ໃນລະຫວ່າງວັນທີ 16-17 ທັນວາ 2024 ນີ້ຢູ່ທີ່ສະໂມສອນເມືອງໜອງແຮດ, ໄດ້ເປີດກອງປະຊຸມສຳມະນາວຽກງານຄະນະເລຂາທິການສະພາປະຊາຊົນແຂວງ ຮ່ວມກັບຫ້ອງວ່າການແຂວງ, ບັນ ດາຫ້ອງວ່າການເມືອງ ແລະ ຜູ້ຊ່ວຍວຽກຄະນະສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງຂື້ນ, ໂດຍການເປັນປະທານຂອງ ທ່ານວຽງໄຊ ສີວິໄລ ຮອງປະທານສະພາປະຊາຊົນແຂວງ, ຜູ້ຊີ້ນຳວຽກງານຄະນະເລຂາທິການ;  ເປັນກຽດເຂົ້າຮ່ວມມີ ທ່ານ ບຸນໂຮມ ເທດທານີ ປະທານສະພາປະຊາຊົນແຂວງ ແລະ ບັນດາທ່ານຄະນະປະຈຳສະພາປະຊາຊົນແຂວງ, ຮອງປະທານກຳມະການ, ຮອງເລຂາທິການ, ຮອງຫົວໜ້າຫ້ອງວ່າການແຂວງ, ຫົວໜ້າ-ຮອງຫົວໜ້າຫ້ອງວ່າການເມືອງ, ຜູ້ຊ່ວຍວຽກ ຄະນະສະມາຊິກສະພາປະຊາຊົນແຂວງປະຈຳເມືອງ 7 ເມືອງ ແລະ ພະນັກງານ-ລັດຖະກອນສະພາປະຊາຊົນແຂວງ ເຂົ້າຮ່ວມ.

ກອງປະຊຸມໄດ້ຮັບຟັງການສະຫຼຸບ-ລາຍງານ ກ່ຽວກັບການພົວພັນ, ປະສານງານ ລະຫວ່າງ ຄະນະເລຂາທິການສະພາປະຊາຊົນແຂວງ ແລະ ຫ້ອງວ່າການແຂວງ ຕາມຂໍ້ຕົກລົງຮ່ວມ ສະບັບເລກທີ 352/ຄລຂ, ລົງວັນທີ 23 ທັນວາ 2021, ໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ຂອງຕົນ ໃນການເປັນເສນາທິການໃຫ້ແກ່ການນຳທາງດ້ານ ການກະກຽມກອງປະຊຸມສະໄໝສາມັນແຕ່ລະຄັ້ງຂອງສະພາປະຊາຊົນແຂວງ, ກອງປະຊຸມຮ່ວມ, ກອງປະຊຸມຄະນະປະຈຳ ແລະ ວຽກງານປິ່ນອ້ອມຕ່າງໆ; ກອງປະຊຸມຍັງໄດ້ຮັບຟັງການລາຍງານກ່ຽວກັບ ການພົວພັນປະສານງານ ພາຍໃນສະພາປະຊາຊົນແຂວງ, ຫ້ອງວ່າການແຂວງ ແລະ ຄະນະສະມຊິກສະພາປະຊາຊົນແຂວງ ປະຈຳເມືອງ ໃນການປະສານງານ, ການພົວພັນວຽກງານກັບພາກສ່ວນຕ່າງໆທັງພາຍໃນ ແລະ ພາຍນອກ, ການຈໍລະຈອນເອກະສານຂາເຂົ້າ-ຂາອອກ ແລະ ວຽກງານປິ່ນອ້ອມຕ່າງໆ; ຜ່ານມາເຫັນວ່າມີວຽກງານຫຼາຍດ້ານມີຜົນສຳເລັດ ແລະ ເຮັດໄດ້ດີ ແຕ່ກໍ່ຍັງມີວຽກງານບາງດ້ານຍັງເປັນສິ່ງທ້າທາຍ ທີ່ຜູ້ເຂົ້າຮ່ວມກອງປະຊຸມ ໄດ້ຍົກຂຶ້ນມາສົນທະນາແລກປ່ຽນຄຳຄິດເຫັນເຊິ່ງກັນ ແລະ ກັນ ຢ່າງກົງໄປກົງມາ ໂດຍສະເພາະແມ່ນ ການເປັນເສນາທິການໃຫ້ແກ່ການນຳ ໃນການພິຈາລະນາຮັບຮອງເອົານິຕິກຳທີ່ສຳຄັນຂອງແຂວງ, ການຕົກລົງບັນຫາສຳຄັນພື້ນຖານຂອງແຂວງ, ການກະກຽມໃຫ້ແກ່ດຳເນີນກອງປະຊຸມຕ່າງໆ ເພື່ອໃຫ້ມີຄວາມຮັບປະກັນທາງດ້ານຄຸນນະພາບ ແລະ ທັນຕາມກຳນົດເວລາ.

ໃນຕອນທ້າຍ ທ່ານປະທານກອງປະຊຸມຍັງໄດ້ ຍ້ອງຍໍຊົມເຊີຍຕໍ່ ການພົວພັນປະສານງານ ເຊິ່ງກັນ ແລະ ກັນ ລະຫວ່າງ ຄະນະເລຂາທິການ, ຫ້ອງວ່າການແຂວງ ແລະ ອົງການປົກຄອງເມືອງ ກໍ່ຄື ຜູ້ຊ່ວຍວຽກ ສະມາຊິກສະພາປະຊາຊົນແຂວງ ປະຈຳເມືອງ ໃນໄລຍະຜ່ານມາ ໃນການປະຕິບັດພາລະບົດບາດ, ສິດ ແລະ ໜ້າທີ່ ໃນການເປັນເສນາທິການໃຫ້ແກ່ການນຳມີຜົນສຳເລັດຫຼາຍດ້ານ. ໃນຕໍ່ໜ້າໃຫ້ ແຕ່ລະພາກສ່ວນສືບຕໍ່ ເພິ່ມທະວີຂອດປະສານງານ ເຊິ່ງກັນ ແລະ ກັນ ພາຍໃນ, ພາຍນອກໃຫ້ກົມກຽວຂື້ນກວ່າເກົ່່າ ເພື່ອຮັບປະກັນໃຫ້ແກ່ການເຄື່ອນໄຫວວຽກວຽກງານ ມີປະສິດທິພາບ ແລະ ປະສິດທິຜົນສູງຂື້ນ.

ສະພາປະຊາຊົນແຂວງຊຽງຂວາງ

ຂ່າວໂດຍ: ບຸນສີ ສິດທິເດດ