ຕອນເຊົ້າວັນທີ 19 ທັນວາ 2024 ກໍາມາທິການກົດໝາຍ ຂອງສະພາແຫ່ງຊາດ ໄດ້ລົງຕິດຕາມກວດກາ ການຈັດຕັ້ງປະຕິບັດການໂຄສະນາ ແລະ ເຜີຍແຜ່ລັດຖະທໍາມະນູນ ແລະ ກົດໝາຍ ຢູ່ແຂວງຫລວງນ້ຳທາ ນຳໂດຍທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ ພ້ອມດ້ວຍຄະນະ ແລະ ໄດ້ເປີດກອງປະຊຸມໂຄສະນາ ແລະ ເຜີຍແຜ່ລັດຖະທໍາມະນູນ, ກົດໝາຍ ຂຶ້ນທີ່ສະໂມສອນຂອງແຂວງ ໂດຍການເປັນປະທານຂອງທ່ານ ອຳໄພ ຈິດມານົນ ຮອງປະທານກຳມາທິການກົດໝາຍ  ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ,ຫົວໜ້າ, ຮອງຫົວໜ້າພະແນກການທີ່ກ່ຽວຂ້ອງຂອງແຂວງ, ອົງການລັດທຽບເທົ່າຂັ້ນແຂວງ ເຈົ້າຮ່ວມ 80 ທ່ານ, ຍິງ18ທ່ານ

ໃນວາລະກອງປະຊຸມໄດ້ຮັບຟັງການລາຍງານຂອງບັນດາພະແນກການຂອງແຂວງ ກ່ຽວກັບການຈັດຕັ້ງປະຕິບັດການໂຄສະນາເຜີຍແຜ່ ລັດຖະທໍາມະນູນ ແລະ ກົດໝາຍ ໃນໄລຍະຜ່ານມາ ແລະ ຮັບຟັງການລາຍງານຕາມຄຳຖາມເຈາະຈິ້ມເປັນຕົ້ນ; ການໂຄສະນາເຜີຍແຜ່, ເຊື່ອມຊຶມລັດຖະທຳມະນູນ ແລະ ກົດໜາຍຢູ່ພາຍໃນແຂວງ, ດ້ານດີ, ດ້ານອ່ອນ ແລະ ວິທີແກ້ໄຂ, ປັບປຸງລັດະທໍາມະນູນ,ກົດໝາຍ ໃນຂອບເຂດຄວາມຮັບຜິດຊອບຂອງບັນດາພະແນກການຂອງແຂວງ  ເພື່ອໃຫ້ກາຍເປັນເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຜົນສັກສິດ ແລະ ເຂັ້ມງວດ ພ້ອມດຽວກັນຜູ້ແທນກອງປະຊຸມຍັງໄດ້ມີການແລກປ່ຽນປະກອບຄຳຄິດເຫັນ ແລະ ສະເໜີບັນຫາທີ່ພົບຄວາມຫຍຸ້ງຍາກໃນການຈັດຕັ້ງປະຕິບັດພາຍໃນທ້ອງຖິ່ນ ເພື່ອສະເໜີໃຫ້ກຳມາທິການກົດໝາຍ ນໍາຄົ້ນຄວ້າແກ້ໄຂເນື້ອໃນກົດໝາຍທີ່ບໍ່ສອດຄ່ອງກັບສະພາບຕົວຈິງ ເພື່ອຄົ້ນຄວ້າ, ປັບປຸງໃຫ້ສາມາດຈັດຕັ້ງປະຕິບັດໃຫ້ມີຄຸນນະພາບໃນຕໍ່ໜ້າ.