ວັນທີ 28-29 ຕຸລາ 2024 ນີ້, ສະພາປະຊາຊົນແຂວງຜົົ້ງສາລີ ໄດ້ຈັດກອງປະຊຸມ ປະເມີນຜົນການປະຕິບັດວຽກງານຂອງພະນັກງານ-ລັດຖະກອນ ຕິດພັນກັບການປະຕິບັດເນື້ອໃນຂໍ້ແຂ່ງຂັນ ຮັກຊາດ ພັດທະນາ ພາຍໃຕ້ຄໍາຂວັນ: 4 ເຂັ້ມແຂງ 3 ຮັບປະກັນ ຂອງສະພາປະຊາຊົນແຂວງ ປະຈໍາປີ 2024 ໂດຍການເປັນປະທານຂອງ ທ່ານ ຫຸມເພັງ ຈອມວິສານ ຮອງປະທານສະພາປະຊາຊົນແຂວງ, ມີບັນດາທ່ານຄະນະປະຈໍາສະພາປະຊາຊົນແຂວງ ແລະ ພະນັກງານ-ລັດຖະກອນ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ ຄະນະຮັບຜິດຊອບ ໄດ້ສະເໜີຈຸດປະສົງ ແລະ ແນະນໍາວິທີການການປະເມີນ. ຮັບຟັງທ່ານນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານເນື້ອໃນຂໍ້ແຂ່ງຂັນ 4 ເຂັ້ມແຂງ 3 ຮັບປະກັນ ຂອງສະພາປະຊາຊົນແຂວງ ປະຈໍາປີ 2024, ທິດທານແຜນການ ປະຈໍາປີ 2025 ແລະ ບັນດາທ່ານຜູ້ເຂົ້າຮ່ວມກໍ່ໄດ້ປະກອບຄໍາຄິດຄໍາເຫັນ ໃສ່ບົດສະຫຼຸບດັ່ງກ່າວ ເພື່ອເຮັດໃຫ້ເນື້ອໃນຄົບຖ້ວນ ສົມບູນ ສາມາດນໍາໄປຈັດຕັ້ງປະຕິບັດໃນຕໍ່ໜ້າ ໃຫ້ມີຄຸນນະພາບທີ່ດີຂຶ້ນກວ່າເກົ່າ. ຫຼັງຈາກນັ້ນ, ປະທານກອງປະຊຸມ ກໍ່ໄດ້ນໍາພາ-ຊີ້ນໍາ ແລະ ດໍາເນີນການປະເມີນ, ສະພາປະຊາຊົນແຂວງ ມີພະນັກງານທັງໝົດ 54 ທ່ານ, ຍິງ 21 ທ່ານ, ໃນນີ້ ພະນັກງານຖືກປະເມີນຕົວຈິງ ປະຈໍາປີ 2024 ມີ 45 ທ່ານ, ຍິງ 18 ທ່ານ, ຊຶ່ງການປະເມີນ ແມ່ນໄດ້ແບ່ງເປັນ 3 ກຸ່ມ ຄື: ກຸ່ມທີ 1 ແມ່ນປະເມີນໃຫ້ພະນັກງານການນໍາຜູ້ທີ່ມີຕໍາແໜ່ງບໍລິຫານປະເພດ 1 ຫາ 3, ກຸ່ມທີ 2 ແມ່ນປະເມີນໃຫ້ຫົວໜ້າຂະແໜງ, ຮອງຫົວໜ້າຂະແໜງ ແລະ ວິຊາການພາຍໃນຄະນະກໍາມະການ; ກຸ່ມທີ 3 ແມ່ນປະເມີນໃຫ້ຫົວໜ້າຂະແໜງ, ຮອງຫົວໜ້າຂະແໜງ ແລະ ວິຊາການພາຍໃນຄະນະເລຂາທິການ ສະພາປະຊາຊົນແຂວງ, ຈາກນັ້ນ ແຕ່ລະກຸ່ມກໍ່ໄດ້ດໍາເນີນການປະເມີນຕີລາຄາ ຊຶ່ງບັນດາທ່ານ ກໍ່ໄດ້ຂຶ້ນຜ່ານການປະເມີນ ຕີລາຄາ ການຈັດຕັ້ງປະຕິບັດວຽກງານຂອງຕົນຕາມລໍາດັບ ພ້ອມທັງປະກອບຄໍາຄິດເຫັນ ຕໍານິສົ່ງຂ່າວ ເພື່ອປັບປຸງກໍ່ສ້າງ ເຊິ່ງກັນ ແລະ ກັນ ດ້ວຍບັນຍາກາດອັນຟົດຟື້ນ. ກອງປະຊຸມໄດ້ດໍາເນີນເປັນເວລາ 2 ວັນ ແລະ ບັນລຸຈຸດປະສົງ ຕາມແຜນການທີ່ວາງໄວ້.

ພາບ-ຂ່າວ: ສູນທອງ