(ສພຊ) – ການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໃນຕອນເຊົ້າວັນທີ 21 ພະຈິກນີ້ ໂດຍການເປັນປະທານຂອງທ່ານ ພົທ. ສຸວອນ ເລືອງບຸນມີ ຮອງປະທານສະພາແຫ່ງຊາດ; ທ່ານ ວິໄລວົງ ບຸດດາຄຳ ລັດຖະມົນຕີກະຊວງພາຍໃນ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານ 3 ສ້າງ ຕາມມະຕິ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ເຊິ່ງການຈັດຕັ້ງປະຕິບັດນະໂຍບາຍ 3 ສ້າງ ໄດ້ປະກອບສ່ວນອັນສໍາຄັນເຂົ້າໃນຜົນສໍາເລັດລວມຂອງການພັດທະນາເສດຖະກິດ-ສັງຄົມ, ການປ້ອງກັນຊາດ-ປ້ອງກັນຄວາມສະຫງົບ ເປັນຢ່າງດີ; ຊີວິດການເປັນຢູ່ຂອງປະຊາຊົນຢູ່ແຕ່ລະທ້ອງຖິ່ນໄດ້ຮັບການປັບປຸງປົວແປງໃຫ້ດີຂຶ້ນເປັນກ້າວໆ; ຊັບພະຍາກອນທໍາມະຊາດ, ສິ່ງແວດລ້ອມ, ວັດທະນະທໍາ, ຮີດຄອງປະເພນີອັນດີງາມຂອງປະຊາຊົນບັນດາເຜົ່າ ໄດ້ຮັບການອານຸລັກ ແລະ ເສີມຂະຫຍາຍ ດ້ວຍການດໍາເນີນນະໂຍບາຍຂອງບັນດາຂະແໜງການຂອງລັດທີ່ກ່ຽວຂ້ອງ. 3 ສ້າງ ແມ່ນວຽກງານຍຸດທະສາດ ທັງສະເພາະໜ້າ ແລະ ຍາວນານ, ບໍ່ແມ່ນເຮັດມື້ໜຶ່ງຍາມດຽວ, ເຮັດບັ້ນໜຶ່ງສອງບັ້ນ ແລ້ວຢຸດເຊົາ; ຫາກແມ່ນຕ້ອງດໍາເນີນໄປຢ່າງເປັນລະບົບຕໍ່ເນື່ອງ, ມີການຕິດຕາມກວດກາ, ຊຸກຍູ້, ສະຫຼຸບຖອດຖອນບົດຮຽນເປັນແຕ່ລະໄລຍະ ແລະ ຍົກລະດັບຂຶ້ນເທື່ອລະກ້າວ.

ຕາມວາລະຂອງກອງປະຊຸມ, ທ່ານ ຄຳຈັນ ໂສຕາປະເສີດ ປະທານກຳມາທິການບັນດາເຜົ່າ ຕາງໜ້າຄະນະປະຈໍາສະພາແຫ່ງຊາດ ໄດ້ປະກອບຄໍາເຫັນຕໍ່ບົດລາຍງານດັ່ງກ່າວ, ປະທານກອງປະຊຸມໄດ້ເຈາະຈີ້ມ ແລະ ໃຫ້ທິດຊີ້ນຳແກ່ບັນດາທ່ານສະມາຊິກສະພາແຫ່ງຊາດ (ສສຊ) ໃນການຄົ້ນຄວ້າປະກອບຄໍາເຫັນຢ່າງມີຈຸດສຸມຕໍ່ບົດລາຍງານ ພ້ອມທັງສະເໜີບັນດາທ່ານ ສສຊ ມີຄໍາຊັກຖາມເພີ່ມຕື່ມຕໍ່ບັນຫາທີ່ຍັງມີຄວາມສົນໃຈ; ຈາກນັ້ນ, ທ່ານ ວິໄລວົງ ບຸດດາຄຳ ກໍໄດ້ຊີ້ແຈງກັບທີ່ ເພື່ອໃຫ້ຄວາມກະຈ່າງແຈ້ງຕໍ່ບັນດາຄໍາຊັກຖາມ. ທ່ານ ນາງ ທັດສະດາພອນ ຈັນທະມາດ ຮອງປະທານກໍາມາທິການບັນດາເຜົ່າ ໄດ້ສະເໜີຮ່າງມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດວຽກງານ 3 ສ້າງ ຕາມມະຕິ 02/ສພຊ, ລົງວັນທີ 28 ມັງກອນ 2016; ເພື່ອເຮັດໃຫ້ເນື້ອໃນຂອງຮ່າງມະຕິດັ່ງກ່າວມີຄວາມສົມບູນ, ປະທານກອງປະຊຸມໄດ້ສະເໜີບັນດາທ່ານ ສສຊ ປະກອບຄໍາເຫັນໃສ່ເນື້ອໃນຮ່າງມະຕິຢ່າງມີຈຸດສຸມ; ຈາກນັ້ນ, ປະທານກອງປະຊຸມໄດ້ສະຫຼຸບສັງລວມການປະກອບຄໍາເຫັນຕໍ່ຮ່າງມະຕິດັ່ງກ່າວ.

(ນາງ ອາລິນ ສຸພິມມະປະດິດ)