ໂອກາດທີ່ທ່ານ ພົທ ສຸວອນ ເລືອງບຸນມີ ກໍາມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ເດີນທາງມາເຄື່ອນໄຫວເຮັດວຽກຢູ່ທີ່ເມືອງລະຄອນເພັງ ແລະ ເມືອງສາລະວັນ ແຂວງສາລະວັນ ໃນລະຫວ່າງວັນທີ 30 ກັນຍາ-1 ຕຸລາ 2024 ນີ້, ເພື່ອຕິດຕາມກວດກາ ແລະ ຮັບຟັງການລາຍງານ ກ່ຽວກັບ ການຈັດຕັ້ງປະຕິບັດວຽກງານ ການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຕາມທິດ 3 ສ້າງ ຂອງເມືອງລະຄອນເພັງ ແລະ ເມືອງສາລະວັນ;

ທ່ານ ທອງດີ ຈັນທະວົງ ເລຂາພັກ ເຈົ້າເມືອງລະຄອນເພັງ ໄດ້ລາຍງານໃຫ້ຊາບວ່າ:  ເມືອງລະຄອນເພັງ ແມ່ນເມືອງໜຶ່ງທີ່ຂຶ້ນກັບແຂວງສາລະວັນ ມີບ້ານທັງໝົດ 75 ບ້ານ, ມີ 9.965 ຫຼັງຄາເຮືອນ, ມີ 12.186 ຄອບຄົວ, ພົນລະເມືອງທັງໝົດ 56.503 ຄົນ, ຍິງ 27.903 ຄົນ, ມີ 2 ເຜົ່າຊົນ ຄື ເຜົ່າລາວ ກວມ 95%, ເຜົ່າກະຕາງ 5%; ເຊິ່ງປະກອບມີ 4 ຈຸດສຸມພັດທະນາທີ່ເປັນບູລິມະສິດ ຄື: ຈຸດສຸມເທດສະບານເມືອງ (ບ້ານລະຄອນສີ), ຈຸດສຸມບ້ານພູຖໍ້າພວງ, ຈຸດສຸມບ້ານປາກຕະພານ ແລະ ຈຸດສຸມບ້ານແບ່ງ; ຜ່ານການຈັດຕັ້ງປະຕິບັດ ແລະ ປະເມີນ ປີ 2022-2024 ວຽກງານການສ້າງເມືອງໃຫ້ເປັນຫົວໜ່ວຍເຂັ້ມແຂງຮອບດ້ານ ໃນ 5 ດ້ານ, 47 ຕົວຊີ້ບອກ ສາມາດບັນລຸໄດ້ 2 ດ້ານຄື: ດ້ານການກໍ່ສ້າງພັກ-ພະນັກງານ ແລະ ດ້ານວັດທະນະທໍາ-ສັງຄົມ; ຊຶ່ງລວມຕົວຊີ້ບອກບັນລຸ 40 ຕົວຊີ້ບອກ ເທົ່າກັບ 85%, ບໍ່ບັນລຸ 3 ດ້ານ 7 ຕົວຊີ້ບອກ ເທົ່າກັບ 15% ແລະ ການສ້າງບ້ານເປັນຫົວໜ່ວຍພັດທະນາ ໃນ 4 ດ້ານ, 30 ຕົວຊີ້ບອກ ມີ ບ້ານທີ່ບັນລຸມາດຖານບ້ານເປັນຫົວໜ່ວຍພັດທະນາ ໃນ 4 ດ້ານ ຈໍານວນ 26 ບ້ານ ແລະ ບ້ານບໍ່ບັນລຸ ມາດຖານ ຈໍານວນ 49 ບ້ານ;

ທ່ານ ຈັນສີລອນ ສີສົມບູນ ເລຂາພັກ ເຈົ້າເມືອງສາລະວັນ ໄດ້ລາຍງານໃຫ້ຊາບວ່າ: ຜ່ານການຜັນຂະຫຍາຍວຽກງານ 03 ສ້າງເຂົ້າສູ່ລວງເລິກ ໂດຍສຸມໃສ່ທຸກກໍາລັງແຮງເຂົ້າໃນການພັດທະນາ ແລະ ແກ້ໄຂຄວາມທຸກຍາກ ທົ່ວເມືອງ; ມີບ້ານພົ້ນທຸກ 112 ບ້ານ, ບ້ານທຸກຍາກ 12 ບ້ານ, ເທົ່າກັບ 9,67% ຂອງຈໍານວນບ້ານທັງໝົດໃນທົ່ວເມືອງ, ມີຄອບຄົວທຸກຍາກ 1.022 ຄອບຄົວ ເທົ່າກັບ 5% ຂອງຈໍານວນຄອບຄົວທັງໝົດ; ມີຄອບຄົວພັດທະນາ 11.710 ຄອບຄົວ ເທົ່າກັບ 45,92%. ຂອງຄອບຄົວທັງໝົດພາຍໃນບ້ານ, ບ້ານພັດທະນາ  40 ບ້ານ ເທົ່າກັບ 32 %; ໂດຍລວມ ການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແມ່ນໄດ້ຮັບການຈັດຕັ້ງປະຕິບັດ ແລະ ຜັນຂະຫຍາຍຢ່າງເປັນອັນລະອຽດແຕ່ຂັ້ນເມືອງຮອດຂັ້ນບ້ານ ເຮັດໃຫ້ມີຜົນສໍາເລັດຫຼາຍດ້ານ ເປັນຕົ້ນ: ບັນດາຂະແໜງການຂັ້ນເມືອງ ແລະ ບ້ານ ໄດ້ມີຄວາມຮັບຜິດຊອບສູງກວ່າເກົ່າ ໃນການຂຸດຄົ້ນທ່າແຮງ ແລະ ຄວາມອາດສາມາດ ບົ່ມຊ້ອນໃນທ້ອງຖິ່ນຕົນ; ຜ່ານການປະເມີນປະຈໍາປີ 2024 ວຽກງານການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ໃນ 05 ດ້ານ, 47 ຕົວຊີ້ບອກ, ສາມາດປະຕິບັດບັນລຸໄດ້ 3 ດ້ານ, 44 ຕົວຊີ້ບອກ ເທົ່າກັບ 79%, ຍັງບໍ່ທັນບັນລຸ  2 ດ້ານ 03 ຕົວຊີ້ບອກ ເທົ່າກັບ 21%, ສໍາລັບວຽກງານສ້າງບ້ານເປັນຫົວໜ່ວຍພັດທະນາ ໃນ 4 ດ້ານ, ໄດ້ 30 ຕົວຊີ້ບອກ ບັນລຸໄດ້ 23 ຕົວຊີ້ບອກ ຈໍານວນ 119 ບ້ານ ເທົ່າກັບ 96%, ຍັງບໍ່ທັນບັນລຸ  7 ຕົວຊີ້ບອກ ຈໍານວນ 5 ບ້ານ ເທົ່າກັບ 4%;

ໃນສອງເມືອງດັ່ງກ່າວທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມການຈັດຕັ້ງປະຕິບັດຂອງບ້ານເປົ້າໝາຍ ການສ້າງເປັນຫົວໜ່ວຍພັດທະນາ ຄື ບ້ານໜອງແວງ ເມືອງລະຄອນເພັງ ແລະ ບ້ານແສນວັງ ເມືອງສາລະວັນຕື່ມອີກ;

ພາບ-ຂ່າວ: ດີລໍາພົນ ພົມມະຈັນ