(ສພຊ) – ກອງປະຊຸມໃຫຍ່ຄັ້ງທີ II ຂອງກໍາມະບານຮາກຖານກໍາມາທິການວັດທະນະທຳ-ສັງຄົມ (ກວທສ) ໄດ້ຈັດຂຶ້ນຕອນບ່າຍວັນທີ 17 ທັນວາຜ່ານມາ ໂດຍການເປັນປະທານຂອງສະຫາຍ ບຸນສະຫວັນ ໄຊຍະວົງ ປະທານກໍາມະບານຮາກຖານ ກວທສ; ມີສະຫາຍ ດຣ. ບຸນລ້ອມ ແກ້ວບົວໂຮມ ຮອງເລຂາໜ່ວຍພັກຮາກຖານ ກວທສ, ສະຫາຍ ອຳໄພ ຈິດມາຈົນ ປະທານຄະນະບໍລິຫານງານສະຫະພັນກໍາມະບານສະພາແຫ່ງຊາດ (ສພຊ) ແລະ ຕາງໜ້າກໍາມະບານຮາກຖານພາຍໃນ ສພຊ ເຂົ້າຮ່ວມທັງໝົດ 25 ສະຫາຍ, ຍິງ 7 ສະຫາຍ.
ກອງປະຊຸມໄດ້ເຫັນດີເປັນເອກະພາບ ພິຈາລະນາ ແລະ ຮັບຮອງເອົາບົດລາຍງານການເມືອງຂອງກໍາມະບານຮາກຖານກໍາມາທິການວັດທະນະທຳ-ສັງຄົມ ເຊິ່ງປະກອບມີ 2 ພາກຄື: ພາກທີ 1 ຕີລາຄາສະພາບການເຄື່ອນ ໄຫວວຽກງານຂອງກໍາມະບານຮາກຖານ ໃນໄລຍະ 5 ປີຜ່ານມາ (2020-2024), ພາກທີ 2 ທິດທາງແຜນການ 5 ປີ 2025-2029 ພ້ອມກັບການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ; ຮັບຟັງການຜ່ານບົດສໍາຫຼວດການນໍາພາຂອງຄະນະກໍາມະບານຮາກຖານ ກວທສ ກ່ຽວກັບການຊີ້ນໍາ-ນໍາພາຂອງຕົນ ຕໍ່ວຽກງານກໍາມະບານຕະຫຼອດໄລຍະ 5 ປີ ຜ່ານມາ.
ຜູ້ແທນກອງປະຊຸມ 17 ສະຫາຍ, ຍິງ 5 ສະຫາຍ ໄດ້ປະຕິບັດຕາມຫຼັກການປະຊາທິປະໄຕ ໃຊ້ສິດຂອງຕົນປ່ອນບັດຄັດເລືອກເອົາຄະນະກໍາມະບານຮາກຖານ ກວທສ ຊຸດທີ III ເຊິ່ງປະກອບດ້ວຍຜູ້ມີເງື່ອນໄຂຄົບຖ້ວນ 5 ສະຫາຍ, ຍິງ 1 ສະຫາຍ ຄື: ສະຫາຍ ເອລາວັນ ພັນທະວົງ ເປັນປະທານ, ສະຫາຍ ໝອນເພັດ ສີສົມພອນ ເປັນຮອງປະທານ ທັງເປັນປະທານກວດກາ, ສະຫາຍ ວຽງສັກ ຈັນທະວົງ ເປັນຄະນະ ທັງເປັນຮອງປະທານກວດກາ, ສະຫາຍ ບຸນວິເສດ ພອນສະຫວັນ ແລະ ສະຫາຍ ນາງ ຄຳສະຫວັນ ພັນທະລາວົງ ເປັນຄະນະ.
ສະຫາຍ ດຣ. ບຸນລ້ອມ ແກ້ວບົວໂຮມ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນສໍາເລັດການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງກຳມະບານຮາກຖານກຳມາທິການວັດທະນະທຳ-ສັງຄົມ ທີ່ສາມາດຍາດມາໄດ້ໃນໄລຍະ 5 ປີຜ່ານມາ ແລະ ເນັ້ນໜັກໃຫ້ຄະນະກຳມະບານຮາກຖານຊຸດໃໝ່ ເພີ່ມທະວີເອົາໃຈໃສ່ສຶກສາອົບຮົມການເມືອງ-ແນວຄິດ, ຄຸນທາດການເມືອງ, ຄຸນສົມບັດສິນທຳປະຕິວັດ, ມີນຳ້ໃຈຮັກຊາດ, ຮັກລະບອບປະຊາທິປະ ໄຕ, ເປັນແບບຢ່າງທີ່ດີໃນການເຄື່ອນໄຫວວຽກງານ ແລະ ການດຳລົງຊີວິດ; ສືບຕໍ່ກໍ່ສ້າງ, ສ່ອງແສງ, ຕຳນິສົ່ງຂ່າວ, ປົກປ້ອງສິດ ແລະ ຜົນປະໂຫຍດອັນຊອບທຳຂອງສະມາຊິກກຳມະບານ, ສາມາດເປັນພະນັກງານສືບທອດປ່ຽນແທນໄດ້ໃນຕໍ່ໜ້າ ພ້ອມທັງເອົາໃຈໃສ່ຍົກສູງຄວາມຮູ້ ແລະ ຄວາມສາມາດທາງດ້ານວິຊາສະເພາະ, ການນຳໃຊ້ເຕັກໂນໂລຊີໃໝ່ ເພື່ອໝູນໃຊ້ເຂົ້າໃນການປະຕິບັດໜ້າທີ່ວຽກງານຕົວຈິງໃຫ້ຫຼາຍຂຶ້ນກວ່າເກົ່າ; ຈັດຕັ້ງປະຕິບັດຂໍ້ແຂ່ງ ຂັນ 5 ເປັນເຈົ້າຂອງກຳມະບານຮາກຖານ ດ້ວຍຄວາມຮັບຜິດຊອບ ແລະ ໃຫ້ມີຜົນສຳເລັດໃນແຕ່ລະດ້ານແຕ່ລະໄລຍະ; ເຕົ້າໂຮມຄວາມສາມັກຄີພາຍໃນ, ຊຸກຍູ້ ແລະ ຊ່ວຍເຫຼືອເຊິ່ງກັນແລະກັນໃນຍາມຫຍຸ້ງຍາກ ແລະ ປະກອບ ສ່ວນເຂົ້າຮ່ວມກິດຈະກຳ/ຂະບວນການລວມຂອງສະຫະພັນກຳມະບານສະພາແຫ່ງຊາດ ໃຫ້ເປັນປົກກະຕິ.
(ນາງ ກຸກກິກ ບຸດດາໄຊ)