(ສພຊ) – ກອງປະຊຸມສໍາມະນາກ່ຽວກັບການເປັນປະທານກອງປະຊຸມກໍາມາທິການຕ່າງໆຂອງກອງປະຊຸມສະ ມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ໃຫ້ແກ່ການນໍາ ແລະ ສະມາຊິກສະພາແຫ່ງຊາດ (ສສຊ) ໄດ້ຈັດຂຶ້ນໃນວັນທີ 4 ຕຸລາຜ່ານມາ ໂດຍການເປັນປະທານຂອງທ່ານ ສັນຍາ ປຣະເສີດ ປະທານກຳ ມາທິການການຕ່າງປະເທດ, ຫົວໜ້າອະນຸກຳມະການກອງເລຂາໄອປາແຫ່ງຊາດ; ເຂົ້າຮ່ວມມີບັນດາທ່ານປະທານກອງປະຊຸມປິ່ນອ້ອມໄອປາ, ສສຊ ທີ່ສັງກັດໃນແຕ່ລະອະນຸກຳມະການ, ກອງເລຂາໄອປາ ພ້ອມດ້ວຍພາກສ່ວນທີ່ກ່ຽວຂ້ອງຈຳນວນໜຶ່ງ. ຈຸດປະສົງກໍເພື່ອກະກຽມຄວາມພ້ອມຮອບດ້ານໃນການກະກຽມເປັນເຈົ້າພາບຈັດກອງປະຊຸມໃຫຍ່ໄອປາ ຄັ້ງທີ 45 ໂດຍສະເພາະແມ່ນການເປັນປະທານກອງປະຊຸມ, ການຄວບຄຸມ ແລະ ບັນຊາກອງປະຊຸມ, ການປະກອບຄໍາເຫັນຕໍ່ກອງປະຊຸມ, ທັກສະໃນການເຈລະຈາ ແລະ ກົນໄກການພິຈາລະນາຕົກລົງບັນຫາຂອງໄອປາ ທັງເປັນການສະໜອງຂໍ້ມູນກ່ຽວກັບອົງການ, ບົດບາດ ແລະ ກົນໄກການດໍາເນີນງານຂອງໄອປາ.
ທ່ານ ສັນຍາ ປຣະເສີດ ມີຄຳເຫັນວ່າ: ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຄັ້ງທີ 45 ແລະ ກອງປະຊຸມພົບປະລະຫວ່າງຜູ້ນໍາອາຊຽນ ກັບ ຜູ້ນໍາໄອປາ, ໃນນາມທີ່ ສປປລາວ ເປັນເຈົ້າພາບ ຕ້ອງຮ່ວມແຮງຮ່ວມໃຈກັນກະກຽມຄວາມພ້ອມຮອບດ້ານ ເປັນຕົ້ນແມ່ນການເປັນປະທານກອງປະຊຸມ, ການເຈລະຈາການຕົກ ລົງຕັດສິນບັນຫາໃນກອງປະຊຸມ ໃຫ້ມີຄວາມເປັນກາງ, ການກະກຽມເນື້ອໃນຕ່າງໆ, ບົດອະທິບາຍ, ດ້ານວຽກງານບໍລິ ຫານ, ພິທີການ, ການສື່ສານ, ດ້ານພະລາທິການ ແລະ ໂລຊິສຕິກຕ່າງໆ ໃຫ້ແກ່ການຈັດກອງປະຊຸມລະດັບສາກົນດັ່ງກ່າວ ແລະ ໂດຍເຫັນໄດ້ຄວາມຈຳເປັນຄືແນວນັ້ນ, ກຳມາທິການການຕ່າງປະເທດ ກໍຄືຄະນະຮັບຜິດຊອບແຜນກິດຈະ ກຳເພື່ອຮັບໃຊ້ກອງປະຊຸມສະມັດຊາໃຫຍ່ໄອປາ ຈຶ່ງໄດ້ຈັດກອງປະຊຸມສຳມະນາຄັ້ງນີ້ ໂດຍເນັ້ນໃສ່ບັນຫາສໍາຄັນຄື: ການດໍາເນີນກອງປະຊຸມສະມັດຊາໃຫຍ່ໄອປາ ຄັ້ງທີ 45 ວາລະຂອງການປະຊຸມ ແລະ ບັນດາຂັ້ນຕອນຕ່າງໆ; ວິທີເປັນປະທານ ແລະ ການເຂົ້າຮ່ວມກອງປະຊຸມກຳມາທິການ: ພາລະບົດບາດຂອງປະທານກອງປະຊຸມ, ຜູ້ບັນທຶກກອງປະຊຸມ, ຜູ້ແທນ ແລະ ພະນັກງານຊ່ວຍວຽກຂອງປະເທດເຈົ້າພາບ; ການເຮັດຈໍາລອງການດໍາເນີນກອງປະຊຸມກໍາມາທິການການເມືອງ.
ໃນກອງປະຊຸມ, ພາຍຫຼັງທີ່ໄດ້ຮັບຟັງການໃຫ້ບົດຮຽນຄວາມຮູ້ຈາກວິທະຍາກອນຊ່ຽວຊານທີ່ມາຈາກຕ່າງປະເທດແລ້ວ, ບັນດາຜູ້ເຂົ້າຮ່ວມ ກໍໄດ້ສົນທະນາແລກປ່ຽນຄວາມຄິດເຫັນ ແລະ ຕັ້ງຄຳຖາມໃນຫົວຂໍ້ທີ່ມີຄວາມສົນໃຈ; ຈາກນັ້ນ, ກໍໄດ້ມີການເຮັດຈຳລອງກອງປະຊຸມວຽກງານການເມືອງ.
(ອານຸສອນ ພູມມີທອນ)