(ສພຊ) – ວັນທີ 10-14 ພະຈິກ 2024 ຄະນະຜູ້ແທນສະພາແຫ່ງຊາດ ນຳໂດຍທ່ານ ອຳໄພ ຈິດມານົນ ຮອງປະ ທານກໍາມາທິການກົດໝາຍ ໄດ້ເຂົ້າຮ່ວມກອງປະຊຸມປຶກ ສາຫາລືວ່າດ້ວຍກົດໝາຍ ຈີນ-ອາຊຽນ ຄັ້ງທີ 6 ພາຍໃຕ້ຫົວຂໍ້ “ສົ່ງເສີມການຮ່ວມມືທາງດ້ານກົດໝາຍອາຊຽນ-ຈີນ” (Promoting China-ASEAN Legal Cooperation) ຈັດຂຶ້ນທີ່ນະຄອນສົງຊິ້ງ ສປຈີນ ເຊິ່ງມີຜູ້ເຂົ້າຮ່ວມຫຼາຍກວ່າ 200 ທ່ານ ທີ່ມາຈາກປະເທດອາຊຽນ ໃນນັ້ນມີຕາງໜ້າຈາກກະຊວງຕ່າງໆຂອງລັດຖະບານ, ອົງການນິຕິບັນຍັດ, ອົງການຕຸລາການ, ມະຫາວິທະຍາໄລ, ທະນາຍຄວາມ, ນັກກົດໝາຍ, ບໍລິສັດທີ່ປຶກສາທາງດ້ານກົດໝາຍ, ສະມາຄົມນັກກົດໝາຍຂອງຈີນ ແລະ ອາຊຽນ.
ກອງປະຊຸມໄດ້ເນັ້ນໜັກເຖິງຄວາມສໍາຄັນຂອງເປົ້າໝາຍການພັດທະນາຮ່ວມກັນ, ຫຼັກການທາງດ້ານກົດໝາຍ (ຫຼັກນິຕິທໍາ) ຕາມຂໍ້ລິເລີ່ມໜຶ່ງແລວໜຶ່ງເສັ້ນທາງ ແລະ ການສ້າງປະຊາຄົມຈີນ-ອາຊຽນ ທີ່ມີອະນາຄົດຮ່ວມກັນ; ບັນດາຜູ້ແທນໄດ້ປຶກສາຫາລື ແລະ ແລກປ່ຽນກັນທາງດ້ານປະສົບການໃນການຮ່ວມມື, ການສະໜັບສະໜູນດ້ານລະບຽບກົດໝາຍລະຫວ່າງ ຈີນ-ອາຊຽນ ໃນຂົງເຂດການຮ່ວມມືທາງດ້ານເສດຖະກິດ, ການລົງທຶນ ແລະ ການຄ້າສາກົນ ຕາມລະບຽບກົດໝາຍ ເພື່ອໃຫ້ປະຊາຊົນ ແລະ ບັນດາປະ ເທດໃນແຖບໜຶ່ງແລວໜຶ່ງເສັ້ນທາງ ໄດ້ຮັບຜົນປະໂຫຍດຮ່ວມກັນ.
ຫົວໜ້າຄະນະຜູ້ແທນລາວໄດ້ຂຶ້ນມີຄໍາເຫັນໃນກອງປະຊຸມ ເຊິ່ງຍົກໃຫ້ເຫັນເຖິງການຮ່ວມມືໃນໄລຍະຜ່ານມາ ຂອງ ສປປລາວ ແລະ ສປຈີນ ເວົ້າລວມ, ເວົ້າສະເພາະການຮ່ວມມືລະຫວ່າງສະພາແຫ່ງຊາດລາວ ແລະ ສະພາຜູ້ແທນປະ ຊາຊົນທົ່ວປະເທດຈີນ ໂດຍສະເພາະແມ່ນການສ້າງ, ປັບປຸງ ແລະ ການຈັດຕັ້ງປະຕິບັດກົດໝາຍຂອງ ສປປລາວ ທີ່ມີສ່ວນຮ່ວມສະໜັບສະໜູນ ແລະ ໄດ້ຮັບຜົນປະໂຫຍດຈາກໜຶ່ງແລວໜຶ່ງເສັ້ນທາງ ແລະ ການສ້າງ ສປປລາວ ໃຫ້ກາຍ ເປັນຈຸດຂອງການເຊື່ອມຈອດທາງບົກ-ທາງທະເລ; ພ້ອມ ກັນນັ້ນ, ກໍໄດ້ຍົກໃຫ້ເຫັນເຖິງຄວາມເອົາໃຈໃສ່ໃນການສ້າງ ແລະ ຈັດຕັ້ງປະຕິບັດກົດໝາຍ ທີ່ສະພາແຫ່ງຊາດລາວໄດ້ຍົກສູງບົດບາດຂອງຕົນທາງດ້ານນິຕິບັນຍັດ ໃນການຮັບຮອງເອົາກົດໝາຍເພື່ອເປັນເຄື່ອງມືຂອງລັດໃນການຄຸ້ມຄອງລັດ-ຄຸ້ມຄອງສັງຄົມດ້ວຍລະບຽບກົດໝາຍ ໂດຍການເອົາໃຈໃສ່ປັບປຸງ ແລະ ຮັບຮອງເອົາກົດໝາຍຕ່າງໆ ໃຫ້ມີຄວາມແທດເໝາະກັບສະພາບການຂອງປະເທດຕົນ, ສອດຄ່ອງກັບສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ແລະ ໄດ້ມີການຖອດຖອນບົດຮຽນຈາກບັນດາປະເທດທີ່ພັດທະນາ ແລະ ບັນດາປະເທດອ້ອມຂ້າງ ເພື່ອສ້າງກົດໝາຍຂອງ ສປປລາວ ໃຫ້ມີຄວາມໃກ້ຄຽງ ແລະ ສາມາດຈັດຕັ້ງປະຕິບັດໄດ້ ຫຼື ສາມາດເຊື່ອມໂຍງກັບພາກພື້ນ ແລະ ສາກົນ ພ້ອມທັງໄດ້ມີການຍົກສູງບົດບາດຕິດຕາມກວດກາການຈັດຕັ້ງປະຕິບັດລັດຖະທຳມະນູນ ແລະ ກົດໝາຍ ໃຫ້ເຂັ້ມແຂງ ແລະ ມີປະສິດທິພາບ.
ກອງປະຊຸມໄດ້ດໍາເນີນໄປໃນບັນຍາກາດທີ່ທຸກຝ່າຍເຫັນດີເປັນເອກະພາບກັນ, ສືບຕໍ່ຮ່ວມມືກັນໃນການຊຸກຍູ້ ສົ່ງເສີມທາງດ້ານກົດໝາຍ; ນອກນັ້ນ, ຍັງມີກອງປະຊຸມຍ່ອຍຄື: ກອງປະຊຸມເວທີປຶກສາຫາລືກ່ຽວກັບການຮ່ວມມືທາງດ້ານກົດໝາຍທາງບົກ ແລະ ທາງທະເລຕາເວັນຕົກໃໝ່ ລະຫວ່າງພາກພື້ນ, ກອງປະຊຸມເວທີປຶກສາຫາລືຂອງຄະນະບໍດີໂຮງຮຽນກົດໝາຍ ຈີນ-ອາຊຽນ ແລະ ກອງປະຊຸມເວທີປຶກສາຫາລືກ່ຽວກັບການຈັດເຝິກອົບຮົມຫົວຂໍ້ການແກ້ໄຂຂໍ້ຂັດແຍ້ງທາງການຄ້າ ລະຫວ່າງປະເທດທີ່ມີຄວາມຫຼາກຫຼາຍ.
ນອກຈາກນີ້, ຄະນະຜູ້ແທນລາວຍັງໄດ້ປະຊຸມຮ່ວມກັບສູນຄົ້ນຄວ້າກົດໝາຍ ຈີນ-ອາຊຽນ ນໍາໂດຍທ່ານ ຈາງ ສຽວຈຸນ (Zhang Xiaojun) ຫົວໜ້າສູນຄົ້ນຄວ້າກົດໝາຍ ຈີນ-ອາຊຽນ, ຮອງອະທິການບໍດີມະຫາວິທະຍາໄລການປົກຄອງ ແລະ ນິຕິສາດ ຕາເວັນອອກສຽງໃຕ້ ຂອງນະຄອນສົງຊິ້ງ ພ້ອມດ້ວຍຄະນະ ເພື່ອປຶກສາຫາລືກ່ຽວກັບການຮ່ວມມືກັນໃນການສ້າງບຸກຄະລາກອນ, ການສະໜອງຂໍ້ມູນທາງດ້ານນິຕິກໍາ, ການແລກປ່ຽນຂໍ້ມູນຂ່າວສານ ແລະ ປະສົບການໃນການສ້າງ ແລະ ປັບປຸງບັນດານິຕິກໍາຕ່າງໆຂອງລາວ-ຈີນໃນໄລຍະຜ່ານມາ ໂດຍໄດ້ເນັ້ນໜັກເຖິງການສ້າງບຸກຄະລາກອນໃນຂົງເຂດກົດໝາຍ ໃຫ້ແກ່ພະນັກງານຂອງສະພາແຫ່ງຊາດລາວ ເຊິ່ງສູນຄົ້ນຄວ້າກົດໝາຍຈີນ-ອາຊຽນ ມີຄວາມຍິນດີຈະໃຫ້ການສະໜັບສະໜູນທາງດ້ານທຶນຮອນ ແລະ ການຮ່ວມມືກັບສະພາແຫ່ງຊາດລາວ ໃນການສົ່ງບຸກຄະລາກອນທາງດ້ານກົດໝາຍທີ່ຕ້ອງການໄປຍົກລະດັບການສຶກສາ, ການແລກປ່ຽນບົດຮຽນ, ການເຝິກອົບຮົມໄລຍະສັ້ນ ແລະ ການຍົກລະດັບປະລິນຍາເອກ ໃນສາຍກົດໝາຍຢູ່ມະຫາວິທະຍາໄລການປົກຄອງ ແລະ ນິຕິສາດ ຕາເວັນອອກສຽງໃຕ້ ແລະ ສູນຄົ້ນຄວ້າກົດໝາຍ ຈີນ-ອາຊຽນ.
ຄະນະຜູ້ແທນລາວຍັງໄດ້ພົບປະສອງຝ່າຍກັບທ່ານ ຫວັງ ຫົງຊຽງ (Wang Hongxiang) ເລຂາທິການພັກສະ ມາຄົມກົດໝາຍຈີນ, ຮອງປະທານຄະນະກໍາມາທິການການສ້າງລັດຖະທໍາມະນູນ ແລະ ກົດໝາຍ, ຄະນະປະຈໍາສະພາຜູ້ແທນປະຊາຊົນທົ່ວປະເທດຈີນ ຊຸດທີ XIV; ໃນການພົບປະຄັ້ງນີ້ ໄດ້ມີການແລກປ່ຽນກ່ຽວກັບການປັບປຸງລັດຖະທໍາມະນູນ, ການສ້າງ ແລະ ປັບປຸງກົດໝາຍຂອງ ຈີນ-ລາວ ໃນໄລຍະຜ່ານມາ ແລະ ຝ່າຍ ສປຈີນ ມີຄວາມຍິນດີຈະສະໜອງຂໍ້ມູນກ່ຽວກັບການປັບປຸງລັດຖະທໍາມະນູນຂອງຕົນ.