ເພື່ອປົກປ້ອງຜົນປະໂຫຍດຂອງລັດ, ລວມໝູ່ ລວມທັງສິດ ແລະ ຜົນປະໂຫຍດອັນຊອບທໍາ ຂອງພົນລະເມືອງ ເປັນການປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ກໍ່ຄືແຂວງສະຫວັນນະເຂດ, ໃນລະຫວ່າງວັນທີ 27 ຫາ 29 ກັນຍາ 2024, ທີ່ຫ້ອງປະຊຸມປົກຄອງເມືອງສອງຄອນ, ສະພາປະຊາຊົນແຂວງ ໄດ້ຈັດກອງປະຊຸມຝຶກອົບຮົມກ່ຽວກັບການສ້າງຄວາມເຂັ້ມແຂງ ແລະ ຍົກລະດັບຄວາມຮູ້ຄວາມເຂົ້າໃຈກ່ຽວກັບການຈັດຕັ້ງປະຕິບັດວຽກງານຂອງອົງການກວດກາແຫ່ງລັດ ໃຫ້ສະມາຊິກສະພາປະຊາຊົນແຂວງ, ພະນັກງານ-ລັດຖະກອນ ແລະ ຜູ້ປະສານງານ 14 ເມືອງ 1 ນະຄອນ, ພາຍໃຕ້ການເປັນປະທານຂອງທ່ານ ນາງ ພູທອນ ແກ້ວພູວົງ ຮອງປະທານຄະນະປະຈໍາສະພາປະຊາຊົນແຂວງ, ມີບັນດາທ່ານສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງ 14 ເມືອງ, 01 ນະຄອນ, ຮອງເລຂາທິການສະພາປະຊາຊົນແຂວງ, ນັກວິທະຍາກອນ ທີ່ມາຈາກກົມກວດກາແຫ່ງລັດ, ພະນັກງານ-ລັດຖະກອນ ພາຍໃນສະພາປະຊາຊົນແຂວງ ແລະ ຜູ້ປະສານງານ 14 ເມືອງ 1 ນະຄອນ ຈໍານວນຜູ້ເຂົ້າຮ່ວມທັງໝົດ 118 ທ່ານ, ຍິງ 44 ທ່ານ . 
ທ່ານ ນາງ ພູທອນ ແກ້ວພູວົງ ປະທານກອງປະຊຸມໄດ້ກ່າວເປີດກອງປະຊຸມຝຶກອົບຮົມ ໂດຍທ່ານໄດ້ຍົກໃຫ້ເຫັນບົດຮຽນທີ່ຈະໄດ້ນໍາສະເໜີໃນຄັ້ງນີ້ ແມ່ນມີຄວາມໝາຍຄວາມສໍາຄັນຫຼາຍ, ເພາະມັນຕິດພັນກັບໜ້າທີ່ຄວາມຮັບຜິດຊອບໂດຍກົງຂອງບັນດາທ່ານສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ-ນະຄອນ, ເວົ້າສະເພາະກໍ່ແມ່ນບັນດາທ່ານທີ່ເປັນປະທານອົງການກວດກາລັດຢູ່ຂັ້ນເມືອງ ຊຶ່ງໃນນີ້ບັນດາທ່ານຈະໄດ້ຮຽນຮູ້ ແລະ ລົງເລິກສະເພາະວຽກງານກວດກາລັດ, ການຕ້ານການສໍ້ລາດບັງຫຼວງ, ການຕິດຕາມກວດກາໂຄງການລົງທຶນຂອງລັດ ໂດຍສະເພາະແມ່ນການຕິດຕາມກວດກາ, ເກັບກໍາຂໍ້ມູນ ແລະ ຫຼັກຖານໃນການຈັດຕັ້ງປະຕິບັດນະໂຍບາຍ, ກົດໝາຍ, ລະບຽບການ, ສິດ ແລະ ໜ້າທີ່ຄວາມຮັບຜິດຊອບຂອງການຈັດຕັ້ງ ແລະ ບຸກຄົນ ຢູ່ໃນອົງການລັດ ແນ່ໃສ່ເຮັດໃຫ້ ອໍານາດລັດຂັ້ນທ້ອງຖິ່ນຂອງພວກເຮົາ ມີຄວາມໂປງໃສ, ເຂັ້ມແຂງ, ມີຄວາມສັກສິດໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ເທື່ອລະກ້າວ, ກອງປະຊຸມໄດ້ຮັບຟັງການບັນຍາຍເນຶື້ອໃນເອກະສານ ຈາກ ນັກວິທະຍາກອນ ມີ 04 ຫົວຂໍ້ ດັ່ງນີ້: 1.ຄວາມຮູ້ພື້ນຖານກ່ຽວກັບວຽກງານກວດກາລັດ; 2. ຄວາມຮູ້ພຶ້ນຖານກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງ; 3. ຄວາມຮູ້ພຶ້ນຖານ ກ່ຽວກັບວຽກງານການຕິດຕາມກວດກາໂຄງການລົງທຶນຂອງລັດ ເລີ່ມແຕ່ຫົວທີ່; 4. ການແກ້ໄຂຜົນການກວດກາ ແລະ ການຕິດຕາມກວດກາການຈັດຕັ້ງປະຕິບັດຜົນການກວດກາ.
ກອງປະຊຸມຝຶກອົບຮົມໃຊ້ເວລາ 3 ວັນ ດໍາເນີນໄປດ້ວຍບັນຍາກາດທີ່ຝົດຝຶ້ນ, ສ້າງສັນ ແລະ ນັກວິທະຍາກອນ ມີຄວາມເປັນເຈົ້າການສູງ ເພື່ອຖ່າຍຖອດຄວາມຮູ້ໃຫ້ແກ່ນັກສໍາມະນາກອນ ທີ່ເຂົ້າຮ່ວມກອງປະຊຸມ, ພ້ອມນັ້ນ ກໍຍັງໄດ້ມີການສົນທະນາແລກປ່ຽນຄໍາຄິດ-ຄໍາເຫັນໃນແຕ່ລະຫົວຂໍ້ທີ່ນຳມາສະເໜີ ເຊິ່ງມີ 41 ເທື່ອທ່ານ ປະກອບຄໍາຄິດເຫັນ ເຮັດໃຫ້ມີເນື້ອໃນເລີກເຊິ່ງ ແລະ ສາມາດນຳໄປໝູນໃຊ້ເຂົ້າໃນວຽກງານຕົວຈິງໃຫ້ເກີດດອກອອກຜົນ ເຮັດໃຫ້ແຜນການຈັດຝຶກອົບຮົມ ໄດ້ຮັບຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້.
ໃນຕອນທ້າຍກອງປະຊຸມ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ກໍ່ໄດ້ເຂົ້າຮ່ວມຊຸດຝຶກອົບຮົມ ແລະກ່າວປິດຊຸດຝຶກອົບຮົມ, ໂດຍທ່ານໄດ້ກ່າວຍ້ອງຍໍຊົມເຊີຍ ຄວາມເປັນເຈົ້າການສູງຂອງ ນັກວິທະຍາກອນ ເພື່ອຖ່າຍຖອດຄວາມຮູ້ໃຫ້ແກ່ນັກສໍາມະນາກອນ ທີ່ເຂົ້າຮ່ວມການຝຶກອົບຮົມຄັ້ງນີ້ ແລະ ໄດ້ຮຽກຮ້ອງໃຫ້ບັນດາທ່ານ ຈົ່ງສືບຕໍ່ນໍາເອົາເນື້ອໃນຈິດໃຈ ກໍ່ຄືບົດຮຽນ ດັ່ງກ່າວ ໄປຈັດຕັ້ງປະຕິບັດເຂົ້າໃນໜ້າທີ່ວຽກງານຕົວຈິງຂອງບັນດາທ່ານ ໃຫ້ມີຄຸນນະພາບສູງ ໂດຍສະເພາະແມ່ນການຕິດຕາມກວດກາ ແລະ ຊຸກຍູ້ສົ່ງເສີມ ການປະຕິບັດໜ້າທີ່ວຽກງານຂອງອົງການບໍລິຫານລັດ ຂັ້ນແຂວງ, ຂັ້ນເມືອງ ໃຫ້ເຄື່ອນໄຫວຖືກຕ້ອງສອດຄ່ອງຕາມກົດໝາຍ, ລະບຽບການ, ມີຄວາມໂປ່ງໃສ ແລະ ເຂັ້ມແຂງຂຶ້ນ, ໃນຖານະເປັນຕົວແທນແຫ່ງສິດ ແລະ ຜົນປະໂຫຍຍດ ຂອງປະຊາຊົນບັນດາເຜົ່າ ໃນເຂດເລືອກຕັ້ງ 14 ເມືອງ 01 ນະຄອນ ຈົ່ງຍົກສູງຄວາມຮັບຜິດຊອບ ຕາມພາລະບົດບາດ, ສິດ ແລະ ໜ້າທີ່ຂອງຕົນ ໂດຍໃຫ້ມີການຄົ້ນຄວ້າສ້າງແຜນເຄື່ອນໄຫວຕິດຕາມກວດກາ, ເກັບກໍາຂໍ້ມູນ ຢ່າງລະອຽດ ໂດຍສະເພາະບັນດາວຽກງານຕ່າງໆ ທີ່ມະຕິກອງປະຊຸມສະໄໝສາມັນຂອງສະພາປະຊາຊົນແຂວງ ໄດ້ພິຈາລະນາຮັບຮອງເອົາໃນຜ່ານມາ ເພື່ອນໍາມາຄົ້ນຄວ້າວິໄຈ ແລະ ຊຸກຍູ້ອົງການບໍລິຫານໃນຂັ້ນແຂວງ ແລະ ຂັ້ນເມືອງ ຊອກຫາວິທີ່ແກ້ໄຂ, ເອົາໃຈໃສ່ສືບຕໍ່ຕິດຕາມກວດກາ ບັນດາໂຄງການລົງທຶນຂອງລັດທີ່ຈັດຕັ້ງປະຕິບັດໃນໄລຍະຜ່ານມາ ທີ່ບໍ່ສອດຄ່ອງຕາມກົດໝາຍ ວ່າດ້ວຍ ການລົງທຶນຂອງລັດ ເພື່ອຊຸກຍູ້ໃຫ້ເຂົ້າສູລະບຽບກົດໝາຍເທື່ອລະກ້າວ.
ກອງປະຊຸມຝຶກອົບຮົມໃນຄັ້ງນີ້ ໄດ້ຮັບການສະໜັບສະໜູນໂດຍ: ມູນນິທິເອເຊຍ ( The Asia Foudation )