ໃນວັນທີ 23 ສິງຫາ 2024 ນີ້ ທ່ານ ແກ້ວລັດຕະນະ ສີຫາວົງ ຮອງປະທານສະພາປະຊາຊົນແຂວງຈໍາປາສັກ, ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 15 ແຂວງຈຳປາສັກ ສົມທົບກັບທ່ານ ດຣ ວຽງສີ ສຸພັກດີ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໂຂງ, ທ່ານໄກສອນ ລາດຊະວົງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໂຂງ ແລະ ທ່ານ ປອ ສິດທິພອນ ບຸດຕິວົງ ສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໂຂງ ໄດ້ເຄື່ອນໄຫວພົບປະຢ້ຽມຢາມພະນັກງານຫຼັກແຫຼ່ງ ແລະ ຖະກອນ ຂອງອົງການປົກຄອງເມືອງໂຂງ ໂດຍໄດ້ການຕ້ອນຮັບຢ່າງອົບອຸ່ນ ຈາກ ທ່ານ ນາງ ຄໍາພູ ລິດທິສັກ ກຳມະການພັກແຂວງ, ເລຂາພັກເມືອງ, ເຈົ້າເມືອງເມືອງໂຂງ ແລະບັນດາທ່ານໃນຄະນະນໍາ ພ້ອມດ້ວຍພະນັກງານ-ລັດຖະກອນຂອງເມືອງໂຂງ

ການເຄື່ອນໄຫວຂອງ ທ່ານ ແກ້ວລັດຕະນະ ຮອງປະທານສະພາປະຊາຊົນແຂວງຈໍາປາສັກ ພ້ອມຄະນະ ໄດ້ຮັບຟັງການລາຍງານ ຫຍໍ່ກ່ຽວກັບສະພາບລວມ ແລະ ການຈັດຕັ້ງປະຕິບັດວຽກງານໃນໄລຍະຜ່ານມາຂອງອົງການປົກຄອງເມືອງໂຂງ ຈາກທ່ານ ນາງຄໍາພູ ລິດທິສັກ ເຈົ້າເມືອງເມືອງໂຂງ. ໃນໂອກາດດັ່ງກ່າວນີ້, ທ່ານຮອງປະທານສະພາປະຊາຊົນແຂວງຈໍາປາສັກ ພ້ອມຄະນະ ໄດ້ພົບປະໂອ້ລົມໂດຍນໍາສະເໜີເອົາເນື້ອໃນສຳຄັນຕ່າງໆທີ່ໄດ້ຮັບຮອງໃນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຈໍາປາສັກ ຊຸດທີ II, ຕິດພັນກັບແນວທາງນະໂຍບາຍຂອງພັກ, ລະ ບຽບກົດໝາຍຂອງລັດ ມາເຜີຍແຜ່, ເຊື່ອມຊຶມ ໃຫ້ພໍ່ແມ່ປະຊາຊົນຜູ້ມີສິດເລືອກຕັ້ງຮັບຮູ້ເຂົ້າໃຈ. ພ້ອມດຽວກັນ, ອົງການປົກຄອງ ແລະ ພໍ່ແມ່ປະຊາຊົນທີ່ເຂົ່າຮ່ວມໃນການພົບປະຍັງໄດ້ໃຊ້ສິດປະຊາທິປະໄຕຂອງຕົນໃນການປະກອບຄໍາຄິດເຫັນ, ຄໍາສະເໜີ ຍົກໃຫ້ເຫັນຫຼາຍບັນຫາສໍາຄັນ ທີ່ເປັນບັນຫາຕິດພັນກັບຊີວິດການເປັນຢູ່ ແລະ ການພັດທະນາເສດຖະກິດ-ສັງຄົມ ຂອງທ້ອງຖິ່ນ ຕໍ່ກັບຄໍາສະເໜີຂອງປະຊາຊົນ ບັນດາທ່ານສະມາຊິກສະພາປະຊາຊົນແຂວງ ໄດ້ຊີ້ແຈງອະທິບາຍຕໍ່ບາງຄໍາສະເໜີໃຫ້ປະຊາຊົນໄດ້ເຂົ້າໃຈເຖິງສາເຫດ ແລະ ຄວາມຈໍາເປັນ ແລະ ຮັບເອົາຄໍາສະເໜີທີ່ເປັນບັນຫາໃຫຍ່ຕິດພັນກັບການຈັດຕັ້ງປະຕິບັດວຽກງານຂອງຂະແໜງການຕ່າງໆ ເຊິ່ງກອງເລຂາໄດ້ບັນທຶກຂໍ່ມູນຢ່າງລະອຽດ ເພື່ອນໍາໄປສັງລວມລາຍງານຕໍ່ຄະນະປະຈໍາສະພາປະຊາຊົນແຂວງຈໍາປາສັກ ພິຈາລະນາຊຸກຍູ້ໃຫ້ພາກສ່ວນກ່ຽວຂ້ອງແກ້ໄຂໃນຂັ້ນຕອນຕໍ່ໄປ. ຄະນະຂອງທ່ານຮອງປະທານສະພາປະຊາຊົນແຂວງຈໍາປາສັກ ຈະໄດ້ສຶບຕໍ່ລົງເຄື່ອນໄຫວອີກຫຼາຍຈຸດຂອງເຂດເລືອກຕັ້ງເມືອງມຸນລະປາໂມກ ຈິ່ງຈະສໍາເລັດຕາມຄາດໝາຍທີ່ວາງໄວ້.

ຂ່າວ-ພາບ: ແພງວິໄລ ສີອາລຸນ