສິດ ແລະ ໜ້າທີ່ ກໍສາມາດນຳມາແລກປ່ຽນບົດຮຽນ ແລະ ສະເໜີຕໍ່ການຈັດຕັ້ງ ເພື່ອຄວາມເຂົ້າໃຈເປັນເອກະພາບຕາມກົດໝາຍ, ນິຕິກໍາທີ່ວາງອອກໃນແຕ່ລະໄລຍະ ແລະ ສະພາບຄວາມເປັນຈິງຂອງວຽກງານສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນໄລຍະໃໝ່.

ຜູ້ເຂົ້າຮ່ວມໄດ້ຮັບຟັງບົດສະເໜີກ່ຽວກັບຂັ້ນຕອນການວາງແຜນການລົງທຶນຂອງລັດ, ເຜີຍແຜ່ຄຳແນະນຳກ່ຽວກັບການຈັດຕັ້ງປະຕິບັດກົດໝາຍວ່າດ້ວຍການລົງທຶນ ສະບັບເລກທີ 889/ກຜທ, ວິທີການຄົ້ນຄວ້າຈັດສັນເພດານງົບ ປະມານລົງທຶນຂອງລັດໃຫ້ບັນດາກະຊວງ-ອົງການ, ກົນໄກ-ວິທີການຄຸ້ມຄອງການລົງທຶນລັດ, ການຕິດຕາມກວດກາ ແລະ ການຢັ້ງຢືນເອກະສານຊຳລະໂຄງການລົງທຶນ; ຄຳແນະນຳວ່າດ້ວຍການຈັດຕັ້ງປະຕິບັດວຽກງານປະເມີນໂຄງການລົງທຶນຂອງລັດ ສະບັບເລກທີ 606/ກຜທ, ຫຼັກວິຊາການຂອງການປະເມີນ, ການປະເມີນໂຄງການສະເໜີໃໝ່, ການປະເມີນຄືນໂຄງການລົງທຶນຂອງລັດໃນກໍລະນີມີການດັດແກ້ ຫຼື ປ່ຽນມູນຄ່າ ທີ່ມີການປ່ຽນແປງດ້ານໂຄງສ້າງຕາມການຢັ້ງຢືນຂອງຂະແໜງການເຕັກນິກ; ບົດຮຽນກ່ຽວກັບການພິຈາລະນາຮັບຮອງ ແລະ ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ກ່ຽວກັບການຈັດສັນງົບປະມານໂຄງການລົງທຶນຂອງລັດ; ບົດຮຽນກ່ຽວກັບການຄຸ້ມຄອງແຜນການລົງທຶນຂອງລັດຂອງຄະນະເລຂາທິການສະພາແຫງຊາດ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPS) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ນາງ ອາລິນ ສຸພິມມະປະດິດ)