(ສພຊ) – ທ່ານ ນາງ ມີນາພອນ ໄຊສົມພູ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 17 ແຂວງອັດຕະປື ໄດ້ມີຄຳເຫັນແລກປ່ຽນຕໍ່ບົດລາຍງານຂອງລັດຖະບານ ໃນວັນທີ 18 ພະຈິກ 2024 ຄື: ບັນຫາທີ 1 ບົດລາຍງານຂອງລັດຖະບານ ໄດ້ຕີລາຄາວ່າສາເຫດທີ່ພາໃຫ້ສະພາບຄວາມຫຍຸ້ງຍາກທາງດ້ານເສດຖະກິດ-ການເງິນທີ່ບໍ່ໄດ້ຮັບການແກ້ໄຂດີເທົ່າທີຄວນ ເນື່ອງມາຈາກສາມປັດໄຈ: 1. ຄວາມຮັບຜິດຊອບຕໍ່ໜ້າທີ່ການເມືອງຂອງພະນັກງານ-ລັດຖະກອນຈຳນວນໜຶ່ງ ຍັງບໍ່ທັນສູງ, 2. ການຫັນປ່ຽນບຸກທະລຸທາງດ້ານຈິນຕະນາການ ກໍຄືການຫັນປ່ຽນໄປສູ່ອັນໃໝ່ທີ່ດີກວ່າເກົ່າ ຍັງຊັກຊ້າ, 3. ກົນໄກບໍລິຫານ, ການຄຸ້ມຄອງຍັງບໍ່ທັນຄ່ອງຕົວ; ການແກ້ໄຂ 3 ປັດໄຈດັ່ງກ່າວນີ້ ສະເໜີລັດຖະບານສືບຕໍ່ນຳໃຊ້ມາດຕະການບັງຄັບທີ່ໄດ້ວາງອອກໃນໄລຍະຜ່ານມາ ໃຫ້ປາກົດຜົນເປັນຈິງ ແລະ ເປັນຮູບປະທຳຫຼາຍຂຶ້ນກວ່າເກົ່າ ເພື່ອກຽມພ້ອມໃນການຈັດຕັ້ງປະຕິບັດມະຕິສະບັບເລກທີ 04/ກມສພ, ລົງວັນທີ 11 ເມສາ 2024 ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ ຫຼື ສອຈ ໃຫ້ປາກົດຜົນເປັນຈິງ.

ບັນຫາທີ 2 ເຖິງວ່າຈະມີການຈັດເກັບລາຍຮັບງົບປະມານໄດ້ຕາມແຜນການ ຫຼື ລື່ນແຜນການ, ແຕ່ຍັງມີບາງຮ່ວງລາຍຮັບ ບໍ່ທັນບັນລຸຕາມແຜນທີ່ໄດ້ກຳນົດໄວ້ ໂດຍສະເພາະເປັນລາຍຮັບທີ່ມີຄວາມຍືນຍົງ ເປັນຕົ້ນແມ່ນຄ່າທຳນຽມທາງ, ອາກອນທີ່ດິນ, ອາກອນມອບເໝົາ; ສະເພາະຢູ່ແຂວງອັດຕະປື ສາມາດຊອກສາເຫດໄດ້ກໍມີບາງສາເຫດຕົ້ນຕໍຄືແນວນັ້ນ ແລະ ໄລຍະນີ້ ເປັນໄລຍະທີ່ລໍຖ້າການປະຕິບັດຕາມກົດໝາຍວ່າດ້ວຍອາກອນທີ່ດິນສະບັບປັບປຸງໃໝ່ ຍ້ອນເຫດຜົນວ່າການແຈ້ງການໃນການປະຕິບັດ ຫຼືວ່າໃຫ້ທ້ອງຖິ່ນປະຕິບັດ ມີຄວາມຊັກຊ້າ ຈົນຮອດເດືອນ 7 ຈຶ່ງໄດ້ແຈ້ງໄປ. ສະນັ້ນ, ການຈັດຕັ້ງປະຕິບັດຈຶ່ງມີຄວາມຊັກຊ້າຕື່ມ. ອີກບັນຫາໜຶ່ງ, ການປ້ອນຂໍ້ມູນທີ່ດິນໃນລະບົບເຕັກນິກມີຄວາມຫຍຸ້ງຍາກ ເຮັດໃຫ້ຜູ້ຊົມໃຊ້ພາຫະນະ ແລະ ຜູ້ຄອບຄອງສິດນຳໃຊ້ທີ່ດິນ ມີລັກສະນະສັບສົນ ບວກກັບເປົ້າໝາຍຈຳນວນໜຶ່ງຍັງບໍ່ທັນຈິງໃຈປະກອບສ່ວນ, ຫຼົບຫຼີກຄ່າທຳນຽມທາງ, ບໍ່ແຈ້ງຄ່າພາສີທີ່ດິນ ກໍຍັງມີຫຼາຍ ແຕ່ມາດຕະການປະຕິບັດຕໍ່ເປົ້າໝາຍດັ່ງກ່າວນັ້ນ ຍັງມີຈຳກັດຢູ່ ລວມທັງສິ່ງອຳນວຍຄວາມສະດວກຕໍ່ວຽກງານຈັດເກັບລາຍຮັບບໍ່ທັນພຽງພໍ ເປັນຕົ້ນແຜນງົບປະມານ ແລະ ອຸປະກອນອື່ນໆ ຍັງບໍ່ທັນພຽງພໍທີ່ຈະຕອບສະໜອງຕໍ່ການຈັດເກັບລາຍຮັບ ແລະ ການຫັນເປັນທັນສະໄໝໃນການຈັດເກັບລາຍຮັບ, ການຄຸ້ມຄອງລາຍຈ່າຍ ເຊິ່ງມີຄວາມສຳຄັນຫຼາຍ ຈຶ່ງສະເໜີລັດຖະບານເບິ່ງຄືນຊ່ວຍທ້ອງຖິ່ນຕື່ມອີກ, ນຳໃຊ້ທຸກຮູບການມາດຕະການ; ບ່ອນທີ່ມີເງື່ອນໄຂ ກໍຂໍໃຫ້ໄດ້ຮັບການຈັດຕັ້ງປະຕິບັດ, ບໍ່ໃຫ້ກັບຄືນເກັບຄືເກົ່າໄດ້ບໍ່? ເພາະວ່າເຄື່ອງທັນສະໄໝ ກໍຢາກໃຫ້ທັນສະໄໝໄປເລີຍ ບໍ່ຢາກໃຫ້ກັບໄປກັບມາ, ຕ້ອງໄດ້ລົງທຶນໃສ່ວຽກງານນີ້ຫຼາຍແດ່ ເພື່ອເຮັດໃຫ້ການຈັດເກັບລາຍຮັບໄດ້ດີ.

ບັນຫາສຸດທ້າຍແມ່ນພາກສະເໜີຕໍ່ລັດຖະບານ: 1. ລາຍຮັບຂອງແຂວງທີ່ສູນກາງເກັບຊ່ວຍທີ່ຍັງບໍ່ທັນໄດ້ເຄື່ອນຍ້າຍໃຫ້ແຂວງ, ຈິດໃຈຢາກໃຫ້ທາງສູນກາງເຄື່ອນຍ້າຍໃຫ້ແຂວງ ເພາະວ່າແຂວງມີຄວາມຈຳເປັນໃນການນຳໃຊ້ເງິນດັ່ງກ່າວເຂົ້າໃນວຽກທີ່ຈຳເປັນຂອງແຂວງ; 2. ໃຫ້ລັດຖະບານເບິ່ງຄືນ ເພາະວ່າກອງປະຊຸມສະໄໝສາມັນເທື່ອທີ 7 ກໍໄດ້ສະເໜີແລ້ວ, ໜີ້ຄ້າງຈົດຮັບ-ຈົດຈ່າຍຂອງບໍລິສັດ ຮວ່າງແອັງ ທີ່ຕິດພັນກັບໂຄງການສະໜາມບິນສາກົນອັດຕະປື ເຫັນວ່າຍັງບໍ່ທັນໄດ້ຮັບການຈັດຕັ້ງປະຕິບັດເທື່ອ.