(ສພຊ) ໃນວັນທີ 6 ມັງກອນ 2022 ທີ່ຫ້ອງປະຊຸມເບີ 1 ແຂວງຄຳມ່ວນ, ທ່ານ ສຈ.ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດແຫ່ງຊາດ (ສພຊ) ທັງເປັນປະທານກໍາມາທິການກົດໝາຍພ້ອມດ້ວຍຄະນະ      ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄໍາມ່ວນ ໂດຍການຕ້ອນຮັບຂອງ ທ່ານ ບຸນມີ ພິມມະສອນ ປະທານ  ສພຂ ຄໍາມ່ວນ; ມີບັນດາທ່ານຄະນະປະຈໍາ ສພຂ, ຮອງເຈົ້າແຂວງ, ຄະນະສະມາຊິກສະພາແຫ່ງຊາດປະຈໍາເຂດຕັ້ງເລືອກຕັ້ງທີ 12 ແຂວງຄໍາມ່ວນ ແລະ ອົງການປົກຄອງແຂວງ ພ້ອມດ້ວຍບັນດາຫົວໜ້າພະແນກການທີ່ກ່ຽວຂ້ອງຂອງແຂວງເຂົ້າຮ່ວມ

        ຈຸດປະສົງຂອງການເຄື່ອນໄຫວຄັ້ງນີ້ ເພື່ອຕິດຕາມກວດກາ ການປະຕິບັດກົດໝາຍແລະ ໂຄສະນາເຜີຍແຜ່ບາງກົດໝາຍຢູ່ແຂວງຄໍາມ່ວນ, ໃນກອງປະຊຸມ ທ່ານ ບຸນມີ ພິມມະສອນ ໄດ້ກ່າວຕ້ອນຮັບ ແລະລາຍງານການຈັດຕັ້ງປະຕິບັດວຽກງານຂອງ ສພຂ ໃນໄລຍະຜ່ານມາ ເປັນຕົ້ນແມ່ນຜົນສຳເລັດຂອງກອງປະຊຸມຄັ້ງປະຖົມມະລຶກຂອງ ສພຂ ຊຸດທີ II ແລະ ການຈັດຕັ້ງປະຕິບັດພາລະບົດບາດຂອງຕົນຢ່າງຕັ້ງໜ້າ ໃນການໂຄສະນາເຜີຍແຜ່ສຳເລັດກອງປະຊຸມຄັ້ງປະຖົມມະລືກຂອງ ສພຊ ຊຸດທີ IX ແລະ ສພຂ ຄໍາມ່ວນ ຊຸດທີ II ຢູ່ບັນດາເມືອງທັງ 10 ເມືອງໃນທົ່ວແຂວງ; ໄດ້ຕິດຕາມຊຸກຍູ້ອົງການປົກຄອງແຂວງ ແລະບັນດາເມືອງ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ທີ່ຕິດພັນກັບວາລະແຫ່ງຊາດ ແລະ ແຕ່ລະຄະນະກຳມະການ, ຄະນະເລຂາທິການໄດ້ປັບປຸງພະລະບົດບາດ, ສິດ ແລະ ປະຕິບັດໜ້າທີ່ຂອງຕົນຢ່າງສອດຄ່ອງ; ຈາກນັ້ນ, ຍັງໄດ້ຮັບຟັງການລາຍງານໂດຍສັງເຂບ ຈາກທ່ານ ປອ. ແກ້ວອຸດອນ ບຸດສິງຂອນ ຮອງເຈົ້າແຂວງຄໍາມ່ວນ ກ່ຽວກັບແຜນພັດທະນາເສດຖະກິດ-ສັງຄົມຂອງແຂວງ ແລະ ບັນດາພະແນກການທີ່ກ່ຽວຂ້ອງ ກໍໄດ້ຂຶ້ນລາຍງານ ໂດຍສະເພາະໃນຂົງເຂດວຽກງານຂອງອົງການໄອຍະການປະຊາຊົນ, ສານປະຊາຊົນ ແລະ ພະແນກຍຸຕິທໍາກ່ຽວກັບການປະຕິບັດພາລະບົດບາດຂອງຕົນ ຕາມທີ່ໄດ້ກໍານົດໄວ້ໃນລັດຖະທຳມະນູນ ແລະກົດໝາຍ ເປັນຕົ້ນແມ່ນຄວາມຮັບຜິດຊອບໃນການດຳເນີນຄະດີຕາມຂະບວນຍຸຕິທຳ ແລະ ກົນໄກການປະສານກັບຄະນະກຳມະການ ສພຂ; ກອງປະຊຸມໄດ້ມີການກອບຄໍາຄິດ-ຄໍາເຫັນແລກປ່ຽນ ເພື່ອເຮັດໃຫ້ການຈັດຕັ້ງປະຕິບັດວຽກງານໃນຕໍ່ໜ້າດີຂຶ້ນ; ຈາກນັ້ນ, ທ່ານ ອຳໄພຈິດມານົນ ຮອງປະທານກຳມະທິການກົດໝາຍ ໄດ້ຂຶ້ນໂຄສະນາເຜີຍແຜ່ກົດໝາຍ 3 ສະບັບຄື ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ.

       ໃນຕອນທ້າຍຂອງກອງປະຊຸມ, ທ່ານ ຈະເລີນ ເຍຍປາວເຮີ ໄດ້ມີຄໍາເຫັນໂອ້ລົມເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດວຽກງານໄລຍະຜ່ານມາ ແລະ ຕີລາຄາສູງຕໍ່ຜົນງານທີ່ແຂວງຍາດມາໄດ້, ພ້ອມດຽວກັນນັ້ນ, ທ່ານໄດ້ເນັ້ນຫລາຍບັນຫາໃຫ້ບັນການນໍາຂອງແຂວງຄໍາມ່ວນ ຈົ່ງເພີ່ມທະວີເອົາໃຈໃສ່ໂຄສະນາປຸກລະດົມ,ເສີມຂະຫຍາຍບັນດາແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ, ຄົ້ນຄວ້າຜັນຂະຫຍາຍບັນດາແນວທາງນະໂຍບາຍພັກ-ລັດ   ແລ້ວຫັນເປັນແຜນງານ, ເປັນໂຄງການອັນລະອຽດທີ່ແທດເໝາະກັບສະພາບຕົວຈິງແລະ ທ່າແຮງບົ່ນຊ້ອນຂອງແຂວງ; ພ້ອມນັ້ນ, ແຂວງຕ້ອງຖືເອົາການຫັນລົງກໍ່ສ້າງຮາກຖານທ້ອງຖິ່ນ ແລະ ເອົາໃຈໃສ່ວຽກງານການສຶກສາອົບຮົມການເມືອງ-ແນວຄິດ ໃຫ້ຖັນແຖວພະນັກງານຫລັກແຫລ່ງ, ສະມາຊິກພັກໃຫ້ກຳແໜ້ນ ແລະເຊື່ອມຊຶມແນວທາງຂອງພັກຢ່າງເລິກເຊິ່ງ, ເອົາໃຈໃສ່ວຽກງານປ້ອງກັນຊາດ-ປ້ອງກັນຄວາມສະຫງົບ ໃນການແກ້ໄຂປະກົດການຫຍໍ້ທໍ້ໃນສັງຄົມ ເປັນຕົ້ນແມ່ນການແກ້ໄຂບັນຫາຢາເສບຕິດ, ສະກັດກັ້ນການຄ້າ-ຂາຍເຖື່ອນ ແລະ ບັນຫາອື່ນໆໃຫ້ໝົດໄປ; ຄຽງຄູ່ກັນນັ້ນຈົ່ງເຊີດຊູຄວາມຮັບຜິດຊອບໃນໜ້າທີ່ການເມືອງຂອງຕົນ, ເຕົ້າໂຮມຄວາມສາມັກຄີເປັນປຶກແຜ່ນແລະ ຕັ້ງໜ້າຈັດຕັ້ງແຜນພັດທະນາເສດຖະກິດ-ສັງຄົມຂອງແຂວງ ໃຫ້ບັນລຸຕາມຄາດໝາຍ ກໍຄືວຽກງານຂອງ ສພຂ ຄໍາມ່ວນ ໃຫ້ນັບມື້ດີຂຶ້ນເທື່ອລະກ້າວ; ເພື່ອຍົກສູງພາລະບົດບາດຂອງ ສພຂ ໃຫ້ສູງຂຶ້ນກວ່າເກົ່າ.

        ໃນຕອນບ່າຍຂອງວັນດຽວກັນ, ທ່ານ ຮອງປະທານ ສພຊ ພ້ອມດ້ວຍຄະນະ ຍັງໄດ້ເດີນທາງໄປຢ້ຽມຢາມ ແລະເຮັດວຽກຢູ່ທີ່ສະໂມສອນເມືອງໜອງບົກ ແຂວງຄໍາມ່ວນ ຕື່ມອີກ.

(ເອື້ອ ມະໂນສິງ).