ການ​ດຳ​ເນີນ​ກອງ​ປະຊຸມ ສະ​ໄໝ​ສາມັນ ​ເທື່ອ​ທີ 5  ຂອງ​ສະພາ​ແຫ່ງ​ຊາດ ຊຸດ​ທີ VIII ​​ໃນຕອນ​ເຊົ້າ ​ວັນ​ທີ 7 ມິຖຸນາ 2018 ນີ້,  ບັນດາລັດຖະມົນຕີກະຊວງທີ່ກ່ຽວ ຂ້ອງໄດ້ມີການຊີ້ແຈງຂໍ້ຊັກຖາມ  ແລະ ບັນຫາທີ່ສົນໃຈ ຂອງສະມາຊິກສະພາແຫ່ງຊາດ(ສສຊ)  ເຊິ່ງປະກອບມີ ທ່ານ ສົມດີ ດວງດີ ຮອງນາຍົກລັດຖະມົນຕີ,  ລັດຖະມົນຕີກະຊວງການເງິນ ຊີ້ແຈງການແກ້ໄຂບັນຫາໜີ້ 3 ແຈ;  ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ  ແລະ ການລົງທຶນ ຊີ້ແຈງ 3 ບັນຫາ​ຄື:  ການ​ຄິດ​ໄລ່ ລາຍ​ຮັບ​ແຫ່ງ​ຊາດ ຫລື ຈີ​ເອັນ​ໄອ ກັບ ລວມຍອດ​ຜະລິດ​ຕະພັນ​ພາຍ​ໃນ ຫລື ຈີ​ດີ​ພີ,  ກົນ​ໄກ​ການ​ສ້າງ​ແຜນ​ໂຄງ ການ​ລົງທຶນ​ຂອງ​ລັດ  ມູນ​ຄ່າ 20 ຕື້​ກີບຂຶ້ນ​ໄປ ​ແລະ ກົນ​ໄກ​ການ​ປະສານ​ງານ  ​ໃນ​ການ​ຄຸ້ມ​ຄອງ​ໂຄງການ​ລົງທຶນ​ຂອງ​ລັດ  ຕາມ​ຂະ​ແໜງການ.

ສ່ວນທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ ວັດທະນະ ທຳ ແລະ ທ່ອງທ່ຽວ  ​ໄດ້​ຊີ້​ແຈງ​ກ່ຽວກັບ​ການ​ແກ້​ໄຂ​ສິ່ງ​ກີດຂວາງຂອງການ ດຳ​ເນີນ​ທຸລະ​ກິດ​ທ່ອງ​ທ່ຽວ, ພ້ອມ​ທັງຊີ້​ໃຫ້​ຜົນສຳ​ເລັດ​ ການ​ຈັດ​ກິດຈະກຳ​ສະຫລອງ​ປີ​ທ່ອງ​ທ່ຽວລາວ,  ທັງ​ຍົກ​ໃຫ້ເຫັນ​ຕົວ​ເລກ​ນັກ​ທ່ອງ​ທ່ຽວ​ເຂົ້າ​ມາ ສປປ ລາວ  ​ໃນ​ໄຕ​ມາດ​ທຳ​ອິດ​ຂອງ​ປີ 2018 ​ເພີ່ມ​ຂຶ້ນ 2%.  ​ເຖິງ​ວ່າ​ຈະ​ເພີ່ມ​ຂຶ້ນ​ເລັກໜ້ອຍ ​ແຕ່​ເຫັນ​ວ່າ​ກວມ 60%  ຂອງ​ປະຊາກອນ​ລາວ;  ພ້ອມ​ນີ້, ​ທ່ານນາງ ​ແສງ​ເດືອນ ຫລ້າ​ຈັນທະ​ບູນ ລັດຖະມົນຕີ​ກະຊວງ​ສຶກສາ​ທິການ ​ແລະ ກິລາ  ກໍ​ໄດ້​ຂຶ້ນຊີ້​ແຈງ 2 ບັນຫາ​ຄື:  ການ​ປະຕິບັດ​ນະ​ໂຍບາຍຕໍ່ນັກຮຽນ​ໂຮງ ຮຽນຊົນ​ເຜົ່າ  ​ແລະ ການ​ຈັດ​ແບ່ງ​ໂກ​ຕາລັດຖະກອນ​ຄູ​ປີ 2018  ​ແລະ ໃນ​ໂອກາດ​ດັ່ງກ່າວ, ບັນດາ​ ສສຊ ປະຈໍາ​ເຂດ​ເລືອກ​ຕັ້ງຕ່າງໆ  ກໍໄດ້​ສຸມ​ໃສ່ປະກອບ​ຄຳ​ຄິດ​ຄຳ​ເຫັນ ພ້ອມ​ທັງ​ຊັກ​ຖາມ ​ຫລາຍ​ບັນຫາ​ທີ່​ມີ​ຄວາມ​ສົນ​ໃຈ ​ແລະ ​ໄດ້​ຮັບ​ການ​ຊີ້​ແຈງ​ກັບ​ທີ່.

​ໃນ​ຕອນ​ເຊົ້າ​ວັນ​ດຽວກັນ, ທີ່​ປະຊຸມ​ຍັງ​ໄດ້​ຮັບ​ຟັງ ​ບົດ​ລາຍ​ງານ​ຂອງ​ລັດຖະບານ ກ່ຽວກັບ​ການ​ປະຕິ ບັດມະຕິ​ກອງ​ປະຊຸມ​ສະພາ​ແຫ່ງ​ຊາດວ່າ​ດ້ວຍ ​ການ​ອອກນິຕິ​ກຳລຸ່ມກົດໝາຍ​; ບົດ​ລາຍ​ງານ​ຂອງ​ລັດຖະບານ ກ່ຽວກັບ​ການ​ປະຕິບັດມະຕິ ​ກອງ​ປະຊຸມ​ສະພາ​ແຫ່ງ​ຊາດ ວ່າ​ດ້ວຍ ​ຜົນ​ກະທົບ​ຈາກ​ການ​ນຳ​ໃຊ້​ສານ​ເຄມີ​ອັນຕະລາຍ​ເກີນ​ຄ່າ​ມາດຕະຖານ  ຕໍ່ສິ່ງ​ແວດ​ລ້ອມ, ສັງຄົມ ​ແລະ ທຳ​ມະ​ຊາດ. ສ່ວນ​ຕອນ​ບ່າຍ ກອງ​ປະຊຸມ​ຈະ​ໄດ້​ຮັບ​ການ​ຊີ້​ແຈງ  ຂອງ​ລັດຖະມົນຕີ​ກະຊວງ​ອຸດສາຫະກຳ ​ແລະ ການ​ຄ້າ ກ່ຽວກັບ​ໂຄງ​ປະກອບ​ລາຄາ​ນ້ຳມັນ ຢູ່ ສປປ ລາວ, ສາ​ເຫດການ​ເພີ່ມ​ຂຶ້ນ​ຂອງ​ລາຄາ​ນ້ຳມັນ  ທີ່​ພວມ​ສົ່ງ​ຜົນ​ກະທົບ​ຕໍ່ການ​ຜະລິດ ​ແລະ ຊີວິດ​ການ​ເປັນ​ຢູ່​ຂອງ​ປະຊາຊົນ.