(ສພຊ) – ຕອນເຊົ້າວັນທີ 03 ທັນວາຜ່ານມາ, ທ່ານຮອງປະທານສະພາແຫ່ງຊາດ ປອ. ນາງ ສູນທອນ ໄຊຍະຈັກ ຕາງໜ້າໃຫ້ຄະນະປະຈຳສະພາແຫ່ງຊາດ ໄດ້ຖະແຫຼງຂ່າວຕໍ່ສື່ມວນຊົນກ່ຽວກັບຜົນສຳເລັດຂອງວຽກງານສະພາແຫ່ງຊາດ ແລະ ການພິຈາລະນາວຽກງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເຊິ່ງມີບາງຕອນທ່ານແຈ້ງໃຫ້ຊາບວ່າ ໃນກອງປະຊຸມເທື່ອນີ້, ສະມາຊິກສະພາແຫ່ງຊາດ (ສສຊ) ໃຫ້ຄວາມສົນໃຈຫຼາຍຕໍ່ວຽກງານຂອງສານປະຊາຊົນ ແລະ ອົງການໄອຍະການປະຊາຊົນ.

ຕໍ່ກັບກັບວຽກງານຂອງສານປະຊາຊົນ: ບັນຫາຈັນຍາບັນ, ຈັນຍາທໍາ, ຄວາມຮັບຜິດຊອບຂອງຜູ້ພິພາກສາ, ພະນັກງານສານຂັ້ນຕ່າງໆ ເຖິງວ່າຕະຫຼອດໄລຍະຜ່ານມາ ທັງສອງອົງການກໍໄດ້ສຸມໃສ່ບໍາລຸງກໍ່ສ້າງທາງດ້ານການເມືອງ-ແນວຄິດ, ຄຸນສົມບັດສິນທໍາປະຕິວັດ ລວມທັງວຽກງານວິຊາສະເພາະ ໃຫ້ແກ່ຜູ້ພິພາກສາ ແລະ ພະນັກງານ ຢ່າງປົກກະຕິ ແຕ່ກໍຍັງເຫັນວ່າຫາງສຽງຂອງສັງຄົມ ກໍຄືຄຳເຫັນຂອງປະຊາຊົນ ຕໍ່ການປະຕິບັດໜ້າທີ່ຂອງຜູ້ພິພາກສາ ແລະ ພະນັກງານສານຂັ້ນຕ່າງໆ ສືບຕໍ່ມີຫຼາຍຢູ່ ໂດຍສະເພາະແມ່ນການຕັດສິນ, ພິພາກສາຄະດີຂອງຜູ້ພິພາກສາ ແລະ ການສັ່ງຟ້ອງຜຸ້ຖືກຫາ ຫຼື ອອກຄໍາສັ່ງຂອງພະນັກງານໄອຍະການ; ການດໍາເນີນຄະດີຂອງສານປະຊາຊົນ ເຖິງວ່າໄດ້ມີການປັບປຸງແບບແຜນວິທີເຮັດວຽກລະອຽດ ແຕ່ກໍຍັງເຫັນວ່າການດໍາເນີນຄະດີຍັງມີຄວາມຊັກຊ້າ, ກາຍກໍານົດເວລາທີ່ກົດໝາຍກໍານົດໄວ້, ການກວດກາຊັ່ງຊາຕີລາຄາຫຼັກຖານ, ການລົງເກັບກໍາຂໍ້ມູນ ແລະ ກວດກາສະຖານທີ່ເກີດຂໍ້ຂັດແຍ້ງຕົວຈິງ, ການໂຕ້ແຍ່ງໂຕ້ຖຽງຢູ່ທີ່ປະຊຸມສານ, ການວິນິດໄສ, ການລົງຄໍາເຫັນບໍ່ທັນຮັບປະກັນຫຼັກການຂອງການດໍາເນີນຄະດີ, ບາງກໍລະນີຍັງບໍ່ທັນຮັບປະກັນຄຸນນະພາບເທົ່າທີ່ຄວນ.

ຕໍ່ກັບວຽກງານຂອງອົງການໄອຍະການປະຊາຊົນ: ການປະຕິບັດພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນ ໃນການຕິດຕາມກວດກາ ຍັງບໍ່ທັນເຂັ້ມງວດ, ເດັດຂາດ ໂດຍສະເພາະການຕິດຕາມກວດ ກາການນໍາໃຊ້ນິຕິກໍາຂອງອົງການລັດ, ການປະຕິບັດກົດໝາຍຂອງເຈົ້າໜ້າທີ່ສືບສວນ-ສອບສວນ, ການປະຕິບັດຄໍາຕັດສິນຂອງສານ ແລະ ອື່ນໆ; ການດໍາເນີນຄະດີບາງກໍລະນີ ຍັງບໍ່ທັນຮອບດ້ານ, ຄົບຖ້ວນ ແລະ ພາວະວິໄສ ເປັນຕົ້ນການສັ່ງຟ້ອງຜູ້ຖືກຫາຂຶ້ນສານ ບໍ່ຄົບຕາມ 4 ອົງປະກອບຂອງການກະທໍາຜິດທາງອາຍາ.

ສສຊ ຍັງໄດ້ມີບາງຂໍ້ສະເໜີ ແລະ ມາດຕະການແກ້ໄຂຕໍ່ການເຄື່ອນໄຫວວຽກງານຂອງທັງສອງອົງການ ໂດຍສະເພາະແມ່ນ: ຖືວຽກງານການບໍາລຸງສ້າງ ແລະ ສ້າງຂີດຄວາມສາມາດໃຫ້ແກ່ຜູ້ພິພາກສາ ແລະ ພະນັກງານໄອຍະການປະຊາຊົນ ເປັນວຽກບຸລິມະສິດ ແລະ ເລືອກເຟັ້ນເນື້ອໃນ ຫຼື ຫົວຂໍ້ໃນການເຝິກອົບຮົມ ໃຫ້ແທດເໝາະກັບຄວາມຕ້ອງການຕົວຈິງ; ເພີ່ມທະວີຄວາມເຂັ້ມງວດໃນການດໍາເນີນຄະດີຕາມກົດໝາຍ ເປັນຕົ້ນກົດໝາຍວ່າດ້ວຍການດໍາເນີນຄະດີແພ່ງ, ການດໍາເນີນຄະດີອາຍາ ຕ້ອງຮັບປະກັນຫຼັກ ການຂອງການດໍາເນີນຄະດີ ຮອບດ້ານ, ຄົບຖ້ວນ ແລະ ພາວະວິໄສ ແລະ ຮັບປະກັນໃຫ້ການດໍາເນີນຄະດີຖືກຕ້ອງຕາມກົດໝາຍ, ຄວາມເປັນຈິງ, ຍຸຕິທໍາ, ມີຄວາມວ່ອງໄວ ແລະ ມີຄຸນນະພາບດີຂຶ້ນ; ເພີ່ມທະວີການປະສານສົມທົບລະຫວ່າງອົງການທີ່ຮັບຜິດຊອບໃນການດໍາເນີນຄະດີ ໃຫ້ເປັນລະບົບ, ກົມກຽວ, ສອດຄ່ອງຕາມພາລະບົດບາດ ແລະ ມີຄວາມເປັນເອກະພາບ ຫຼີກເວັ້ນການກ້າວກ່າຍພາລະບົດບາດ, ສິດ ແລະ ໜ້າທີ່ ເຊິ່ງກັນແລະກັນ ລວມທັງການຊຸກຍູ້, ຕິດຕາມກວດກາການປະຕິບັດບົດບັນທຶກ 4 ພາກສ່ວນ ໃຫ້ເຂັ້ມງວດຂຶ້ນຕື່ມ; ສະເໜີຕໍ່ລັດຖະບານ ຊ່ວຍພິຈາລະນາເງື່ອນໄຂອັນຈໍາເປັນໃນການເຄື່ອນໄຫວ ໂດຍສະເພາະແມ່ນວັດຖຸອຸປະກອນ, ພາຫະນະຮັບໃຊ້ ກໍຄືຈັດສັນງົບປະມານໃຫ້ແກ່ສານປະຊາ ຊົນ ແລະ ອົງການໄອຍະການປະຊາຊົນ ສາມາດເຄື່ອນໄຫວປະຕິບັດຕາມພາລະບົດບາດຂອງຕົນໃນປີ 2025 ໃຫ້ສໍາເລັດຕາມຄາດໝາຍທີ່ວາງໄວ້.