(ສພຊ) – ທ່ານ ຄຳຟອງ ອິນມານີ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 3 ແຂວງຫຼວງນ້ຳທາ ໄດ້ມີຄຳເຫັນຕໍ່ບົດລາຍງານຂອງລັດຖະບານ ໃນວາລະການດຳເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເມື່ອວັນທີ 18 ພະຈິກ 2024 ເຊິ່ງມີເນື້ອໃນບາງຕອນວ່າ: ແຂວງຫຼວງນ້ຳທາ ມີໂຄງການເປົ້າໝາຍສະເພາະຂອງລັດຖະບານ ຄືເສັ້ນທາງປູຢາງ 2 ຊັ້ນ ຈາກເທດສະບານແຂວງໄປຮອດເມືອງວິລະຊົນ ກໍຄືເມືອງນາແລ, ຜ່ານການຈັດຕັ້ງປະຕິບັດ ແຂວງໄດ້ສະເໜີດັດແກ້ຫົວໜ່ວຍລາຄາໃຊ້ເວລາດົນພໍສົມຄວນ ມາຮອດປັດຈຸບັນກໍບໍ່ທັນໄດ້ດັດແກ້ເທື່ອ, ມູນຄ່າໂຄງການທີ່ສະເໜີດັດແກ້ໄລຍະນັ້ນ ມາຮອດປັດຈຸບັນ ບາງເທື່ອອາດຈະເປັນໄປບໍ່ໄດ້ອີກແລ້ວ. ສະນັ້ນ, ຈຶ່ງຂໍສະເໜີໃຫ້ລັດຖະບານຮີບຮ້ອນດັດແກ້ງົບປະມານໂຄງການດັ່ງກ່າວຄືນ ເພື່ອສາມາດຈັດຕັ້ງປະຕິບັດໃຫ້ສຳເລັດໂດຍໄວ; ນອກຈາກຈະດັດແກ້ແລ້ວ, ກໍຂໍໃຫ້ສືບຕໍ່ຈັດສັນງົບປະມານໃຊ້ວຽກທີ່ຈັດຕັ້ງປະຕິບັດສຳເລັດຕາມຕົວຈິງທີ່ພວກເຮົາໄດ້ເຮັດກ່ອນ, ຜ່ານມາຈັດສັນຂອນຂ້າງໜ້ອຍ.

ສະເໜີລັດຖະບານຮີບຮ້ອນກວດກາ ແລະ ລົງທຶນໃສ່ການກໍ່ສ້າງພື້ນຖານໂຄງລ່າງ ໂດຍສະເພາະແມ່ນເຂດເຊື່ອມຕໍ່ເຊື່ອມຈອດລະຫວ່າງແຂວງຫຼວງນ້ຳທາຫາຊາຍແດນບໍ່ເຕັນ, ຈາກບໍ່ເຕັນໄປຮອດນາເຕີຍຫາເສັ້ນທາງລົດໄຟ ເຊິ່ງຈຸດດັ່ງກ່າວເສັ້ນທາງເປ່ເພຫຼາຍທີ່ສຸດ; ດ່ານບໍ່ເຕັນ ເປັນດ່ານພາສີໜຶ່ງທີ່ເກັບລາຍງານເຂົ້າງົບປະມານຫຼາຍພໍສົມຄວນ ມາຮອດເດືອນ 10 ປີນີ້ ເກີນ 656 ກວ່າຕື້ກີບແລ້ວ, ສະນັ້ນ ຖ້າເຮົາສຸມໃສ່ແກ້ໄຂພື້ນຖານໂຄງລ່າງ ເຊື່ອວ່າການຈັດເກັບລາຍຮັບງົບປະມານຈະໄດ້ຫຼາຍກວ່າ.