ໃນຕອນເຊົ້າຂອງວັນທີ 5 ຕຸລາ 2024 ທີ່ຜ່ານມາ ຢູ່ທີ່ສະພາປະຊາຊົນແຂວງຈໍາປາສັກ ໄດ້ມີພິທີ ມອບ-ຮັບ ຈັກສູບນໍ້າ ເພື່ອຮັບໃຊ້ວຽກງານຄຸ້ມຄ້ອງໄພພິບັດ ໃຫ້ແກ່ສະພາປະຊາຊົນແຂວງຈໍາປາສັກ ຈໍານວນ 2 ເຄື່ອງ, ມູນຄ່າ 614,180,000 ກີບ ຈາກ ບໍລິສັດ ເຂື່ອນໄຟຟ້າດອນສະໂຮງ ຈໍາກັດ ໂດຍການໃຫ້ກຽດເຂົ້າຮ່ວມໃນພິທີຂອງ ທ່ານ ອາລຸນໄຊ ສູນນະລາດ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຈໍາປາສັກ ມີ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ທັງເປັນປະທານສະພາປະຊາຊົນແຂວງຈໍາປາສັກ, ທ່ານ ດຣ ໄຊຊະນະ ທອງຄຳຈັນ ຮອງປະທານບໍລິສັດ ເຂື່ອນໄຟຟ້າດອນສະໂຮງ ຈໍາກັດ ພ້ອມດ້ວຍບັນດາທ່ານໃນຄະນະປະຈໍາພັກແຂວງ, ການນໍາຂັ້ນສູງຂອງແຂວງ, ຄະນະນໍາຈາກສະຫາພັນກິລາບານເຕະແຫ່ງຊາດລາວ, ຕ່າງໜ້າພະແນກການກົມກອງອ້ອມຂ້າງແຂວງ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ດຣ ໄຊຊະນະ ທອງຄຳຈັນ ຮອງປະທານບໍລິສັດ ເຂື່ອນໄຟຟ້າດອນສະໂຮງ ຈໍາກັດ ໄດ້ມີຄໍາເຫັນສະເໜີຈຸດປະສົງຂອງການໃຫ້ການຊ່ວຍເຫຼືອມອບຈັກສູບນໍ້າຄັ້ງນີ້ ແມ່ນມີຄວາມເປັນຫ່ວງເປັນໄຍ ແລະເຫັນໄດ້ເຖິງຄວາມສໍາຄັນຂອງວຽກງານການຄຸ້ມຄອງໄພພິບັດ ແລະອີງໃສບົດຮຽນທີ່ເກີດຜ່ານມາຢູ່ຕ່າງປະເທດ ແລະ ບັນດາແຂວງພາຍໃນປະເທດລາວໃນເວລາເກີດມີໄພພິບັດຈາກທໍາມະຊາດ ໂດຍສະເພາະນໍ້າຖ້ວນໃນລະດູຝົນ ທີ່ເກີດຈາກສະພາບດິນຟ້າອາກາດປ່ຽນແປງ ທີ່ສົ່ງຮັບຜົນກະທົບຕໍ່ປະຊາຊົນ. ດັ່ງນັ້ນ, ບົນພື້ນຖານທ່າແຮງຂອງບໍລິສັດ ແລະອີງໃສ່ເນື້ອໃນຈິດໃຈທີ່ສະພາປະຊາຊົນແຂວງຈໍາປາສັກ ໄດ້ສະເໜີຕໍ່ບໍລິສັດ ຄະນະນໍາຂອງບໍລິສັດຈິງມີຄວາມຮີບຮ້ອນຄົ້ນຄວ້າປຶກສາຫາລື ແລະ ຖືສໍາຄັນໃນການປະກອບສ່ວນຊ່ວຍເຫຼືອເພື່ອໃຫ້ແຂວງຈໍາປາສັກ ມີອຸປະກອນຮັບມື້ ແລະ ຕອບໂຕ້ກັບໄພພິບັດທາງທຳມະຊາດທີ່ອາດຈະເກີດຂື້ນໃນຕໍ່ໜ້າ.

ໂອກາດດຽວກັນ, ທ່ານ ສາຍທອງ ໄຊຍະວົງ ປະທານສະພາປະາຊົນແຂວງຈໍາປາສັກ ໄດ້ມີຄໍາກ່າວສະແດງຄໍາຂອບໃຈຕໍ່ບໍລິສັດຢ່າງຈິງ ທີ່ໃຫ້ການຊ່ວຍເຫຼືອເຄື່ອງຈັກສູບນໍ້າ ໃຫ້ສະພາປະຊາຊົນແຂວງຈໍາປາສັກ, ພວກເຮົຈະໄດ້ຄຸ້ມຄອງຮັກສາ ແລະ ນໍາໃຊ້ເຄື່ອງຈັກດັ່ງກ່າວ ສົມທົບກັນກັບອົງການແຂວງຈໍາປາສັກ ເຂົ້າໃນວຽກງານຄຸ້ມຄອງໄພພິບັດຂອງແຂວງ ໃຫ້ເກີດຜົນປະໂຫຍດສູງສຸດ.

ໃນໂອກາດດັ່ງກ່າວ, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ກໍ່ໄດ້ມີຄໍາເຫັນສະແດງຄວາມຂອບໃຈ ແລະ ຕີລາຄາສູງມາຍັງການໃຫ້ການຊ່ວຍເຫຼືອຂອງບໍລິສັດ ເຂື່ອນໄຟຟ້າ ດອນສະໂຮງ ຈໍາກັດ ທີ່ເຫັນເຖິງຄວາມສໍາຄັນວຽກງານຕ້ານໄພພິບັດ ເຊິ່ງເປັນການຍົກລະດັບໃຫ້ແກ່ວຽກງານຕ້ານໄພພິບັດຂອງແຂວງອີກລະດັບໜຶ່ງ ໃນການເຝົ້າລະວັງ, ກະກຽມຮັບມືສະກັດກັນ ແລະ ຫຼຸດຜ່ອນຄວາມເສຍຫາຍ ຈາກເຫດການທີ່ອາດເກີດຂື້ນຈາກໄພທຳມະຊາດໃນຕໍ່ໜ້າ.

ໃນຕອນທ້າຍພິທີ, ໄດ້ມີການມອບ-ຮັບ ເຄື່ອງຈັກສູບນໍ້າ ໂດຍການມອບຂອງ ທ່ານ ດຣ ໄຊຊະນະ ທອງຄຳຈັນ ຮອງປະທານບໍລິສັດ ເຂື່ອນໄຟຟ້າດອນສະໂຮງ ຈໍາກັດ ຮັບໂດຍ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 15, ທັງເປັນປະທານສະພາປະຊາຊົນແຂວງຈໍາປາສັກ ພ້ອມທັງມອບໃບກຽດຕິຄຸນໃຫ້ບໍລິດສັດ ເຂື່ອໄຟຟ້າດອນສະໂຮງ ຈໍາກັດ ເພື່ອເປັນການຍ້ອງຍໍສັນລະເສີນ ໂດຍມີບັນດາທ່ານຄະນາປະຈໍາພັກແຂວງ, ການນໍາຂັ້ນສູງຂອງແຂວງ, ຄະນະນໍາຈາກສະຫພພັນກິລາບານເຕະແຫ່ງຊາດລາວ, ຕ່າງໜ້າພະແນກການກົມກອງອ້ອມຂ້າງແຂວງຮ່ວມໃນພິທີ.

(ພາບ-ຂ່າວ: ສົມວິຈິດ ໄຊມົນຕີ)