(ສພຊ) – ຕອນສວາຍວັນທີ 5 ທັນວານີ້ ທີ່ສະພາແຫ່ງຊາດ, ສະຫາຍ ຄໍາໃບ ດໍາລັດ ຮອງປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງສະຫາຍ ເຟີ້ຍ ຈື້ຢົງ ຮອງປະທານທີ່ປຶກສາການເມືອງເຂດປົກຄອງຕົນເອງແຂວງກວາງຊີຈວ້າງ ແຫ່ງ ສປຈີນ ພ້ອມດ້ວຍຄະນະ ໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ.
ສະຫາຍ ຄໍາໃບ ດໍາລັດ ໄດ້ສະແດງຄວາມຍິນດີຕ້ອນຮັບ ພ້ອມທັງຕີລາຄາສູງຕໍ່ການຢ້ຽມຢາມ ແລະ ເຮັດວຽກໃນຄັ້ງນີ້ ທີ່ໄດ້ນໍາເອົາໄມຕີຈິດມິດຕະພາບຂອງບັນດາສະຫາຍການນໍາຂັ້ນສູງພັກ, ລັດ ແລະ ປະຊາຊົນຈີນອ້າຍນ້ອງ ມາສູ່ປະຊາຊົນລາວບັນດາເຜົ່າ; ສະແດງຄວາມເປັນເອກະພາບສູງຕໍ່ຜົນການພົບປະເຮັດວຽກຂອງສະຫາຍ ເຟີ້ຍ ຈື້ຢົງ ກັບປະທານກໍາມາທິການວັດທະນະທໍາ-ສັງຄົມ ທີ່ມີຜົນສໍາເລັດຢ່າງຈົບງາມ ແລະ ຫວັງຢ່າງຍິ່ງວ່າຈະສືບຕໍ່ໃຫ້ບົດຮຽນ ແລະ ປະສົບການກ່ຽວກັບການສ້າງນິຕິກໍາຕ່າງໆຂອງ ສປຈີນ ໃນຂົງເຂດການສຶກສາ, ວັດທະນະທຳ ແລະ ຂົງເຂດອື່ນໆ. ພ້ອມກັນນີ້, ກໍສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດການຢ້ຽມຢາມ ແລະ ເຮັດວຽກກັບແນວລາວສ້າງຊາດແຂວງຫຼວງພະບາງ ເພື່ອສືບຕໍ່ຄົ້ນຄວ້າ ແລະ ລົງເລິກການພົວພັນລະຫວ່າງແຂວງຫຼວງພະບາງ ແລະ ແຂວງກວາງຊີຈວ້າງ; ຊຸກຍູ້ການຮ່ວມມືລະຫວ່າງສອງຝ່າຍໃນຂົງເຂດການສຶກສາ, ວັດທະນະທຳ ແລະ ຂົງເຂດອື່ນໆ, ແລະ ເປີດກວ້າງຊ່ອງທາງການແລກປ່ຽນບົດ ຮຽນ-ປະສົບການກັບທ້ອງຖິ່ນຢູ່ແຂວງຫຼວງພະບາງ ທັງເຂົ້າຮ່ວມເປັນສັກຂີພະຍານໃນພິທີລົງນາມໃນຂໍ້ຕົກລົງຂອບການຮ່ວມມືສາມຝ່າຍ ລະຫວ່າງມະຫາວິທະຍາໄລວິທະຍາສາດ ແລະ ເຕັກໂນໂລຊີກຸ້ຍຫຼິນ, ສະຖາບັນເຕັກໂນໂລຊີແຂວງຫຼວງນ້ຳທາ ແລະ ບໍລິສັດ Laos Spacetime Information Intelligent Location Services Technology Co. LTD ເພື່ອຮ່ວມກັນສ້າງ “ໂຄງການຄົ້ນຄວ້າຈີນ-ອາຊຽນ ລາວ” ສູນຂໍ້ມູນເວລາອາວະກາດ ແລະ ບໍລິການສະຖານທີ່ອັດສະລິຍະ ເຊິ່ງເປັນບາດກ້າວທີ່ສໍາຄັນໃນການສົ່ງເສີມ ແລະ ພັດທະນາການສຶກສາ ຢູ່ ສປປລາວ.
ສະຫາຍ ເຟີ້ຍ ຈື້ຢົງ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ຈີນ-ລາວ, ລາວ-ຈີນ ທີ່ພວມແຕກດອກອອກຜົນຍິ່ງຂຶ້ນ; ລາຍງານໂດຍຫຍໍ້ຜົນການພົບປະເຮັດວຽກ ແລະ ແລກປ່ຽນບົດຮຽນຢູ່ ສປປລາວ, ແຈ້ງສະພາບການທີ່ພົ້ນເດັ່ນຂອງເຂດປົກຄອງຕົນເອງແຂວງກວາງຊີຈວ້າງ ແລະ ການປະຕິບັດພາລະບົດບາດຂອງອົງການຕົນ ໃຫ້ຮັບຊາບ.
(ນາງ ອາລິນ ສຸພິມມະປະດິດ)