(ສພຊ) – ວັນທີ 21 ພະຈິກນີ້ ທີ່ສະພາແຫ່ງຊາດ, ສະຫາຍ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບຂອງສະຫາຍ ຊູ ຮົງຊາຍ ຫົວໜ້າຄະນະກໍາມາທິການວຽກງານງົບປະມານ ຂອງສະພາຜູ້ແທນປະຊາຊົນທົ່ວປະເທດຈີນ ພ້ອມດ້ວຍຄະນະ ໃນໂອກາດທີ່ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ ລະຫວ່າງວັນທີ 20-22 ພະຈິກ 2024.

ສະຫາຍ ປອ. ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ພ້ອມທັງຕີລາຄາສູງຕໍ່ການຢ້ຽມຢາມ ແລະ ເຮັດວຽກໃນຄັ້ງນີ້ ທີ່ໄດ້ນໍາເອົາໄມຕີຈິດມິດຕະພາບຂອງບັນດາສະຫາຍການນໍາຂັ້ນສູງພັກ, ສະພາຜູ້ແທນປະຊາຊົນ, ລັດຖະບານ ແລະ ປະຊາຊົນຈີນອ້າຍນ້ອງ ມາສູ່ປະຊາຊົນລາວບັນດາເຜົ່າ ທັງເປັນການໃຫ້ບົດຮຽນແກ່ສະພາແຫ່ງຊາດລາວ ກ່ຽວກັບວຽກງານງົບປະມານ ແລະ ການເງິນ ເຊິ່ງເປັນການປະກອບສ່ວນຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ແລະ ການເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ, ຈີນ-ລາວ ໃຫ້ນັບມື້ເປັນຮູບປະທຳ ແລະ ແຕກດອກອອກຜົນຍິ່ງໆຂຶ້ນ.

ສະຫາຍ ຊູ ຮົງຊາຍ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ພ້ອມທັງລາຍງານຜົນການພົບປະເຮັດວຽກ ແລະ ແລກປ່ຽນບົດຮຽນກັບກໍາມາທິການແຜນການ, ການເງິນ ແລະ ການກວດສອບ; ແຈ້ງສະພາບການທີ່ພົ້ນເດັ່ນໂດຍຫຍໍ້ຂອງ ສປຈີນ ແລະ ການປະຕິບັດພາລະບົດບາດຂອງກໍາມາທິການວຽກງານງົບປະມານ ກໍຄືສະພາຜູ້ແທນປະຊາຊົນທົ່ວປະເທດຈີນ ໃຫ້ຮັບຊາບ.

(ນາງ ອາລິນ ສຸພິມມະປະດິດ)