(ສພຊ) – ໃນພິທີເປີດຫ້ອງມູນເຊື້ອຂອງສະພາແຫ່ງຊາດ ຢ່າງເປັນທາງການ ໃນຕອນບ່າຍວັນທີ 30 ກັນຍາຜ່ານມາ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕາງໜ້າຮັບບັນດາວັດຖຸພັນ ແລະ ຂອງທີ່ລະລຶກຂອງທ່ານ ສະໝານ ວິຍະເກດ ອະດີດປະທານສະພາແຫ່ງຊາດຊຸດທີ III, IV ແລະ V; ຕາງໜ້າມອບໂດຍທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ເຊິ່ງປະກອບມີບັນດາເຄື່ອງເງິນເຊັ່ນ: ໂຖດອກໄມ້ ແລະ ອື່ນໆ.

ທ່ານ ປອ. ນາງ ສູນທອນ ໄຊຍະຈັກ ໄດ້ກ່າວສະແດງຄວາມຂອບໃຈ ແລະ ຮຽກຮ້ອງໃຫ້ບັນດາທ່ານ ຫາກມີວັດຖຸ ຫຼື ອຸປະກອນຕ່າງໆ ທີ່ເຫັນວ່າເປັນມູນເຊື້ອປະຫວັດສາດທີ່ກ່ຽວພັນເຖິງສະພາແຫ່ງຊາດແຕ່ລະຊຸດ ກໍສາມາດນຳມາປະກອບສ່ວນເຂົ້າໃນຫ້ອງມູນເຊື້ອຂອງສະພາແຫ່ງຊາດໄດ້.

(ສອນສັກ ວັນວິໄຊ)