ໃນຕອນເຊົ້າຂອງວັນທີ 25 ກັນຍາ 2024 ທີ່ຜ່ານມາ ຢູ່ທີ່ສະພາປະຊາຊົນແຂວງຈໍາປາສັກ ໄດ້ຕ້ອນຮັບ ແລະ ເຮັດເປີດກອງປະຊຸມວຽກຮ່ວມກັບ ສະຖາບັນຄົ້ນຄວ້ານິຕິກຳຂອງສະພາແຫ່ງຊາດ ໂດຍມີຈຸດປະສົງເພື່ອເພື່ອລະດົມຄໍາຄິດເຫັນເກັບກຳຂໍ້ມູນ ຕໍ່ວຽກງານຄົ້ນຄວ້າວິທະຍາສາດ ຢູ່ສະພາປະຊາຊົນແຂວງຈໍາປາສັກ ໃນການສະໜອງຂໍ້ມູນ-ຂ່າວສານ ໃນການຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ(ສພຊ), ສະມາຊິກສະພາປະຊາຊົນຂັ້ນແຂວງ (ສສຂ) ແລະ ພະນັກງານທີ່ເປັນເສນາທິການ. ໂດຍການເຂົ້າຮ່ວມເປັນຄະນະປະທານກອງປະຊຸມຂອງ ທ່ານ ສົມສີ ມະນີນິນ ກຳມະການພັກແຂວງ, ຮອງປະທານສະພາປະຊາຊົນແຂວງຈໍາປາສັກ ແລະ ທ່ານ ວິະພັນ ສີລິທໍາ ຮອງຫົວໜ້າສະຖາບັນຄົ້ນຄວ້ານິຕິກຳ ຂອງສະພາແຫ່ງຊາດ ມີບັນດາທ່ານໃນຄະນະປະຈໍາສະພາປະຊາຊົນແຂວງ, ຫົວໜ້າ-ຮອງຫົວໜ້າກົມຂອງສະພາແຫ່ງຊາດ, ຫົວໜ້າ-ຮອງຫົວໜ້າຂະແໜງການຂອງສະພາປະຊາຊົນແຂວງ ແລະວິຊາຊົນເຂົ້າຮ່ວມ.

ວາລະດຳເນີນກອງປະຊຸມ, ທ່ານ ສົມສີ ມະນີນິນ ຮອງປະທານສະພາປະຊາຊົນແຂວງ ໄດ້ມີຄໍາເຫັນກ່າວຕ້ອນຮັບຄະນະສະຖາບັນຄົ້ນຄວ້ານິຕິກຳຂອງສະພາແຫ່ງຊາດ ມີ່ລົງເຄື່ອນໄຫວເຮັດວຽກຢູ່ສະພາປະຊາຊົນແຂວງຈໍາປາສັກ ໃນຄັ້ງນີ້. ໂອກາດດຽວກັນ, ທ່ານ ວິລະພັນ ສີລິທໍາ ຮອງຫົວໜ້າກົມສະຖາບັນຄົ້ນຄວ້ານິຕິກຳຂອງສະພາແຫ່ງຊາດ ໄດ້ມີຄໍາເຫັນສະເໜີຈຸດປະສົງການລົງເຄື່ອນໄຫວ ແມ່ນເພື່ອເກັບກຳຂໍ້ມູນ, ລະດົມຄໍາຄິດເຫັນຂອງບັນດາທ່ານການນໍາ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ຫົວໜ້າ-ຮອງຫົວໜ້າຂະແໜງການ ແລະ ວິຊາການ ຜູ້ທີ່ເຮັດວຽກຕົວຈິງ ຂອງສະພາປະຊາຊົນແຂວງຈໍາປາສັກ ຕໍ່ວຽກງານຄົ້ນຄວ້າວິທະຍາສາດ ເຊິ່ງຈະເປັນຂໍ້ມູນ-ຂ່າວສານ ໃນການຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ(ສພຊ), ສະມາຊິກສະພາປະຊາຊົນຂັ້ນແຂວງ (ສສຂ) ແລະ ພະນັກງານທີ່ເປັນເສນາທິການ ໃນມີປະສິດທິຜົນດີກວ່າເກົ່າ ເຊິ່ງປະກອບມີຫົວຂໍ້ວິທະຍາສາດ ຈໍານວນ 5 ຫົວຂໍ້ ຄື: ຫົວຂໍ້ຄົ້ນຄວ່າ ການປະສານງານລະຫວ່າງສະພາປະຊາຊົນຂັ້ນແຂວງ ກັບ ອົງກາສນປົກຄອງແຂວງຂັ້ນທ້ອງຖິ່ນ, ຫົວຂໍ້ຄົ້ນຄວ້າ ກົງຈັກທີ່ເປັນເສນາທິການໃຫ້ແກ່ສະພາປະຊາຊົນແຂວງ ແລະ ຄະນະປະຈໍາສະພາປະຊາຊົນຂັ້ນແຂວງ; ຫົວຂໍ້ຄົ້ນຄວ້າ ຄວາມຮູ້ພື້ນຖານໃນການສ້າງມະຕິຂອງກອງປະຊຸມສະພາແຫ່ງຊາດ ແລະ ຄະນະປະຈໍາສະພາແຫ່ງຊາດ, ຫົວຂໍ້ການຄົ້ນຄວ້າ ການຮັບ ແລະ ການພິຈາລະນາຄໍາຮອງຂໍຄວາມເປັນທໍາ ຂອງຄະນະປະຈໍາສະພາແຫ່ງຊາດ ແລະ ຄະນະປະຈໍາສະພາປະຊາຊົນຂັ້ນແຂວງ ແລະ ຫົວຂໍ້ຄົ້ນຄວ້າ ຈັນຍາບັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນຂັ້ນແຂວງ. ເຊິ່ງຂໍ້ມູນຕ່າງໆທີ່ໄດ້ຮັບຈາກການເກັບກໍາເຮັດວຽກຮ່ວມກັບສະພາປະຊາຊົນແຂວງຈໍາປາສັກ ໃນຄັ້ງນີ້ ຄະນະຮັບຜິດຊອບຈະນໍາໄປປັບປຸງໃສ່ບົດຄົ້ນຄວ້າວິທະຍາສາດໃຫ້ມີຜົນສໍາສເລັດຕາມແຜນທີ່ວາງໄວ. ຈາກນັ້ນ, ຄະນະຮັບຜິດຊອບໄດ້ນໍາສະເໜີໂຄງຮ່າງຫົວຂໍ້ຄົ້ນຄວ້າວິທະຍາສາດທັງ 5 ຫົວຂໍ້ ແລະ ເຈາະຈີ້ມໃນແຕ່ລະເນື້ອໃນ ເຊິ່ງບັນດາທ່ານຜູ້ແທນກອງປະຊຸມໄດ້ປະກອບຄໍາຄິດເຫັນຄໍາສະເໜີ ແລກປ່ຽນບົດຮຽນຈາກປະສົບການຕົວຈິງທີ່ຈັດຕັ້ງປະຕິບັດວຽກງານຜ່ານມາ ໂດຍຍົກໃຫ້ເຫັນຈຸດດີທີ່ຄວາມສືບຕໍ່ຮັກສາໄວ, ຈຸດອ່ອນເພື່ອປັບປຸງໃຫ້ດີຂື້ນ ແລະ ຂໍ້ຫຍຸ້ງຍາກເພື່ອຮ່ວມກັນຄົ້ນຄວ້າຊອກຫາວິທີແກ້ໄຂ. ກອງປະຊຸມໄດ້ດໍາເນີນເປັນເວລາ 1 ວັນເຕັມ ແລະ ອັດລົງດ້ວຍຜົນສໍາເລັດຕາມລະດັບຄາດໝາຍທີ່ວາງໄວ້.

(ພາບ-ຂ່າວ: ສົມວິຈິດ ໄຊມົນຕີ)