(ສພຊ) – ທ່ານຮອງປະທານສະພາແຫ່ງຊາດ ສົມມາດ ພົລເສນາ ຕາງໜ້າຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນ ໃນຕອນບ່າຍວັນທີ 04 ທັນວາຜ່ານມາ ກ່ຽວກັບຜົນສໍາເລັດການພິຈາລະນາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ແລະ ແຜນການປະຈໍາປີ 2025 ຂອງອົງການກວດກາແຫ່ງລັດ ແລະ ອົງການກວດສອບແຫ່ງລັດ ເຊິ່ງສາມາດສັງລວມບັນຫາທີ່ພົ້ນເດັ່ນດັ່ງນີ້:
1. ສະມາຊິກສະພາແຫ່ງຊາດ ສະແດງຄວາມຊົມເຊີຍ ແລະ ຕີລາຄາສູງຕໍ່ສອງອົງການ ທີ່ໄດ້ສູ້ຊົນປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຕາມກົດໝາຍຢ່າງຕັ້ງໜ້າ ເຊິ່ງບົດລາຍງານມີຄວາມຊັດເຈນ ແລະ ຈະແຈ້ງກວ່າປີຜ່ານມາ; ສ່ອງແສງໃຫ້ເຫັນຄວາມເອົາຈິງເອົາຈັງ, ຄວາມເຂັ້ມງວດ, ສາມາດແກ້ໄຂປາກົດການຫຍໍ້ທໍ້ໃນຖັນແຖວພະນັກງານລັດ, ຫຼຸດຜ່ອນການລະເມີດກົດໝາຍ, ວິໄນແຜນການ-ການເງິນ ແລະ ເກັບກູ້ຊັບສິນເຂົ້າງົບປະມານແຫ່ງລັດໄດ້ຫຼາຍຂຶ້ນ; ພະນັກງານ-ລັດຖະກອນ ມີສະຕິເຄົາລົບກົດໝາຍ ແລະ ສັງຄົມມີຄວາມເຊື່ອໝັ້ນຕໍ່ການນຳພາຂອງພັກ-ລັດ.
2. ສອງອົງການໄດ້ດຳເນີນການກວດກາ-ກວດສອບເປົ້າໝາຍຕາມແຜນການ ແລະ ເປົ້າໝາຍສະເພາະຕາມການມອບໝາຍຂອງລັດຖະບານ ເປັນຕົ້ນການນຳໃຊ້ເງິນກອງທຶນທາງບໍ່ສອດຄ່ອງກັບດໍາລັດວ່າດ້ວຍກອງທຶນທາງ, ການນຳເຂົ້າພາຫະນະບໍ່ຖືກຕ້ອງຕາມກົດໝາຍ, ການນຳເຂົ້ານ້ຳມັນເຊື້ອໄຟບໍ່ສອດຄ່ອງຕາມກົດໝາຍ, ການຍົກເວັ້ນພາສີ-ອາກອນ, ການຂຸດຄົ້ນແຮ່ທົດລອງບໍ່ປະຕິບັດຄົບເງື່ອນໄຂຕາມນິຕິກຳທີ່ກ່ຽວຂ້ອງ, ບາງເຂດເສດຖະກິດພິເສດ ບໍ່ປະຕິບັດຕາມສັນຍາ; ກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2023 ຍັງພົບເຫັນຫົວໜ່ວຍງົບປະມານ ສືບຕໍ່ລະເມີດ ແລະ ມີລັກສະນະຊໍາເຮື້ອ ເປັນຕົ້ນກວດເຫັນລາຍຮັບ-ລາຍຈ່າຍເພີ່ມ, ໜີ້ຕ້ອງຮັບ, ຈ່າຍລ່ວງໜ້າຄັງເງິນແຫ່ງຊາດ, ການນໍາໃຊ້ງົບປະມານແຫ່ງລັດ, ຊັບສິນຂອງລັດ ແລະ ອື່ນໆ.
3. ໃຫ້ສອງອົງການເອົາໃຈໃສ່ຜັນຂະຫຍາຍມາດຕາຂອງກົດໝາຍໃນຂົງເຂດກວດກາ-ກວດສອບ ເປັນນິຕິກຳໃຕ້ກົດໝາຍ ເພື່ອເປັນເຄື່ອງມື ແລະ ບ່ອນອີງໃນການເຄື່ອນໄຫວວຽກງານ ແລະ ແກ້ໄຂຜົນການກວດກາ-ກວດສອບ ໃຫ້ມີປະສິດທິພາບ ພ້ອມທັງເພີ່ມທະວີໂຄສະນາເຜີຍແຜ່ໃຫ້ເປົ້າໝາຍຖືກກວດກາ-ກວດສອບ, ພະນັກງານ-ລັດຖະກອນ, ທະຫານ, ຕໍາຫຼວດ ແລະ ປະຊາຊົນ ຮັບຮູ້, ເຂົ້າໃຈ ແລະ ພ້ອມກັນຈັດຕັ້ງປະຕິບັດຢ່າງເຂັ້ມງວດ.
4. ການແກ້ໄຂຜົນການກວດກາ-ກວດສອບ ຍັງແກ້ໄຂໄດ້ໜ້ອຍ, ແກ່ຍາວເວລາ, ຜູ້ລະເມີດກໍຍັງບໍ່ທັນໄດ້ຖືກລົງໂທດ ຫຼື ຖືກປະຕິບັດວິໄນ ຢ່າງເຂັ້ມງວດ ເຮັດໃຫ້ສືບຕໍ່ລະເມີດ, ຈຶ່ງສະເໜີໃຫ້ກອງປະຊຸມເທື່ອນີ້ ຄົ້ນຄວ້າມາດຕະການແກ້ໄຂຜົນການກວດກາ-ກວດສອບທີ່ເດັດຂາດ ແລະ ສາມາດຈັດຕັ້ງປະຕິບັດໄດ້ຕໍ່ເປົ້າໝາຍກວດກາ-ກວດສອບ ດ້ວຍການປະເມີນບຸກຄະລາກອນຂອງເປົ້າໝາຍກວດກາ- ກວດສອບ ທີ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ແຕ່ງຕັ້ງ; ໃນການແກ້ໄຂຜົນການກວດກາ-ກວດສອບ ຖ້າມີການແກ້ໄຂກໍຄວນມີການຍ້ອງຍໍຊົມເຊີຍ, ແຕ່ຖ້າບໍ່ມີການແກ້ໄຂ ກໍຄວນພິຈາລະນາການສັບຊ້ອນຍົກຍ້າຍປ່ຽນແທນ; ພ້ອມກັນນັ້ນ, ໃຫ້ສອງອົງການກະກຽມລາຍງານຄວາມຄືບໜ້າການຈັດຕັ້ງປະຕິບັດວຽກງານຂອງຕົນຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ IX.
5. ສະເໜີໃຫ້ສອງອົງການເອົາໃຈໃສ່ຫັນເປັນທັນສະໄໝໃນວຽກງານກວດກາ-ກວດສອບ ເພື່ອເຊື່ອມໂຍງດ້ານຂໍ້ມູນຂ່າວສານກັບເປົ້າໝາຍຖືກກວດກາ-ກວດສອບ, ສາມາດຕິດຕາມຢ່າງເປັນປົກກະຕິ ແລະ ຕໍ່ເນື່ອງ ເຮັດໃຫ້ສາມາດເຫັນບັນຫາ ແລະ ຮ່ວມກັນແກ້ໄຂທັນທີ.
6. ເພື່ອຮັບປະກັນຄຸນນະພາບຂອງວຽກງານກວດກາ-ກວດສອບ, ສະເໜີໃຫ້ສອງອົງການເອົາໃຈໃສ່ກໍ່ສ້າງ ແລະ ຍົກລະດັບພະນັກງານກວດກາ-ກວດສອບ ໃຫ້ມີຄວາມຮູ້, ຄວາມສາມາດ, ມີຈັນຍາບັນ, ຈັນຍາທຳ ແລະ ເປັນມືອາຊີບ ມີຄວາມພ້ອມຕອບສະໜອງກັບວຽກງານໃນໄລຍະໃໝ່ ພ້ອມທັງໃຫ້ການເຝິກອົບຮົມ ແລະ ສຳມະນາ ຖ່າຍທອດບົດຮຽນວຽກງານກວດກາ-ກວດສອບ ໃຫ້ເປົ້າໝາຍຖືກກວດກາ-ກວດສອບ ໃຫ້ຫຼາຍຂຶ້ນ ແລະ ກວ້າງຂວາງ.
7. ມອບໃຫ້ລັດຖະບານຄົ້ນຄວ້າ ແລະ ຈັດສັນງົບປະມານປີ 2025 ໃຫ້ອົງການກວດກາແຫ່ງລັດ ແລະ ອົງການກວດສອບແຫ່ງລັດ ພ້ອມທັງສະໜອງສິ່ງອຳນວຍຄວາມສະດວກ, ອຸປະກອນ-ເຄື່ອງມືຮັບໃຊ້ວຽກງານວິຊາສະເພາະ, ພາຫະນະ ແລະ ອື່ນໆ ເພື່ອຮັບປະກັນໃຫ້ສອງອົງການສາມາດເຄື່ອນໄຫວວຽກງານກວດກາ-ກວດສອບ ຢ່າງເປັນເອກະລາດ, ມີຄຸນນະພາບ ແລະ ມີຜົນສຳເລັດຕາມແຜນການ.