(ສພຊ) – ກອງປະຊຸມເຝິກອົບຮົມສ້າງຂີດຄວາມສາມາດໃຫ້ແກ່ການກະກຽມຈັດກອງປະຊຸມສະມາຊິກລັດຖະສະພາເພດຍິງໄອປາ ຫຼື ໄວປາ (WAIPA) ໃຫ້ແກ່ຄະນະຮັບຜິດຊອບເນື້ອໃນ ແລະ ກອງເລຂາຊ່ວຍວຽກ ໄດ້ຈັດຂຶ້ນໃນວັນທີ 28-30 ກັນຍາ 2024 ທີ່ແຂວງວຽງຈັນ ໂດຍການເປັນປະ ທານຂອງທ່ານ ນາງ ທຸມມາລີ ວົງພະຈັນ ປະທານກໍາມາທິການຍຸຕິທຳ, ປະທານຄະນະສະມາຊິກສະ ພາແຫ່ງຊາດເພດຍິງ, ປະທານໄວປາ; ມີບັນດາທ່ານຮອງປະທານກໍາມາທິການສະພາແຫ່ງຊາດ, ບັນດາທ່ານໃນຄະນະສະມາຊິກສະພາແຫ່ງຊາດເພດຍິງ, ທ່ານ ນາງ ຫງວຽນ ເຕື່ອງ ວັນ (NGUYỄN Tường Vân) ອະດີດເລຂາທິການໃຫຍ່ໄອປາ, ຮອງປະທານຄະນະອຳນວຍການສູນລັດຖະສະພາອາຊີ (PCAsia), ກອງເລຂາໄອປາ, ຜູ້ຕາງໜ້າຈາກອະນຸກຳມະການເນື້ອໃນຕ່າງໆ, ຄະນະຮັບຜິດ ຊອບກອງປະຊຸມໄວປາ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ໃນຄຳເຫັນກ່າວເປີດ, ທ່ານ ນາງ ທຸມມາລີ ວົງພະຈັນ ໄດ້ເນັ້ນໜັກເຖິງຈຸດປະສົງຂອງກອງປະ ຊຸມເພື່ອຍົກສູງຂີດຄວາມສາມາດໃນການເປັນເຈົ້າພາບ ກໍຄືການກະກຽມຄວາມພ້ອມຮອບດ້ານ ເພື່ອຮັບປະກັນການເປັນປະທານກອງປະຊຸມ, ການກະກຽມເນື້ອໃນຕ່າງໆເຊັ່ນ: ບົດກ່າວເປີດ, ການແນະນໍາຕົວຄະນະຜູ້ແທນ, ຮ່າງ ແລະ ການຜ່ານມະຕິ ຕະຫຼອດຮອດວຽກງານບໍລິຫານ, ພິທີການ, ການສື່ ສານ ແລະ ດ້ານພະລາທິການຕ່າງໆ ໃຫ້ແກ່ການຈັດກອງປະຊຸມໃນຄັ້ງນີ້.
ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ໃຫ້ກຽດມີຄໍາເຫັນໂອ້ລົມຕໍ່ກອງປະຊຸມ ເຊິ່ງໄດ້ເນັ້ນໜັກເຖິງຄວາມສຳຄັນຂອງການເຝິກອົບຮົມຄັ້ງນີ້ ເປັນໂອກາດດີໃຫ້ແກ່ສະມາຊິກສະພາແຫ່ງຊາດເພດຍິງທີ່ຈະເຂົ້າຮ່ວມກອງປະຊຸມໄວປາ ໄດ້ຮຽນຮູ້ທັກສະຕ່າງໆໃນການເປັນປະທານກອງປະຊຸມ, ທັກສະໃນການກະກຽມເອກະສານ, ການຮ່າງມະຕິ, ການປຶກສາຫາລືບັນ ຫາຕ່າງໆ ເພື່ອກ້າວສູ່ຈຸດໝາຍທີ່ວາງໄວ້. ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມ ຈົ່ງໄດ້ເພີ່ມທະວີຄວາມຮັບຜິດຊອບໜ້າທີ່ການເມືອງຕໍ່ວຽກງານທີ່ໄດ້ຮັບມອບໝາຍ, ຮັບປະກັນໃນການເປັນປະ ທານ, ການບັນຊາກອງປະຊຸມ, ການພິຈາລະນາບັນດາມະຕິ ແລະ ການປະກອບຄໍາເຫັນໃນກອງປະ ຊຸມ ເພື່ອໃຫ້ສະມາຊິກສະພາແຫ່ງຊາດທີ່ເຂົ້າຮ່ວມກອງປະຊຸມ ມີຄວາມພ້ອມ, ຄວາມໝັ້ນໃຈໃນການຮັບໃຊ້ກອງປະຊຸມໃຫ້ມີຜົນສຳເລັດເປັນຢ່າງດີ.
ໃນການເຝິກອົບຮົມ ຕະຫຼອດໄລຍະ 3 ວັນ ຜູ້ເຂົ້າຮ່ວມໄດ້ຮຽນຮູ້ຄວາມຮູ້ພື້ນຖານກ່ຽວກັບໄວປາ ທີ່ສະເໜີໂດຍທ່ານ ນາງ ຫງວຽນ ເຕື່ອງ ວັນ ກ່ຽວກັບຂໍ້ລິເລີ່ມ ແລະ ຂະບວນການສ້າງຕັ້ງກອງປະຊຸມສະມາຊິກລັດຖະສະພາຂອງສະມັດຊາລັດຖະສະພາລະຫວ່າງຊາດອາຊຽນ (ໄວປາ), ຫຼັກການຈັດກອງປະຊຸມ, ເນື້ອໃນກອງປະຊຸມໄວປາ; ແລກປ່ຽນບົດຮຽນ ແລະ ທັກສະທີ່ຈຳເປັນໃນການຈັດກອງປະຊຸມ ແລະ ການກະກຽມເນື້ອໃນ; ການສົນທະນາ, ປ້ອງກັນ ແລະ ຮັບຮອງຮ່າງມະຕິ; ທັກສະ ການສື່ສານທີ່ຈຳເປັນ; ໄດ້ມີການແລກປ່ຽນຂໍ້ມູນ ແລະ ຖອດຖອນບົດຮຽນກ່ຽວກັບການຈັດກອງປະ ຊຸມເວທີຜູ້ນຳທາງການເມືອງຂອງເພດຍິງ (WAIPA Women’s Political Leader’s Forum) ແລະ ລາຍງານຄວາມພ້ອມໃນການກະກຽມກອງປະຊຸມດັ່ງກ່າວ; ແລກປ່ຽນປະສົບການຂອງອິນໂດເນເຊຍ ໃນການຈັດກອງປະຊຸມໄວປາປີ 2023 (ໄອປາ-44): ບົດຮຽນ, ສິ່ງທ້າທາຍ ແລະ ຄຳແນະນຳຕ່າງໆ.
(ນາງ ກຸກກິກ ບຸດດາໄຊ)