ເພື່ອເປັນການຍົກລະດັບຄວາມຮູ້, ຄວາມສາມາດໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ ສະມາຊິກສະພາປະຊາຊົນແຂວງ ໃນການຄົ້ນຄວ້າກຳແໜ້ນບັນດາກົດໝາຍ, ນິຕິກຳທີ່ກ່ຽວຂ້ອງ ໃຫ້ເຂົ້າໃຈ ເຖິງດ້ານຫຼັກການ, ຂັ້ນຕອນ ແລະ ວິທີການໃນການຄົ້ນຄ້ວາ, ພິຈາລະນາ, ການຕິດຕາມກວດກາ, ກົນໄກຕ່າງໆ ໃຫ້ມີປະສິດທິພາບ ແລະ ປະສິດທິຜົນສູງຂຶ້ນ; ໃນທ້າຍເດືອນ ກັນຍາ 2024 ທີ່ຜ່ານມານີ້,  ສະພາປະຊາຊົນແຂວງສາລະວັນ ໄດ້ຈັດກອງປະຊຸມຝຶກອົບຮົມສ້າງຄວາມຊຳນານໃຫ້ແກ່ ສະມາຊິກສະພາປະຊາຊົນແຂວງ, ພະນັກງານ-ວິຊາການຊ່ວຍວຽກ ສະມາຊິກສະພາປະຊາຊົນແຂວງ ປະຈໍາ 8 ຕົວເມືອງ; ໂດຍການເປັນປະທານກອງປະຊຸມຂອງທ່ານ ຂັນໄຊ ລັດຖະເຮົ້າ ຄະນະປະຈຳພັກແຂວງ, ຮອງປະທານສະພາປະຊາຊົນແຂວງ, ເຂົ້າຮ່ວມມີບັນດາທ່ານຄະນະປະຈໍາ ສະພາປະຊາຊົນແຂວງ, ສະມາຊິກສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ ຕະຫຼອດຮອດ ພະນັກງານ-ລັດຖະກອນ ພາຍໃນສະພາປະຊາຊົນແຂວງ ເຂົ້າຮ່ວມ 70 ກວ່າທ່ານ.

ໃນການຝຶກອົບຮົມ ຕະຫຼອດໄລຍະ 2 ວັນ, ນັກວິທະຍາກອນໄດ້ຍົກສູງຄວາມຮັບຜິດຊອບຂອງຕົນ ຖ່າຍຖອດຄວາມຮູ້ແຕ່ລະຫົວຂໍ້ ເປັນຕົ້ນ: ວິທິການຄົ້ນຄວ້າຄໍາຮ້ອງຂໍຄວາມເປັນທໍາ ຂອງສະພາປະຊາຊົນແຂວງ; ຮ່າງແບບຟອມໃບຢັ້ງຢືນຮັບຄໍາຮ້ອງຂໍຄວາມເປັນທໍາ; ວິທິການຄົ້ນຄວ້າ, ວິເຄາະ, ວິໃຈ ແລະ ສັງລວມເນື້ອໃນຄໍາຮ້ອງຂໍຄວາມເປັນທໍາ ຂອງວິຊາການ ຕໍ່ຄະນະກໍາມະການ ແລະ ຄະນະປະຈໍາສະພາປະຊາຊົນແຂວງ; ກົນໄກ ແລະ ວິທີການຕິດຕາມກວດກາຜູ້ພິພາກຂອງສານ ແຕ່ລະຂັ້ນຂອງຄະນະກໍາມະການສະພາປະຊາຊົນແຂວງ; ກົດໝາຍ ວ່າດ້ວຍການແກ້ໄຂຄໍາຮ້ອງທຸກ; ມະຕິ ວ່າດ້ວຍການຮັບ ແລະ ພິຈາລະນາຄໍາຮ້ອງຂໍຄວາມເປັນທໍາ ຂອງສະພາແຫ່ງຊາດ; ກົດໝາຍ ວ່າດ້ວຍທະນາຍຄວາມ; ບົດຮຽນການຕິດຕາມກວດກາຜູ້ພິພາກສາ ແລະ ການຄົ້ນຄວ້າແຕ່ງຕັ້ງ, ຍົກຍ້າຍ ແລະ ປົດຕໍາແໜ່ງຜູ້ພິພາກສາ ແລະ ລັດຖະກອນຕຸລາການ; ກົນໄກການປະສານງານລະຫວ່າງຄະນະກໍາມະການຍຸຕິທໍາ ກັບພະແນກການທີ່ກ່ຽວຂ້ອງ; ພ້ອມນັ້ນ, ໃນກອງປະຊຸມນັກສໍາມະນາກອນ ກໍ່ຍັງໄດ້ມີການສົນທະນາແລກປ່ຽນຄໍາຄິດ-ຄໍາເຫັນໃນແຕ່ລະຫົວຂໍ້ທີ່ນຳມາສະເໜີ ຢ່າງມີບັນຍາກາດສ້າງສັນ.

ກອງປະຊຸມຝຶກອົບຮົມ ໄດ້ຮັບການສະໜັບສະໜູນງົບປະມານຈາກ ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ (STEPS).

ພາບ-ຂ່າວ: ດີລໍາພົນ ພົມມະຈັນ