ເພື່ອເຮັດໃຫ້ການຕິດຕາມກວດກາຕາມພາລະບົດບາດ, ສິດ  ແລະ ໜ້າທີ່ຕາມກົດໝາຍວ່າດ້ວຍສະພາປະຊາຊົນແຂວງ ໃນລະຫວ່າງວັນທີ 28-29 ພະຈິກ 2024 ຄະນະກໍາມະການວັດທະນາທໍາ-ສັງຄົມ ແລະ ບັນດາເຜົ່າ ຂອງສະພາປະຊາຊົນເເຂວງ (ສພຂ) ໄດ້ລົງຕິດຕາມກວດກາການຈັດຕັ້ງປະຕິບັດວຽກງານພັດທະນາຊັບພະຍາກອນມະນຸດ ຂອງແຂວງຫລວງນ້ຳທາ ຂຶ້ນທີ່ຫ້ອງປະຊຸມເມືອງວຽງພູຄາ ໂດຍພາຍໃຕ້ການເປັນປະທານຂອງທ່ານ ນາງ ອຸ່ນຫລ້າ ອ້ຽງລໍລາດ ຮອງປະທານ ສພຂ ຜູ້ຊີ້ນໍາວຽກງານຂົງເຂດວັດທະນາທໍາ-ສັງຄົມ ແລະ ບັນດາເຜົ່າ ມີສະມາຊິກ ສພຂ ປະຈຳເຂດເລືອກຕັ້ງເມືອງ, ຫົວໜ້າ,ຮອງຫົວໜ້າພະແນກການຂົງເຂດວັດທະນາທໍາ-ສັງຄົມຂອງແຂວງ, ຫົວໜ້າ,ຮອງຫົວໜ້າຫ້ອງການທີ່ກ່ຽວຂ້ອງຂອງເມືອງເຂົ້າຮ່ວມ 22 ທ່ານ, ຍິງ 5 ທ່ານ.

ການລົງຕິດຕາມກວດກາຄັ້ງນີ້ ໄດ້ຮັບຟັງການລາຍງານຂອງພະແນກສຶກສາທິການ ແລະ ກິລາແຂວງ ກ່ຽວກັບແຜນພັດທະນາຊັບພະຍາກອນມະນຸດ 5 ປີຄັ້ງທີ IX (2021-2025) ແຂວງ ແລະ ການພັດທະນາຄວາມຮູ້ພຶ້ນຖານດ້ານການສຶກສາ ແລະ ທັກສະວະຊາຊີບ; ການລາຍງານຂອງຄະນະຈັດຕັ້ງແຂວງ ກ່ຽວກັບການກໍ່ສ້າງ ແລະ ຄຸ້ມຄອງພະນັກງານ-ລັດຖະກອນຂອງແຂວງ ໃຫ້ມີປະສິດທິພາບ ແລະ ປະສິດທິຜົນ; ລາຍງານພະແນກຖະແຫຼງຂ່າວ-ວັດທະນາທໍາ ແລະ ທ່ອງທ່ຽວແຂວງ ກ່ຽວກັບການອານຸລັກ ແລະ ສົ່ງເສີມຄຸນຄ່າອັນດີງາມຂອງຊາດໃຫ້ທົ່ວປວງຊົນ; ຮັບຟັງການລາຍງານຂອງພະແນກແຮງງານ ແລະ ສະຫວັດດີການສັງຄົມແຂວງ ກ່ຽວກັບການພັດທະນາແຮງງານ ແລະ ເພີ່ມຜະລິດຕະພາບແຮງງານເພື່ອຕອບສະໜອງຄວາມຕ້ອງການຂອງຕະຫລາດແຮງງານແຕ່ລະໄລຍະ ແລະ ຮັບຟັງການປະຕິບັດບົດບາດການຕິດຕາມກວດກາຂອງສະພາປະຊາຊົນແຂວງກ່ຽວກັບວຽກງານພັດທະນາຊັບພະຍາກອນມະນຸດພາຍໃນເມືອງ ພ້ອມດຽວກັນ ຍັງໄດ້ຮັບຟັງການລາຍງານຕາມຄຳຖາມເຈາະຈິ້ມຂອງຄະນະກຳມະການວັດທະນາທໍາ-ສັງຄົມ ແລະ ບັນດາເຜົ່າ ຂອງ ສພຂ ແລະ ຜູ້ແທນກອງປະຊຸມໄດ້ແລກປ່ຽນປະກອບຄໍາຄິດເຫັນຕໍ່ວຽກກງານຂົງເຂດຂອງຕົນຢ່າງມີຈຸດສຸມ ເພື່ອເຮັດໃຫ້ການຈັດຕັ້ງປະຕິບັດວຽກງານຂົງເຂດຕົນພາຍໃນແຂວງ, ເມືອງ ໃຫ້ມີຄຸນນະພາບ, ຖຶກຕ້ອງຕາມກົດໝາຍ ແລະ ຮັບຜົນສໍາເລັດຕາມລະດັບຄາດໝາຍ.

ກອງປະຊຸມຄັ້ງນີ້ ໄດ້ຮັບການສະໜັບສະໜູນຈາກ ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ (STEPS)

ພາບຂ່າວ ວັນນີ ແຝງບົວວັນ