(ສພຊ) – ຕອນບ່າຍວັນທີ 25 ຕຸລາຜ່ານມາ ທີ່ຫ້ອງປະຊຸມໃຫຍ່ສະພາແຫ່ງຊາດ (ສພຊ) ໄດ້ມີກອງປະຊຸມເຜີຍແຜ່ຜົນສຳເລັດການດຳເນີນກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45, ການກະກຽມກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ປະກາດການແຕ່ງຕັ້ງຕຳແໜ່ງບໍລິຫານປະເພດຕ່າງໆພາຍໃນ ສພຊ ໂດຍການເປັນປະທານຂອງສະຫາຍ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງເລຂາຄະນະບໍລິຫານງານພັກສະ ພາແຫ່ງຊາດ, ມີຄະນະບໍລິຫານງານພັກ, ຄະນະພັກຮາກຖານ, ຄະນະໜ່ວຍພັກຮາກຖານ, ຄະນະໜ່ວຍພັກທີ່ຂຶ້ນກັບຄະນະພັກຮາກຖານ, ສະມາຊິກພັກ ແລະ ພະນັກງານ-ລັດຖະກອນທົ່ວ ສພຊ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຮັບຟັງຜົນສຳເລັດການເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ສະເໜີໂດຍສະຫາຍ ສັນຍາ ປຣະເສີດ ຄະນະບໍລິຫານງານພັກສະພາແຫ່ງຊາດ, ປະທານກຳມາທິການການຕ່າງປະເທດ ເຊິ່ງສະຫາຍໄດ້ໃຫ້ຮູ້ວ່າ: ກອງປະຊຸມສະມັດຊາໃຫຍ່ໄອປາຄັ້ງນີ້ ຈັດຂຶ້ນພາຍໃຕ້ຄຳຂວັນ: “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ”, ອັນເປັນການປະຕິບັດພັນທະໃນນາມສະມາຊິກສົມ ບູນໄອປາຂອງສະພາແຫ່ງຊາດລາວ ທັງເປັນໂອກາດໃນການສົ່ງເສີມນະໂຍບາຍຂອງ ສປປລາວ ໃນການຫັນປະເທດທີ່ບໍ່ມີທາງອອກສູ່ທະເລໃຫ້ເປັນປະເທດເຊື່ອມໂຍງເຊື່ອມຈອດ, ສົ່ງເສີມການຮ່ວມມືກັບບັນດາລັດຖະສະພາສະມາຊິກໄອປາ ແລະ ຄູ່ຮ່ວມອື່ນໆ ເພື່ອຊຸກຍູ້ສົ່ງເສີມການຈັດຕັ້ງປະຕິບັດວຽກງານຕ່າງໆຂອງອາຊຽນ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງຂຶ້ນກວ່າເກົ່າ; ພ້ອມນັ້ນ, ກໍເປັນການຍົກສູງບົດບາດຂອງສະພາແຫ່ງຊາດລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ.

ສະຫາຍ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຄະນະປະຈຳພັກ, ເລຂາທິການສະພາແຫ່ງຊາດ ໄດ້ລາຍງານກ່ຽວກັບການກະກຽມກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ເຊິ່ງສະຫາຍແຈ້ງໃຫ້ຊາບວ່າ: ກອງປະຊຸມສະໄໝສາມັນເທື່ອທີ 8 ຈະດຳເນີນໃນລະ ຫວ່າງກາງເດືອນພະຈິກ ຫາຕົ້ນເດືອນທັນວານີ້ ເຊິ່ງຈະຄົ້ນຄວ້າ, ພິຈາລະນາ ແລະ ຮັບຮອງເອົາວຽກງານ 4 ຂົງເຂດຄື: ວຽກງານລັດ ຖະບານ, ວຽກງານອົງການກວດສອບແຫ່ງລັດ ແລະ ອົງການກວດກາແຫ່ງລັດ, ວຽກງານສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ແລະ ວຽກງານສະ ພາແຫ່ງຊາດ, ຈະພິຈາລະນາ ແລະ ຮັບຮອງເອົາການສ້າງ ແລະ ປັບປຸງກົດໝາຍ 9 ສະ ບັບ ໃນນີ້, ສ້າງ ໃໝ່ 2 ສະບັບ, ປັບປຸງ 7 ສະບັບ.

ຫຼັງຈາກນັ້ນ, ກໍໄດ້ມີການປະກາດການແຕ່ງຕັ້ງຕຳແໜ່ງບໍລິຫານປະເພດຕ່າງໆ, ການຍົກຍ້າຍສັບຊ້ອນພະນັກງານພາຍໃນສະພາແຫ່ງຊາດຈຳນວນໜຶ່ງ.

ໃນການມີຄຳເຫັນໂອ້ລົມຕໍ່ກອງປະຊຸມ, ສະຫາຍ ປອ. ນາງ ສູນທອນ ໄຊຍະຈັກ ຮອງເລຂາຄະນະບໍລິຫານງານພັກສະພາແຫ່ງຊາດ ໄດ້ກ່າວວ່າ: ການເປັນເຈົ້າພາບຈັດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ແມ່ນເຫດການການເມືອງທີ່ສໍາຄັນ ບໍ່ສະເພາະແຕ່ສໍາລັບສະພາແຫ່ງຊາດ ແຕ່ເປັນເຫດການສໍາຄັນສໍາລັບປະເທດເຮົາ ເພາະໄດ້ມີການປຶກສາຫາລືບັນຫາສໍາຄັນຂອງພາກພື້ນ ແລະ ສາກົນ; ບັນດາເອກະສານທີ່ຮັບຮອງເອົາເປັນມະຕິ ກໍມີເກືອບ 40 ສະບັບ, ມີການພົບປະທັງຫຼາຍຝ່າຍ ແລະ ສອງຝ່າຍ ຈໍານວນຫຼາຍຄະນະ ອັນເປັນການຍົກສູງບົດບາດອິດທິພົນຂອງ ສປປລາວ, ຂອງສະພາແຫ່ງຊາດ ໃນເວທີພາກພື້ນ ແລະ ສາກົນຕື່ມອີກບາດກ້າວໜຶ່ງ. ການກະ ກຽມໃຫ້ແກ່ການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ເພື່ອພິຈາ ລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ ຕາມພາລະບົດບາດທີ່ໄດ້ກໍານົດໄວ້ໃນລັດຖະທໍາມະນູນ, ກົດໝາຍ ກໍເປັນໜ້າທີ່ການເມືອງສໍາຄັນຂອງສະພາແຫ່ງຊາດ ຈຶ່ງສະເໜີມາຍັງບັນດາກໍາມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກໍາສະພາແຫ່ງຊາດ ຈົ່ງໄດ້ເພີ່ມທະວີຄວາມເປັນເຈົ້າການກະກຽມຮອບດ້ານໃນຂົງເຂດວຽກງານທີ່ຕົນຮັບຜິດຊອບ ແນໃສ່ຮັບປະກັນການພິຈາລະນາຕົກລົງວຽກງານຕ່າງໆ ມີຈຸດສຸມ ແລະ ເປັນບ່ອນອີງໃນການແກ້ໄຂແຕ່ລະບັນຫາຢ່າງມີປະສິດທິຜົນ.

ສະຫາຍ ປອ. ນາງ ສູນທອນ ໄຊຍະຈັກ ຍັງໄດ້ກ່າວອີກວ່າ: ການທີ່ຄະນະບໍລິຫານງານພັກສະພາແຫ່ງຊາດ ໄດ້ປະກາດການແຕ່ງຕັ້ງຕໍາແໜ່ງບໍລິຫານຈໍານວນໜຶ່ງ ໂດຍມີຂັ້ນຮອງຫົວໜ້າກົມ, ຫົວໜ້າພະແນກ ແລະ ຮອງຫົວໜ້າພະແນກ ລວມທັງການປັບປຸງ, ສັບຊ້ອນບ່ອນປະຈໍາການພາຍໃນສະພາແຫ່ງຊາດນັ້ນ ຈຸດປະສົງແມ່ນເພື່ອປັບປຸງວຽກງານໃຫ້ນັບມື້ມີປະສິດທິຜົນສູງຂຶ້ນ; ສໍາລັບບັນດາສະຫາຍທີ່ໄດ້ຮັບການແຕ່ງຕັ້ງຕໍາແໜ່ງບໍລິຫານໃນມື້ນີ້ ໃຫ້ສືບຕໍ່ຕັ້ງໜ້າປະຕິບັດວຽກງານໃຫ້ມີຜົນສໍາເລັດໃໝ່, ເພື່ອເປັນກໍາລັງແຮງໃຫ້ແກ່ກົງຈັກຂອງສະພາແຫ່ງຊາດ ໃນການປະຕິບັດວຽກງານໃຫ້ດີຂຶ້ນເລື່ອຍໆ.

(ນາງ ອາລິນ ສຸພິມມະປະດິດ)