(ສພຊ) – ລະຫວ່າງວັນທີ 19-21 ຕຸລາ 2024 ບັນດາພັນລະຍາຂອງຫົວໜ້າຄະນະຜູ້ແທນລັດຖະສະພາ ຈາກບັນດາປະເທດສະມາຊິກອາຊຽນ ແລະ ປະເທດອື່ນໆ ທີ່ເດີນທາງມາເຂົ້າຮ່ວມກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ແລະ ກອງປະຊຸມປິ່ນອ້ອມ ທີ່ ສປປລາວ ເປັນເຈົ້າພາບ ໄດ້ເຄື່ອນໄຫວຢ້ຽມຊົມສະຖານທີ່ທ່ອງທ່ຽວສໍາຄັນດ້ານວັດທະນະທຳຢູ່ນະຄອນຫຼວງວຽງຈັນ ເຊິ່ງນໍາພາຄະນະ ໂດຍທ່ານ ດຣ. ນາງ ວິພາວັນ ພົມວິຫານ ພັນລະຍາທ່ານປະທານສະພາແຫ່ງຊາດລາວ, ປະທານໄອປາ 45.

ພາຍຫຼັງເຂົ້າຮ່ວມພິທີເປີດກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ຢ່າງເປັນທາງການ, ບັນດາທ່ານພັນລະຍາ ໄດ້ໄປຢ້ຽມຊົມຫ້ອງມູນເຊື້ອ ແລະ ຫ້ອງປະຊຸມສະພາແຫ່ງຊາດ, ສະຖາປັດຕະຍະກຳເກົ່າແກ່ພະທາດຫຼວງວຽງຈັນ, ສູນວາງສະແດງຫັດຖະກຳສິນຄ້າໂອດັອບ ຈໍາປາລ້ານຊ້າງ, ສູນວາງສະແດງ ແຜ່ນແພພື້ນເມືອງລາວ (ເຮືອນຂາວ ຂ້າງຫໍຄໍາ). ຈາກນັ້ນ, ໄປຢ້ຽມຊົມຫໍວາງສະແດງສິນສາຍໄໝ ຢູ່ບ້ານຊຽງຍືນ ເມືອງຈັນທະບູລີ ເຊິ່ງເປັນອີກສະຖານທີ່ໜຶ່ງທີ່ສູນກາງສະຫະພັນແມ່ຍິງລາວ ໄດ້ສ້າງຕັ້ງຂຶ້ນເພື່ອສົ່ງເສີມ ແລະ ປົກປັກຮັກສາມູນເຊື້ອດ້ານຫັດຖະກຳຕ່ຳຫູກ-ທໍໄໝຂອງແມ່ຍິງລາວ ທີ່ຮູ້ປູກມອນ, ລ້ຽງມ້ອນຜະລິດເສັ້ນໄໝຍ້ອມສີທຳມະຊາດ ແລະ ຕໍ່າເປັນລວດລາຍຫຼາກຫຼາຍ ມາເປັນເວລາຢ່າງໜ້ອຍ 5 ພັນປີ; ດັ່ງນັ້ນ, ໃນປີ 1992 ສູນກາງສະຫະພັນແມ່ຍິງລາວ ຈຶ່ງໄດ້ດຳເນີນໂຄງການອະນຸລັກ ແລະ ສົ່ງເສີມສິນສາຍໄໝ ເພື່ອສົ່ງເສີມ ແລະ ພື້ນຟູການລ້ຽງ ມ້ອນສາວໄໝ, ອາຊີບເຮັດຫູກທໍໄໝ ແລະ ຫັດຖະກຳອື່ນໆຂອງແມ່ຍິງລາວ ທັງເປັນບ່ອນສະສົມຜ້າອາພອນທີ່ມີດອກດວງລວດລາຍອັນປານີດ ທີ່ໄດ້ມາຈາກສີໄມ້ລາຍມືອັນເປັນເອກະລັກຂອງແມ່ຍິງລາວບັນດາເຜົ່າ.

ໃນໂອກາດນີ້, ທ່ານ ດຣ. ນາງ ວິພາວັນ ພົມວິຫານ ພ້ອມດ້ວຍຄະນະພັນລະ ຍາການນຳສະພາແຫ່ງຊາດ ແຫ່ງ ສປປລາວ ຍັງໄດ້ຈັດພິທີບາສີສູ່ຂວັນຕາມຮີດຄອງປະເພນີລາວ ແລະ ງານລ້ຽງອາຫານທ່ຽງ ເພື່ອເປັນສິລິມຸງຄຸນແກ່ຄະນະພັນລະຍາຜູ້ແທນຕ່າງປະເທດນໍາອີກ, ເຊິ່ງຈັດຂຶ້ນທີ່ໂຮງແຮມ ດັບເບິນທຣີ ບາຍ ຮິວຕັນ.

ຕອນຄໍ່າວັນທີ 21 ຕຸລານີ້, ຄະນະພັນລະຍາຂອງຫົວໜ້າຄະນະຜູ້ແທນກອງປະຊຸມສະມັດຊາໃຫຍ່ໄອປາ ຈະໄດ້ເຂົ້າຮ່ວມງານລ້ຽງ ໂດຍການເປັນເຈົ້າພາບຂອງປະທານສະພາແຫ່ງຊາດ ທ່ານ ປອ. ໄຊສົມພອນ ພົມວິຫານ.

(ນາງ ໄຊໂສພາພອນ ມິ່ງມຸງຄຸນ)