(ສພຊ) – ກອງປະຊຸມເຝິກອົບຮົມກ່ຽວກັບການບັນຊາກອງປະຊຸມ, ການພິຈາລະນາຮັບຮອງຮ່າງມະຕິ ແລະ ການປະກອບຄໍາເຫັນໃນກອງປະຊຸມ, ການກະກຽມດ້ານເນື້ອໃນ ແລະ ດ້ານພະລາທິການປິ່ນອ້ອມກອງປະຊຸມ ໃຫ້ແກ່ ຄະນະຮັບຜິດຊອບເນື້ອໃນກອງປະຊຸມຄະນະສະມາຊິກລັດຖະສະພາໜຸ່ມໄອປາ (Young Parliamentarians of AIPA – YPA) ໃນຮູບແບບເຊິ່ງໜ້າ ແລະ ອອນລາຍ ໄດ້ຈັດຂຶ້ນໃນວັນທີ 26-27 ກັນຍານີ້ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງທ່ານ ສັນຍາ ປຣະເສີດ ປະທານກໍາມາທິການການຕ່າງປະເທດ, ຫົວໜ້າອະນຸກຳ ມະການກອງເລຂາໄອປາແຫ່ງຊາດ ເຊິ່ງມີພາກສ່ວນທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ຈຸດປະສົງແມ່ນເພື່ອເຮັດໃຫ້ການປະຕິບັດໜ້າທີ່ຂອງສະມາຊິກສະພາແຫ່ງຊາດໜຸ່ມລາວ ທີ່ຕາງໜ້າຄະນະຜູ້ແທນເຂົ້າຮ່ວມ ແລະ ຮັບໜ້າທີ່ເປັນປະທານກອງປະຊຸມຄະນະສະມາຊິກລັດຖະສະພາໜຸ່ມໄອປາ ໄດ້ເຂົ້າໃຈເລິກເຊິ່ງ ແລະ ປະສົບຜົນສຳເລັດໃນການເປັນປະທານກອງປະຊຸມຂອງ ສປປລາວ; ເພື່ອຮັບປະກັນໃຫ້ແກ່ການກະກຽມຄວາມພ້ອມຮອບດ້ານໃຫ້ແກ່ ສສຊ ໃນການບັນຊາກອງປະຊຸມ, ການບັນທຶກລາຍງານກອງປະຊຸມກັບທີ່ ແລະ ການປະກອບຄຳຄິດຄຳເຫັນ ພ້ອມທັງຊີ້ນຳ-ນຳພາການກະກຽມດ້ານເນື້ອໃນປະກອບໃສ່ບົດຕ່າງໆທີ່ກ່ຽວຂ້ອງໃນການຮັບໃຊ້ກອງປະ ຊຸມ YPA ທີ່ຈະຈັດຂຶ້ນໃນລະຫວ່າງກອງປະຊຸມໃຫຍ່ໄອປາຄັ້ງທີ 45 ທັງເປັນການຍົກສູງຄວາມຮູ້, ຄວາມເຂົ້າໃຈ ແລະ ທັກສະໃນການກະກຽມທາງດ້ານເນື້ອໃນ, ການສື່ສານໃຫ້ແກ່ພະນັກງານ-ວິຊາການກອງເລຂາຊ່ວຍວຽກໃນກອງປະຊຸມ YPA.
ທ່ານ ສັນຍາ ປຣະເສີດ ກ່າວວ່າ: ສະພາແຫ່ງຊາດ ແຫ່ງ ສປປລາວ ໄດ້ຮັບກຽດເປັນປະທານໝູນວຽນຂອງສະ ມັດຊາລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ໃນປີ 2024 ແລະ ຈະເປັນເຈົ້າພາບຈັດກອງປະຊຸມສະ ມັດຊາໃຫຍ່ໄອປາ ຄັ້ງທີ 45 ລະຫວ່າງວັນທີ 17-23 ຕຸລານີ້ ທີ່ນະຄອນຫຼວງວຽງຈັນ; ໃນກອງປະຊຸມສະມັດຊາໃຫຍ່ໄອປາ ຈະມີກອງປະຊຸມສະມາຊິກລັດຖະສະພາໜຸ່ມໄອປາ ຫຼື YPA ເປັນກົນໄກໜຶ່ງທີ່ສຳຄັນເພື່ອເປີດໂອກາດໃຫ້ສະ ມາຊິກລັດຖະສະພາໜຸ່ມພາຍໃນອາຊຽນ ໄດ້ປຶກສາຫາລື ແລະ ຮ່ວມກັນພິຈາລະນາຮັບຮອງເອົາມະຕິທີ່ກ່ຽວຂ້ອງກັບວຽກງານຊາວໜຸ່ມໃນອາຊຽນ. ຄະນະຮັບຜິດຊອບກໍໄດ້ເອົາໃຈໃສ່ກະກຽມຮ່າງມະຕິຂອງສະພາແຫ່ງຊາດລາວ ພາຍໃຕ້ຫົວຂໍ້: ສ້າງຄວາມເຂັ້ມແຂງໃຫ້ແກ່ຊາວໜຸ່ມໃນການສ້າງປະຊາຄົມອາຊຽນທີ່ປອດໄພ, ເຂັ້ມແຂງ ແລະ ກວມລວມ ເຊິ່ງຈະເປັນພື້ນຖານອັນສຳຄັນເພື່ອສົ່ງເສີມໃຫ້ຊາວໜຸ່ມໄດ້ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມອາຊຽນ ໃຫ້ສົມກັບຊາວໜຸ່ມເປັນກຳລັງແຮງທີ່ສຳຄັນໃນການຂັບເຄື່ອນການພັດທະນາ ທັງໃນປັດຈຸບັນ ແລະ ອະນາຄົດ.
ໃນການເຝິກອົບຮົມ, ໄດ້ແລກປ່ຽນຂໍ້ມູນ ແລະ ຖອດຖອນບົດຮຽນກ່ຽວກັບຂໍ້ລິເລີ່ມ ແລະ ຂະບວນການສ້າງ ຕັ້ງກອງປະຊຸມຄະນະສະມາຊິກລັດຖະສະພາໜຸ່ມໄອປາ, ຫຼັກການ, ການຈັດຕັ້ງດໍາເນີນກອງປະຊຸມ ແລະ ບັນດາເນື້ອໃນຈໍາເປັນຕ່າງໆໃນກອງປະຊຸມ YPA ແຕ່ລະໄລຍະ; ການຈັດຕັ້ງກອງປະຊຸມ, ການກະກຽມດ້ານເນື້ອໃນ, ເອກະສານ ແລະ ດ້ານພະລາທິການປິ່ນອ້ອມກອງປະຊຸມ ພ້ອມທັງການຄົ້ນຄວ້າຊອກຂໍ້ມູນປະກອບເຂົ້າໃສ່ເນື້ອໃນບົດຕ່າງໆທີ່ກ່ຽວຂ້ອງ ລວມທັງທັກສະການບັນຊາກອງປະຊຸມ, ການປ້ອງກັນໃນເວລາພິຈາລະນາຮັບຮອງເອົາມະຕິຂອງຄະນະຜູ້ແທນທີ່ເປັນປະທານ ແລະ ຄະນະຜູ້ແທນທີ່ເຂົ້າຮ່ວມ; ທັກສະໃນການສື່ສານ, ການປະສານງານກັບພາກສ່ວນກ່ຽວຂ້ອງ ເພື່ອຮັບໃຊ້ໃນການເປັນເສນາທິການໃຫ້ແກ່ ສສຊ ໃນເວລາເຂົ້າຮ່ວມກອງປະຊຸມ YPA. ພ້ອມກັນນັ້ນ, ກໍໄດ້ແລກ ປ່ຽນບົດຮຽນໃນການກະກຽມ, ຄົ້ນຄວ້າ, ເຕັກນິກ ແລະ ຂັ້ນຕອນການຮ່າງມະຕິ ໃຫ້ຄະນະຜູ້ແທນເຂົ້າຮ່ວມກອງປະ ຊຸມໄອປາ-45; ລາຍງານຮ່າງມະຕິ ແລະ ບົດປະກອບຄໍາເຫັນຂອງຮ່າງມະຕິວ່າດ້ວຍການສ້າງຄວາມເຂັ້ມແຂງໃຫ້ແກ່ຊາວໜຸ່ມໃນການສ້າງປະຊາຄົມອາຊຽນທີ່ປອດໄພ, ເຂັ້ມແຂງ ແລະ ກວມລວມ; ບົດຮຽນ ແລະ ປະສົບການເຂົ້າຮ່ວມກອງປະຊຸມ YPA ຢູ່ປະເທດກໍາປູເຈຍ ແລະ ອິນໂດເນເຊຍ; ກົນໄກການເຮັດວຽກ, ການຈັດແບ່ງງານ (ແບ່ງຄວາມຮັບ ຜິດຊອບ), ກະກຽມການຈັດກອງປະຊຸມ YPA ທີ່ ສປປລາວ ເປັນເຈົ້າພາບປີ 2024 ໃນກອງປະຊຸມໃຫຍ່ AIPA-45 ແລະ ກົນການປະສານງານກັບກອງເລຂາໄອປາ. ນອກຈາກນັ້ນ, ຍັງໄດ້ເຝິກຫັດຈໍາລອງກອງປະຊຸມ YPA ໃນກອງປະຊຸມໃຫຍ່ AIPA-45.
(ນາງ ກຸກກິກ ບຸດດາໄຊ)