ຕອນເຊົ້າຂອງວັນທີ 17 ທັນວາ 2024 ນີ້ ສະພາປະຊາຊົນແຂວງຫລວງນໍ້າທາ(ສພຂ) ໄດ້ເປີດກອງປະຊຸມຄະນະປະຈຳສະພາປະຊາຊົນແຂວງ ປະຈໍາເດືອນ ທັນວາ 2024 ຂື້ນທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ, ມີຄະນະປະຈຳສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ
ກອງປະຊຸມໄດ້ຮັບຟັງການລາຍງານ ຈາກທ່ານຮອງປະທານສະພາປະຊາຊົນແຂວງ ກ່ຽວກັບການປະຈໍາການແທນທ່ານປະທານສະພາປະຊາຊົນແຂວງ ໃນໄລຍະເຂົ້າຮ່ວມກອງປະຊຸມ ສະໄຫມສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX, ຊຶ່ງໄດ້ຊີ້ນໍາ-ນໍາພາ ບັນດາກົງຈັກພາຍໃນສະພາ ປະຊາຊົນແຂວງ ເຄື່ອນໄຫວວຽກງານຕາມພາລະບົດບາດ ຕິດພັນກັບການກະກຽມ ແລະ ດໍາເນີນກອງປະຊຸມພາຍໃນ ສພຂ; ກອງປະຊຸມ ເຫັນດີໃຫ້ດໍາເນີນກອງປະຊຸມ ຂອງ 3 ຄະນະກໍາມະການ, ກອງປະຊຸມປະຈໍາປີ ຂອງຄະນະ ສສຊ ປະຈໍາເຂດເລືອກຕັ້ງ ແລະ ກອງປະຊຸມສະໄຫມສາມັນເທື່ອທີ 8 ຂອງ ສພຂ ; ສໍາລັບຫນັງສືສະເຫນີ ຂອງທ່ານເຈົ້າແຂວງ ສະບັບເລກທີ 1379/ຈຂ, ລົງວັນທີ 27 ພະຈິກ 2024 ກ່ຽວກັບການດັດແກ້ມູນຄ່າລວມໂຄງການກໍ່ສ້າງໂຮງຮຽນ ມັດຖະຍົມຕອນຕົ້ນຕະເຄິ່ງ ເມືອງນາແລ ແຂວງຫຼວງນໍ້າທາ; ຫນັງສືສະເຫນີ ຂອງທ່ານເຈົ້າແຂວງ ສະບັບເລກທີ 1416/ຈຂ, ລົງວັນທີ 11 ທັນວາ 2024 ກ່ຽວກັບໂຄງການລົງທຶນຂອງລັດ ຮ່ວງກອງທຶນທາງ 20% ປະຈໍາ ປີ 2023 ແລະ ຫນັງສືສະເຫນີ ຂອງທ່ານເຈົ້າແຂວງ ສະບັບເລກທີ 1331/ຈຂ, ລົງວັນທີ 19 ພະຈິກ 2024 ກ່ຽວກັບການດັດແກ້ມູນຄ່າລວມໂຄງການກໍ່ສ້າງໂຮງຮຽນປະຖົມ ລ້ອງແຄນ ເມືອງນາແລ ແຂວງຫຼວງນໍ້າທາ, ກອງປະຊຸມ ມອບໃຫ້ຄະນະກໍາມະການເສດຖະກິດແຜນການ ແລະ ການເງິນ ເຊີນບັນດາພະແນກການກ່ຽວຂ້ອງ ປະຊຸມຮ່ວມກັນ ເພື່ອຢັ້ງຢືນຄວາມຈໍາເປັນ, ເຫດ ແລະ ຜົນ ຂອງການສະເຫນີດັດແກ້ ແລ້ວລາຍງານຄະນະປະຈໍາສະພາປະຊາຊົນແຂວງ ຮັບຊາບຫຼັງກອງປະຊຸມສະໄຫມສາມັນ ເທື່ອທີ 8 ຂອງສະພາປະຊາຊົນແຂວງ; ສໍາລັບ ການສະເຫນີຂອງຄະນະກໍາມະການເສດຖະກິດ, ແຜນການ ແລະ ການເງິນ ກ່ຽວກັບ ການສະເຫນີເອົາເປົ້າຫມາຍຫົວຫນ້າຂະແຫນງເສດຖະກິດຜູ້ໃຫມ່ , ກອງປະຊຸມເຫັນດີໂດຍພື້ນຖານ ມອບໃຫ້ຄະນະເລຂາທິການ ແລະ ຄະນະກໍາມະການເສດຖະກິດ, ແຜນການ ແລະ ການເງິນ ສົມທົບກັບ ພະແນກການ ກ່ຽວຂ້ອງຈັດຕັ້ງປະຕິບັດຕາມລະບຽບການ ແລ້ວລາຍງານຄະນະປະຈໍາຮັບຊາບ; ສໍາລັບເຄື່ອງໄອທີ ທີ່ໄດ້ຮັບການຊ່ວຍເຫຼືອ ຈາກໂຄງການສະເຕັບ, ກອງປະຊຸມມອບໃຫ້ຄະນະເລຂາທິການສະພາປະຊາຊົນແຂວງ ເກັບກໍາສັງລວມ ແລະ ລາຍງານຜົນການແຈກຢາຍ ໃຫ້ຄະນະປະຈໍາສະພາປະຊາຊົນແຂວງ ຮັບຊາບ ເພື່ອມີທິດຊີ້ນໍາ; ການຈັດຕັ້ງປະຕິບັດໂຄງການຈັດຊື້ ແລະ ປັບປຸງຫ້ອງຮັບແຂກ ສະພາປະຊາຊົນແຂວງ ນັ້ນ ມອບໃຫ້ຄະນະຮັບຜິດຊອບ ຈັດຕັ້ງປະຕິບັດໃຫ້ຖືກຕ້ອງຕາມຂັ້ນຕອນ ແລະ ກົດຫມາຍ.
ຕອນທ້າຍ ປະທານກອງປະຊຸມ ໄດ້ເຫນັ້ນຫນັກໃຫ້ບັນດາຄະນະກໍາມະການ, ຄະນະເລຂາທິການ ຈົ່ງເອົາໃຈໃສ່ຈັດຕັ້ງປະຕິບັດວຽກງານທີ່ສໍາຄັນຮີບດ່ວນດັ່ງກ່າວ ໃຫ້ມີຜົນສໍາເລັດຕາມທີ່ໄດ້ ກໍານົດໄວ້ໃນບົດບັນທຶກໃນກອງປະຊຸມຄັ້ງນີ້ ແລະ ມອບໃຫ້ເລຂາທິການສະພາປະຊາຊົນແຂວງ ລາຍງານຜົນ ການຈັດຕັ້ງປະຕິບັດບົດບັນທຶກສະບັບນີ້ ໃນກອງປະຊຸມຄະນະປະຈໍາສະພາປະຊາຊົນແຂວງ ປະຈໍາ ເດືອນ ມັງກອນ 2025.