(ສພຊ) – ຕອນສວາຍວັນທີ 24 ຕຸລາຜ່ານມາ ທີ່ຫ້ອງວ່າການປົກຄອງນະ ຄອນຫຼວງວຽງຈັນ ໄດ້ມີພິທີມອບ-ຮັບອຸປະກອນໄອທີ ທີ່ໄດ້ຮັບການສະໜັບສະໜູນຈາກກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າ ເພື່ອມອບໃຫ້ແກ່ສະພາປະຊາຊົນນະຄອນຫຼວງວຽງຈັນ (ສປນວ) ເຊິ່ງຕາງໜ້າມອບໂດຍທ່ານ ປອ. ບຸນທັນ ບຸນວິໄລ ຮອງເລຂາທິການສະພາແຫ່ງຊາດ ແລະ ຮັບໂດຍທ່ານ ນາງ ລຳພອຍ ສີອັກຄະຈັນ ຮອງປະທານສະພາປະຊາຊົນນະຄອນຫຼວງວຽງຈັນ, ມີບັນດາທ່ານຫົວໜ້າຄະນະສະມາຊິກສະພາປະຊາຊົນນະຄອນ ຫຼວງວຽງຈັນ (ສສນວ) ປະຈຳເຂດເລືອກຕັ້ງ 9 ເມືອງທົ່ວນະຄອນຫຼວງວຽງຈັນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ນະຄະເສນ ສີຫາລາດ ເລຂາທິການສະພາປະຊາຊົນນະຄອນຫຼວງວຽງຈັນ ໄດ້ກ່າວຈຸດປະສົງ ພ້ອມທັງລາຍງານແຜນການຈັດສັນອຸປະກອນໄອທີທີ່ໄດ້ຮັບການຊ່ວຍເຫຼືອທັງໝົດຄື: ແທັບເລັດ (Tablet) 31 ໜ່ວຍ, ຄອມພິວເຕີຕັ້ງໂຕະ 10 ຊຸດ, ຄອມພິວເຕີຕັ້ງຕັກ (Laptop) 6 ໜ່ວຍ, ກ້ອງບັນທຶກວິດີໂອ 2 ໜ່ວຍ ເຊິ່ງອຸປະກອນທັງໝົດນີ້ ສປນວ ໄດ້ຂຶ້ນແຜນຈັດສັນການນຳໃຊ້ຕາມຄຳແນະນຳຂອງກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າ ກໍຄືສະພາແຫ່ງຊາດ ເພື່ອນຳໃຊ້ເຂົ້າໃນການເຄື່ອນໄຫວວຽກງານຂອງສະພາປະຊາຊົນນະຄອນຫຼວງ ແລະ ຄະນະ ສສນວ ປະຈຳເຂດເລືອກຕັ້ງ 9 ເມືອງ ໃຫ້ເກີດຜົນປະໂຫຍດສູງສຸດ ເປັນຕົ້ນການສະໜອງເອກະສານກອງປະຊຸມຕ່າງໆ ຜ່ານລະບົບເອເລັກໂຕຣນິກ.

(ອານຸສອນ ພູມມີທອນ)