ໃນວັນທີ 8 ສິງຫາ 2024 ທີ່ຜ່ານມາ ກອງປະຊຸມປະຈໍາເດືອນມີຖຸນາ 2024 ຂອງຄະນະປະຈໍາສະພາປະຊາຊົນແຂວງຈໍາປາສັກ ໄດ້ເປີດຂື້ນຢູ່ທີ່ສະພາປະຊາຊົນແຂວງຈໍາປາສັກ ໂດຍພາຍໃຕ້ການເປັນປະທານຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ, ປະທານຄະນະປະຈໍາສະພາປະຊາຊົນແຂວງຈໍາປາສັກ ມີ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຮອງປະທານຄະນະປະຈໍາສະພາປະຊົນແຂວງຈໍາປາສັກ, ທ່ານ ສົມສີ ມະນີນິນ ກໍາມະການພັກແຂວງ, ຮອງປະທານຄະນະປະຈໍາສະພາປະຊົນແຂວງຈໍາປາສັກ ບັນດາທ່ານໃນຄະນະປະຈໍາສະພາປະຊາຊົນແຂວງ, ຄະນະປະທານຄະນະກໍາມະການ, ຄະນະເລຂາທິການ, ຂະແໜງການ ແລະ ວິຊາການທີ່ກ່ຽວຂ້ອງເຂົ້າຮ່ວມ.

ກອງປະຊຸມຄະນະປະຈໍາສະພາປະຊາຊົນແຂວງ ປະຈໍາເດືອນກໍລະກົດ 2024 ໄດ້ຄົ້ນຄວ້າຫຼາຍບັນຫາສໍາ ຄື: ກອງປະຊຸມໄດ້ຮັບຟັງການລາຍງານກ່ຽວກັບການສະຫຼຸບຕີລາຄາຄືນຜົນການດໍາເນີນກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງຈໍາປາສັກ ຊຸດທີ II ແລະ ຜ່ານແຜ່ນການກະກຽມການຈັດຕັ້ງກິດຈະກໍາສະເຫຼີມສະຫຼອງວັນສ້າງຕັ້ງລັດຖະທໍາມະນູນ ແຫ່ງ ສປປ ລາວ ຈາກ ທ່ານ ທີບພະສອນ ສາມະເລີກ ເລຂາທິການສະພາປະຊາຊົນແຂວງ, ກອງປະຊຸມໄດ້ຮັບການຜ່ານແຜນການລົງເຄື່ອນໄຫວເຜີຍແຜ່ຜົສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ຂອງສະພາປະຊາຊົນແຂວງຈໍາປາສັກ ຊຸດທີ II ຈາກທ່ານ ແພງວິໄລ ສີອາລຸນ ຮອງເລຂາທິການສະພາປະຊາຊົນແຂວງ ເຊິ່ງກອງປະຊຸມ ໄດ້ປະກອບຄໍາເຫັນ ແລະ ຍົກຫຼາຍບັນຫາ ເພື່ອແລກປ່ຽນບົນພື່ນຖານຄວາມເປັນເອກະພາບ, ສອດຄ່ອງກັບການຈັດຕັ້ງປະຕິບັດວຽກງານຕົວຈິງ ແລະ ຮັບປະກັນຄວາມຖືກຕ້ອງກັບກົດໝາຍ. ນອກນີ້, ກອງປະຊຸມວິສາມັນຂອງຄະນະປະຈໍາສະພາປະຊາຊົນແຂວງຈໍາປາສັກ ໃນຄັ້ງນີ້, ຍັງໄດ້ຄົ້ນຄວາມປຶກສາຫາລືກ່ຽວກັບການຈັດຕັ້ງປະຕິບັດ ແຈ້ງການຂອງພະແນກການເງິນ, ຄົ້ນຄວ້າປຶກສາຫາລືໜັງສືສະເໜີ ແລະ ວຽກງານປິ່ນອ້ອມຂອງສະພາປະຊາຊົນແຂວງຈໍາປາສັກ ອີກຈໍານວນໜຶ່ງ.

ໃນຕອນທ້າຍ, ທ່ານ ສາຍທອງ ໄຊຍະວົງ ປະທານກອງປະຊຸມໄດ້ສະຫຼຸບຄືນບັນດາຄໍາຄິດເຫັນ ແລະ ຊີ້ນໍາໃຫ້ຄະນະກໍາມະການ, ຄະນະເລຂາທິການ ແລະ ຂະແໜງການຂອງສະພາປະຊາຊົນແຂວງຈໍາປາສັກ ຈົ່ງພ້ອມກັນສືບຕໍ່ຈັດຕັ້ງປະຕິບັດໜ້າທີ່ຄວາມຮັບຜິດຊອບ ແລະ ນໍາເອົາເນື້ອໃນຈິດໃຈທີ່ຄົ້ນຄວ້າພິຈາລະນາ ແລະ ເອກະພາບໃນກອງປະຊຸມຄັ້ງນີ້ໄປຈັດຕັ້ງປະຕິບັດໃຫ້ມີຜົນສໍາເລັດ.

(ພາບ-ຂ່າວ: ສົມວິຈິດ ໄຊມົນຕີ)