​(ສພຊ) ວັນທີ 13 ມັງກອນ 2020 ທີ່ເມືອງວັງວຽງ ແຂວງວຽງຈັນ ກຳມາທິການຍຸຕິທຳ (ກມຍທ) ສະພາແຫ່ງຊາດ ໄດ້ຈັດກອງປະຊຸມສຳມະນາກ່ຽວກັບກົນໄກການຮັບ ແລະ ພິຈາລະນາຄຳຮ້ອງຂໍຄວາມເປັນທຳ ແລະ ລະດົມຄວາມຄິດໃສ່ແຜນພັດທະນາວຽກງານຂອງ ກມຍທ 5 ປີ (2021-2025) ໂດຍການເປັນປະທານຂອງທ່ານ ສຈ. ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ຜູ້ຊີ້ນຳວຽກງານຍຸຕິທຳ; ເຂົ້າຮ່ວມມີທ່ານ ຄຳແພງ ວິລະພັນ ປະທານ ກມຍທ; ມີຮອງປະທານ ກມຍທ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແຂກຖືກເຊີນເຂົ້າຮ່ວມ.

​ໃນພິທີ, ທ່ານຮອງປະທານສະພາແຫ່ງຊາດ ໄດ້ກ່າວວ່າ: ເພື່ອເປັນການປຶກສາຫາ ແລະ ແລກປ່ຽນຄວາມຄິດເຫັນທາງດ້ານວິຊາການຮ່ວມກັນ ເພື່ອກ້າວໄປສູ່ຄວາມເປັນເອກະພາບໃນການຈັດຕັ້ງປະຕິບັດວຽກງານພິຈາລະ ນາຄໍາຮ້ອງຂໍຄວາມເປັນທໍາຂອງສະພາແຫ່ງຊາດ ພ້ອມທັງເປັນການຄົ້ນຄວ້າປະກອບຄຳເຫັນຕໍ່ແຜນພັດທະນາວຽກງານຂອງ ກມຍທ ໃນໄລຍະ 5 ປີຕໍ່ໜ້າ ເຊິ່ງເປັນເນື້ອໃນທີ່ສໍາຄັນເພາະຈະເປັນແຜນວຽກພື້ນຖານໃຫ້ແກ່ການຈັດຕັ້ງປະຕິບັດພາລະບົດບາດຂອງ ກມຍທ ສະພາແຫ່ງຊາດ ຊຸດທີ IX ໃຫ້ໄດ້ຄຸນນະພາບ ແລະ ປະລິມານ; ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ນັກສຳມານະກອນສຸມສະຕິປັນຍາ, ຄວາມຮູ້ຄວາມສາມາດ ແລະ ປະສົບການຜ່ານມາ ເຂົ້າໃນການປະກອບຄໍາຄິດຄໍາເຫັນ ແລະ ແລກປ່ຽນບົດຮຽນຢ່າງກົງໄປກົງມາ, ມີລັກສະນະສ້າງສັນ, ພ້ອມກັນຊອກໃຫ້ເຫັນເຖິງດ້ານດີ, ດ້ານອ່ອນທີ່ຄົງຄ້າງ ແລະ ສະເໜີວິທີແກ້ໄຂໃນຕໍ່ໜ້າ  ເພື່ອພ້ອມກັນນຳເອົາບົດຮຽນທີ່ເປັນປະໂຫຍດໄປຈັດຕັ້ງປະຕິບັດໃຫ້ສອດຄ່ອງກັບພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບຂອງກໍາມາທິການ ໃຫ້ມີຄວາມຮັດກຸມ, ສອດຄ່ອງ ກັບສະພາບຄວາມເປັນຈິງ, ຖືກຕ້ອງຕາມແນວທາງ, ນະໂຍບາຍ, ລັດຖະທຳມະນູນ ແລະ ກົດໝາຍ.

ກອງປະຊຸມຄັ້ງນີ້, ຈະໄດ້ດຳເນີນໄປເປັນເວລາ 2 ວັນ ຈຶ່ງຈະສຳເລັດ.

(ພາບ ແລະ ຂ່າວ: ນາງ ອາລິນ ສຸພິມມະປະດິດ)