(ສພຊ) – ຜ່ານການພິຈາລະນາຢ່າງເລິກເຊິ່ງ ແລະ ກວ້າງຂວາງ ຂອງສະມາຊິກສະພາແຫ່ງຊາດ ຕໍ່ບົດລາຍງານຂອງລັດຖະບານ ກ່ຽວກັບການດັດແກ້ແຜນງົບປະມານແຫ່ງລັດປີ 2024 ໃນວາລະການດຳເນີນກອງປະ ຊຸມສະໄໝສາມັນເທື່ອທີ 8 ຂອງສະພາແຫ່ງຊຸດທີ IX ເມື່ອຕອນບ່າຍວັນທີ 18 ພະຈິກນີ້ ໂດຍການເປັນປະທານຂອງທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ, ກອງປະຊຸມໄດ້ເຫັນດີຕໍ່ການສະຫຼຸບຂາດຕົວງົບປະມານແຫ່ງລັດ ປະຈໍາປີ 2023 ມີລາຍຮັບເກີນແຜນ 12,358.13 ຕື້ກີບ ແລະ ເງິນທີ່ປະຢັດໄດ້ 808.99 ຕື້ກີບ ລວມເປັນ 13,167.12 ຕື້ກີບ ໃນນີ້, ທົດແທນການຂາດດຸນ 6,513.04 ຕື້ກີບ ແລະ ດຸ່ນດ່ຽງການຊຳລະໜີ້ສິນພາຍໃນ ແລະ ຕ່າງປະເທດ ປີ 2023 ຈຳນວນ 995.21 ຕື້ກີບ ແລະ ປີ 2024 ຈຳນວນ 3,638.09 ຕື້ກີບ ເພື່ອຫຼຸດຜ່ອນການກູ້ຢືມໃໝ່, ສ່ວນທີ່ເຫຼືອ 2,020.78 ຕື້ກີບ ທີ່ເປັນພູດເງິນເກີນແຜນບ້ວງ 50% ຂອງທ້ອງຖິ່ນ ສະເໜີດັດແກ້ເຂົ້ານໍາໃຊ້ໃນແຜນປີ 2024 ຕາມມະຕິສະພາແຫ່ງຊາດ ສະບັບເລກທີ 119/ສພຊ, ລົງວັນທີ 21 ພະຈິກ 2023; ພ້ອມນີ້, ຜ່ານການຈັດຕັ້ງປະຕິບັດແຜນງົບປະມານແຫ່ງລັດ, ບັນດາຫົວໜ່ວຍທີ່ມີລາຍຮັບ-ລາຍຈ່າຍ ວິຊາການ ແລະ ກອງທຶນ ມີເງິນເພີ່ມຂຶ້ນ 941.45 ຕື້ກີບ ໃນນັ້ນ, ຂັ້ນສູນກາງ 712.43 ຕື້ກີບ (ກອງທຶນທາງ 150 ຕື້ກີບ) ແລະ ຂັ້ນທ້ອງຖິ່ນ 229.11 ຕື້ກີບ.

ກອງປະຊຸມເຫັນດີດັດແກ້ແຜນງົບປະ ມານແຫ່ງລັດ ຕາມການສະເໜີຂອງລັດຖະ ບານດັ່ງນີ້:

1. ດັດແກ້ເພີ່ມລາຍຈ່າຍເງິນເກີນແຜນຂອງທ້ອງຖິ່ນ ຕາມຜົນການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປີ 2023 ຈຳນວນ 2,020.78 ຕື້ກີບ ທີ່ອະນຸຍາດໃຫ້ທ້ອງຖິ່ນນຳໃຊ້ເພື່ອໄປຊຳລະໜີ້ສິນບໍລິຫານ ແລະ ໂຄງການລົງທຶນຂອງລັດ (ບໍ່ອະນຸຍາດໃຫ້ຈັດຊື້ພາຫະນະບໍລິຫານ);

2. ດັດແກ້ເພີ່ມລາຍຮັບ-ລາຍຈ່າຍ ວິຊາການ ແລະ ກອງທຶນ ມີເງິນເພີ່ມຂຶ້ນ 941.45 ຕື້ກີບ ໃນນັ້ນ, ຂັ້ນສູນກາງ 712.43 ຕື້ກີບ (ກອງທຶນທາງ 150 ຕື້ກີບ) ແລະ ຂັ້ນທ້ອງຖິ່ນ 229.11 ຕື້ກີບ.

ພ້ອມນັ້ນ, ການຂຶ້ນແຜນງົບປະມານແຫ່ງລັດໃນຕໍ່ໜ້າ ໃຫ້ລັດຖະບານເອົາໃຈໃສ່ຂຸດຄົ້ນໃຫ້ໄດ້ທ່າແຮງແຫຼ່ງລາຍຮັບຕົວຈິງຢ່າງຄົບຖ້ວນ ແລະ ຂຶ້ນແຜນລາຍຈ່າຍໃຫ້ໃຫ້ສົມເຫດສົມຜົນຕາມທິດປະຢັດ ເພື່ອເຮັດໃຫ້ແຜນລາຍຮັບ-ລາຍຈ່າຍ ຖືກຕ້ອງ ແລະ ສອດຄ່ອງກັບຄວາມສາມາດຕົວຈິງ.

(ນາງ ອາລິນ ສຸພິມມະປະດິດ)