(ສພຊ) – ຕອນເຊົ້າວັນທີ 03 ທັນວາຜ່ານມາ, ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໂດຍການເປັນປະທານຂອງທ່ານ ສົມມາດ ພົລເສນາ ຮອງປະປະທານສະພາແຫ່ງຊາດ, ທ່ານ ນາງ ວັດທະນາ ດາລາລອຍ ຮັກສາການຜູ້ວ່າການທະນາຄານ ແຫ່ງ ສປປລາວ ໄດ້ລາຍງານກ່ຽວກັບຄວາມຈຳເປັນໃນການປັບປຸງກົດໝາຍວ່າດ້ວຍທະນາຄານ ແຫ່ງ ສປປລາວ ເຊິ່ງທ່ານລາຍງານໃຫ້ຮູ້ວ່າ: ການປັບປຸງກົດໝາຍວ່າດ້ວຍທະນາຄານ ແຫ່ງ ສປປລາວ ແມ່ນຕິດພັນວາລະແຫ່ງຊາດເພື່ອແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຊິ່ງທະນາຄານແຫ່ງ ສປປລາວ ໄດ້ເລີ່ມຄົ້ນຄວ້າແຕ່ທ້າຍປີ 2023 ໂດຍດຳເນີນຕາມຂັ້ນຕອນຂອງກົດໝາຍວ່າດ້ວຍການສ້າງນິຕິກຳ ເປັນຕົ້ນການກໍານົດທິດທາງໃນການປັບປຸງກົດໝາຍ, ການສຶກສາຄົ້ນຄວ້ານິຕິກຳທີ່ຕິດພັນ ແລະ ບົດຮຽນຂອງປະເທດອ້ອມຂ້າງເຊັ່ນ: ຫວຽດນາມ, ກຳປູເຈຍ, ຈີນ, ສິງກະໂປ ແລະ ໄທ ພ້ອມທັງທາບທາມຄວາມເຫັນເປີດກວ້າງຢູ່ພາກເໜືອ, ພາກກາງ ແລະ ພາກໃຕ້ ເຊິ່ງມີຜູ້ເຂົ້າຮ່ວມ 210 ທ່ານ; ຈາກນັ້ນ, ໄດ້ສະເໜີຕໍ່ກອງປະຊຸມລັດຖະບານໃນເດືອນສິງຫາ 2024 ແລະ ໃນເດືອນກັນຍາ ກໍໄດ້ເຮັດວຽກຮ່ວມກັບກໍາມາທິການທີ່ກ່ຽວຂ້ອງຂອງສະພາແຫ່ງຊາດ ໃນການກວດກາເນື້ອໃນຮອບດ້ານຕໍ່ຮ່າງກົດໝາຍສະບັບດັ່ງກ່າວ ແລະ ນຳເອົາຮ່າງກົດໝາຍສະເໜີຕໍ່ກອງປະຊຸມຍົກສູງຄຸນນະພາບທາງດ້ານເນື້ອໃນໃນກາງເດືອນພະຈິກຜ່ານມາ ເພື່ອທາບທາມຄຳເຫັນນຳບັນດາທ່ານສະມາຊິກສະພາແຫ່ງຊາດ.

ທ່ານ ນາງ ວັດທະນາ ດາລາລອຍ ກ່າວຕື່ມວ່າ: ພາຍຫຼັງກົດໝາຍສະບັບນີ້ໄດ້ຮັບການປັບປຸງ ແລະ ປະກາດໃຊ້, ຄາດວ່າຈະມີຜົນໄດ້ຮັບຄື: ເຮັດໃຫ້ມີບ່ອນອີງດ້ານນິຕິກຳທີ່ໜັກແໜ້ນ ໃນການຈັດຕັ້ງປະຕິບັດວຽກງານຂອງທະນາຄານ ແຫ່ງ ສປປລາວ ໃຫ້ສາມາດຮັບປະກັນສະຖຽນລະພາບທາງດ້ານເງິນຕາ, ສະຖາບັນການເງິນມີຄວາມເຂັ້ມແຂງ, ລະບົບການຊຳລະມີຄວາມທັນສະໄໝ ແລະ ປອດໄພ ສາມາດເຊື່ອມໂຍງກັບພາກພື້ນ ແລະ ສາກົນ; ມີກົງຈັກການຈັດຕັ້ງທີ່ເປັນລະບົບຄົບຊຸດ ແລະ ສົມຄູ່ກັບການຈັດຕັ້ງປະຕິບັດພາລະບົດບາດເປັນເສນາທິການໃຫ້ແກ່ລັດຖະບານ ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ; ຈັດຕັ້ງປະຕິບັດວຽກງານການເງິນ ແລະ ການບັນຊີ ຢ່າງເປັນລະບົບ ໃຫ້ສອດຄ່ອງກັບຈຸດພິເສດ, ຄຸນລັກສະນະ ແລະ ການເຄື່ອນໄຫວວຽກງານຂອງທະນາຄານ ແຫ່ງ ສປປລາວ ກໍຄືການເຄື່ອນໄຫວຂອງທະນາຄານກາງ ໃນພາກພື້ນ ແລະ ສາກົນ.