(ສພຊ) – ເນື່ອງໃນໂອກາດທີ່ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໄອປາຄັ້ງທີ 45, ພວມຂຸ້ນຂ້ຽວສ້າງຫໍມູນເຊື້ອປະຫວັດສາດຂອງສະພາແຫ່ງຊາດ ແລະ ພວມຮີບໂຮມເອົາບັນດາວັດຖຸພັນທີ່ສຳຄັນ ເພື່ອມາປະກອບໃສ່ຫ້ອງມູນເຊື້ອໃຫ້ມີຄວາມຄົບຖ້ວນສົມບູນ ທັງເປັນການເກັບຮັກສາວັດຖຸພັນທີ່ມີຄຸນຄ່າມາໄວ້ຫ້ອງມູນ ເຊື້ອ ເຊິ່ງຈະເປັນບ່ອນທີ່ພະນັກງານ-ລັດຖະກອນ, ປະຊາຊົນ, ນ້ອງນັກຮຽນ ສາມາດເຂົ້າຊົມ ແລະ ຮຽນຮູ້ປະ ຫວັດສາດຂອງສະພາແຫ່ງຊາດລາວ ທີ່ມີອາຍຸໃກ້ຈະຮອດ 50 ປີ ໃນປີ 2025; ຕອນບ່າຍວັນທີ 26 ກັນຍາຜ່ານມາ, ທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ ໄດ້ຕາງໜ້າຮັບບັນດາວັດຖຸພັນທີ່ກ່ຽວຂ້ອງເຖິງ ການເຕີບໃຫຍ່ຂະຫຍາຍຕົວຂອງສະພາແຫ່ງຊາດ ຕາງໜ້າມອບໂດຍກົມບໍ”ິຫານ-ພິທີການ ເຊິ່ງປະກອບມີບັນດາເຄື່ອງເງິນເຊັ່ນ: ພາຖາດ, ຂັນ, ອູບ, ຈອງ, ບ່ວງ, ສ້ອມ, ມີດ, ອັນຄີບນ້ຳກ້ອນ ແລະ ອູບໃສ່ຢາສູບກາຊ້າງ 3 ຫົວ, ງ້າວຂອງເຈົ້າຊີວິດ, ພາຖາດທອງ ແລະ ອື່ນໆ.

ທ່ານ ນາງ ອຳໄພວອນ ລ້ອມບຸນແພງ ໄດ້ຮຽກຮ້ອງໃຫ້ບັນດາທ່ານຫາກມີວັດຖຸ ຫຼື ອຸປະກອນຕ່າງໆທີ່ ເຫັນວ່າເປັນມູນເຊື້ອປະຫວັດສາດທີ່ກ່ຽວພັນເຖິງສະພາແຫ່ງຊາດແຕ່ລະຊຸດ ກໍສາມາດນຳມາປະກອບສ່ວນເຂົ້າໃນ ຫ້ອງມູນເຊື້ອ ແລະ ປະຫວັດສາດຂອງສະພາແຫ່ງຊາດໄດ້.

(ນາງ ໄຊໂສພາພອນ ມິ່ງມຸງຄຸນ)