ໃນວັນທີ1ມີິຖຸນາປີ2018 ພະນະ ທ່ານ ນາງ ປານີຢາທໍ່ຕູ້ ປະທານ ສະພາແຫ່ງຊາດລາວ ພ້ອມດ້ວຍຄະນະໄດ້ອອກເດີນທາງໄປຢ້ຽມຢາມ ສັນຖະວະໄມຕີ ຢ່າງເປັນທາງການ ຕາມຄຳເຊີນ ຂອງພະນະ ທ່ານ ສ.ຈ ພິເສດ ພອນເພັດ ພິຊິດຊົນໄຊ ປະທານສະພານິຕິບັນຍັດ ແຫ່ງຊາດ ແຫ່ງຣາຊະອານາຈັກໄທ. ພາຍຫຼັງທີ່ຄະນະໄປເຖິງທີ່ສະໜາມບິນນານາຊາດສຸວັນນະພູມ ບາງກອກ ປະເທດໄທ ຄະນະໄດ້ຮັບການຕ້ອນຮັບຢູ່ທີ່ຫ້ອງກຽດຕິຍົດ ຈາກຮອງສາດສະດາຈານ ທ່ານ ນາງ ສຸມົນທາ ພອນຫົມບຸນ ປະທານມິດຕະພາບສະມາຊິກລັດຖະສະພາໄທ – ລາວ, ມີທ່ານ ທູດລາວປະຈຳບາງກອກປະເທດໄທ ແລະ ທູດໄທ ປະຈຳ ສປປ ລາວ ແລະ ເຈົ້າໜ້າທີ່ລະດັບສູງທັງສອງຝ່າຍອອກຕ້ອນຮັບຢ່າງພ້ອມພຽງ.
ຫຼັງຈາກນັ້ນ, ຄະນະກໍ່ໄດ້ເດີນທາງໄປຢ້ຽມຊົມໂຄງການກໍ່ສ້າງ ອາຄານລັດຖະສະພາຫຼັງໃໝ່ໂດຍໄດ້ຣັບ ການຕ້ອນຮັບຈາກພະນັກງານ ແລະ ຮັບຊົມການບັນຍາຍໂດຍຫຍໍ້ຕໍ່ກັບການກໍ່ສ້າງໂຄງການ ດັ່ງກ່າວ. ຕໍ່ມາໃນວັນດ່ຽວກັນນັ້ນ ພະນະ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ພ້ອມດ້ວຍຄະນະ ກໍ່ໄດ້ເຂົ້າຢ້ຽມພົບປະກັບພະນະທ່ານ ພົນເອກປຣະຢຸດ ຈັນໂອຊາ ນາຍຍົກລັດຖະມົນຕີ ແຫ່ງຣາຊະອານາຈັກໄທ ທີ່ຫ້ອງສີງາຊ້າງ ຕຶກໄທ ຄູ່ຟ້າ ທຳນຽບລັດຖະບານການພົບປະໃນຄັ້ງນີ້ ປະທານສະພາແຫ່ງຊາດລາວ ກໍ່ໄດ້ແຈ້ງຈຸດປະສົງໃນການຢ້ຽມຢາມຣາຊະອານາຈັກໄທ ຕໍ່ກັບທ່ານນາຍຍົກລັດຖະມົນຕີແຫ່ງຣາຊະອານາຈັກໄທ ແລະ ພະນະທ່ານພົນເອກ ປຣະຢຸດ ຈັນໂອຊາ ນາຍຍົກລັດຖະມົນຕີແຫ່ງຣາຊະອານາຈັກໄທ ກໍ່ໄດ້ສະແດງການຕ້ອນ ຮັບຢ່າງອົບອຸ່ນ ແລະ ຕີລາຄາສູງຕໍ່ກັບການຢ້ຽມຢາມ ສັນຖະວະໄມຕີໃນຄັ້ງນີ້ ຂອງຄະນະຜູ້ແທນຂັ້ນສູງຂອງສະພາແຫ່ງຊາດລາວ ເຊິ່ງມັນເປັນການປະກອບສ່ວນ ເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ຖານບ້ານໃກ້ເຮືອນຄຽງທີ່ມີແຕ່ດົນນານ ລະຫວ່າງສອງປະເທດລາວ ແລະ ໄທ ໃຫ້ຈະເລີນງອກງາມຂື້ນ. ຕໍ່ມາ, ຄະນະກໍ່ໄດ້ໄປວາງພວງມາລາທີ່ອານຸສາວະລີ ພະບາດສົມເດັດພະປົກເກົ້າເຈົ້າຢູ່ຫົວຣາຊະການ ທີ 7 ທີ່ຫນ້າລັດຖະສະພານພາຄະນະໂດຍ ພະນະ ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດລາວ. ສ່ວນພິທີພົບປະສອງຝ່າຍຂອງສອງສະພາ ແມ່ນໄດ້ຈັດຂື້ນທີ່ອາຄານລັດຖະສະພາແຫ່ງຣາຊະອານາຈັກໄທ ຝ່າຍລາວ ນຳໂດຍ ພະນະ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ແລະ ຝ່າຍໄທ ນຳໂດຍ ພະນະທ່ານ ສ.ຈ ພິເສດ ພອນເພັດ ພິຊິດຊົນໄຊ ປະທານສະພານິຕິບັນຍັດ ແຫ່ງຊາດ ແຫ່ງຣາຊະອານາຈັກໄທ. ການພົບປະໃນຄັ້ງນີ້ທັງສອງຝ່າຍຕ່າງກໍ່ຕີລາຄາສູງຕໍ່ກັບການພົວພັນ ແລະ ການຮ່ວມມື ຂອງສອງປະເທດ ເຊິ່ງ ເຫັນວ່າ ນັບມື້ນັບຂະຫຍາຍຕົວດີຂື້ນ ເຊິ່ງມັນສະແດງອອກ ໂດຍຜ່ານການແລກປ່ຽນການຢ້ຽມຢາມຂອງ ຄະນະຜູ້ແທນຂັ້ນສູງຂອງລັດຖະບານ, ບັນດາຂະແໜງການໃນລະດັບສູນກາງ ແລະ ທ້ອງຖິ່ນ. ລັດຖະບານ ສອງປະເທດ ໄດ້ມີການຮ່ວມມືກັນຫລາຍດ້ານ ໂດຍຜ່ານຫຼາຍກົນໄກການຮ່ວມມື ແລະ ໄດ້ຮ່ວມກັນລົງນາມ ໃນສັນຍາ, ສົນທິສັນຍາ, ຂໍ້ຕົກລົງບັນທຶກຊ່ວຍຈຳທີ່ກ່ຽວພັນເຖິງການຮ່ວມມື ແບບສອງຝ່າຍມີທັງໝົດ 60 ກ່ວາ ສະບັບ. ລັດຖະບານສອງປະເທດ ໄດ້ຮ່ວມມືກັນຮັກສາຄວາມເປັນລະບຽບຮຽບຮ້ອຍ ຕາມບໍລິເວນຊາຍແດນ ແລະ ຮອດປີ2020ສອງຝ່າຍຕົກລົງນຳກັນວ່າ: ຈະແກ້ໄຂການປັກຫຼັກຊາຍແດນທາງບົກໃຫ້ສຳເລັດ ແລະ ຮອດ ປີ 2021 ການປັກຫຼັກຊາຍແດນທາງນໍ້າໃຫ້ສໍາເລັດເຊັ່ນດ່ຽວກັນ. ສ່ວນການຮ່ວມມືທາງດ້ານການຄ້າເຫັນວ່າ ໃນ ປີ 2017 ມີມູນຄ່າຮ່ວມກັນເຖິງ 6,2 ຕື້ໂດລາສະຫະລັດ ຖ້າທຽບໃສ່ໃນປີ 2016 ແມ່ນເພີ່ມຂື້ນ 6 ສ່ວນ ຮ້ອຍ.ໃນນີ້ ການສົ່ງອອກຂອງລາວໄປ ໄທມີມູນຄ່າ 2,2 ຕື້ໂດລາສະຫະລັດ, ການນຳເຂົ້າຂອງລາວຈາກໄທ ແມ່ນ 3,9 ຕື້ໂດລາສະຫະລັດ. ຄາດວ່າໃນປີ2020 ມູນຄ່າການລົງທຶນທັງສອງປະເທດຈະບັນລຸໄດ້ 10 ຕື້ໂດລາ ສະຫະລັດ . ການລົງທຶນຂອງໄທຢູ່ລາວມາຮອດປັດຈຸບັນແມ່ນຢືນຢູ່ໃນອັນດັບ2ຂອງການລົງທຶນຕ່າງປະເທດຢູ່ ສປປລາວ ຖັດຈາກ ສປ ຈີນ ເຊິ່ງມີມູນຄ່າການລົງທຶນ 4,5 ຕື້ໂດລາສະຫະລັດໃນ 758 ໂຄງການ. ການ ຮ່ວມມືດ້ານພະລັງງານ ໃນປີ2017ລາວໄດ້ຂາຍກະແສໄຟາຟ້າໃຫ້ຝ່າຍໄທຈຳນວນ 3.801 ເມກາວັດ. ແລະ ຮອດສົກປີ 2020-2021 ຝ່າຍໄທຈະຊື້ໄຟຟ້າເພີ່ມລວມເປັນ 9,000 ເມກາວັດ. ສວ່ນການຮ່ວມມືທາງດ້ານແຮງ ງານ ແລະ ການຄ້າມະນຸດເຫັນວ່າສອງປະເທດ ໄດ້ເອົາໃຈໃສ່ໃນການປົກປ້ອງສິດທິແຮງງານລາວ ທີ່ໄປອອກ ແຮງງານໃນໄທ, ລັດຖະບານໄທຍັງຈະສືບຕໍ່ກໍ່ສ້າງສີມືແຮງງານລາວ ແລະ ສືບຕໍ່ຊ່ວຍເຫຼືອສູນພັດທະນາສັງ ຄົມມິດຕະພາບລາວ-ໄທ ຢູ່ແຂວງວຽງຈັນ ສ່ວນການພົວພັນຮ່ວມມືຂອງສອງສະພາ ເຫັນວ່າເປັນປົກະຕິແລະ ຕໍ່ ເນື່ອງຊຶ່ງສອງສະພາໄດ້ມີການແລກປ່ຽນການຢ້ຽມຢາມ ໃນລະດັບສູງເຖິງລະດັບວິຊາການ. ນອກຈາກນັ້ນ, ສອງ ສະພາລາວ-ໄທ ຍັງເປັນສະມາຊິກຂອງສະພາລັດຖະສະພາສາກົນ, ອົງການສະມັດຊາລັດຖະສະພາລະຫວ່າງ ຊາດອາຊຽນ (ໄອປາ) ອົງການສະມັດຊາສະພາພາກພື້ນຈຳນວນໜື່ງ ແລະ ມີຫລາຍໂອກາດໄດ້ເຂົ້າຮ່ວມ ເຄື່ອນໄຫວວຽກງານ ນຳອົງການດັ່ງກ່າວ ແລະ ຍັງໄດ້ມີການແລກປ່ຽນ ແລະ ປຶກສາຫາລືຮ່ວມກັນໃນຫລາຍ ດ້ານຕື່ມອີກ. ສຳລັບຕອນຄໍ່າຂອງວັນດ່ຽວກັນນີ້ ປະທານສະພານິຕິບັນຍັດແຫ່ງຣາຊະອານາຈັກໄທ ໄດ້ຈັດງານ ລ້ຽງຕ້ອນຮັບພະນະ ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ຢ່າງສົມກຽດ ເນື່ອງໃນໂອກາດ ທີ່ຄະນະຜູ້ແທນຂັ້ນສູງຂອງສະພາແຫ່ງຊາດລາວ ໄດ້ມາເຄື່ອນໄຫວຢ້ຽມຢາມສັນຖະວະໄມຕີ ທີ່ຣາຊະອານາຈັກໄທໃນຄັ້ງນີ້.