ໃນລະຫວ່າງວັນທີ 23-24 ກັນຍາ 2024, ຮອງປະທານສະພາປະຊາຊົນແຂວງ ແລະ ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ໄດ້ລົງເຄື່ອນໄຫວໂຄສະນາເຜີຍແຜ່ ກົດໝາຍ ວ່າດ້ວຍ ສະພາປະຊາຊົນແຂວງ, ກົດໝາຍວ່າດ້ວຍການແກ້ໄຂຄໍາຮ້ອງທຸກ ແລະ ກົດໝາຍ ວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເຊິ່ງນໍາໂດຍທ່ານ ນາງ ພູທອນ ແກ້ວພູວົງ ຮອງປະທານສະພາປະຊາຊົນແຂວງ; ທ່ານ ພັທ ພູມີດາວອນ ອາດສະພັງທອງ ຮອງປະທານຄະນະກໍາມະການຍຸຕິທໍາ ແລະ ປກຊ-ປກສ, ທ່ານ ຂັນທອງ ຄົມທິລາດ ຮອງເລຂາທິການສະພາປະຊາຊົນແຂວງ, ພ້ອມຄະນະ ໄດ້ລົງເຄື່ອນໄຫວເຜີຍແຜ່ກົດໝາຍ ຢູ່ທີ່ ເມືອງອຸທຸມພອນ, ເມືອງອາດສະພອນ ແລະ ເມືອງພີນ; ໂດຍໄດ້ຮັບການຕ້ອນຮັບຈາກບັນດາທ່ານ ເຈົ້າເມືອງ ແລະ ຮອງເຈົ້າເມືອງ,ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ, ບັນດາທ່ານກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານ, ທະຫານ-ຕໍາຫຼວດ ຕະຫຼອດຮອດອໍານາດການປົກຄອງບ້ານ ໃນເທດສະບານເມືອງເຂົ້າຮ່ວມຮັບຟັງຢ່າງພ້ອມພຽງ.

 

               ຈຸດປະສົງຂອງການລົງເຄື່ອນໄຫວໂຄສະນາເຜີຍແຜ່ 03 ກົດໝາຍ ໃນຄັ້ງນີ້ ເພື່ອໃຫ້ບັນດາພະນັກງານການນໍາຂອງເມືອງ, ຂັ້ນບ້ານເຂົ້າໃຈເປັນເອກະພາບໃນລວງດຽວກັນ ກ່ຽວກັບ ກົດໝາຍ ວ່າດ້ວຍ ສະພາປະຊາຊົນຂັ້ນແຂວງ ເຊິ່ງເປັນກົດໝາຍທີ່ທຸກຄົນຕ້ອງໄດ້ຮັບຮູ້ກ່ຽວກັບສິດ ແລະ ໜ້າທີ່ ເປັນຕົ້ນ: 1. ສິດ ແລະ ໜ້າທີ່ ດ້ານນິຕິກຳ, 2. ສິດ ແລະ ໜ້າທີ່ ດ້ານການຕົກລົງບັນຫາສຳຄັນພື້ນຖານ, 3. ສິດ ແລະ ໜ້າທີ່ ດ້ານການຕິດຕາມກວດກາ, ກົດໝາຍວ່າດ້ວຍຄໍາຮ້ອງທຸກ ແມ່ນມີຄວາມໝາຍສຳຄັນ ແລະ ຈຳເປັນ ທີ່ຕິດພັນກັບການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຕົວຈິງໃນປັດຈຸບັນຂອງອົງການປົກຄອງເມືອງ ຕະຫຼອດຮອດກຸ່ມບ້ານ ແລະ ບ້ານ ໂດຍສະເພາະການແນະນໍາໃຫ້ປະຊາຊົນເຂົ້າໃຈຂັ້ນຕອນໃນການປະກອບເອກະສານ ເປັນຕົ້ນ: ຄໍາສະເໜີ, ຄໍາຮ້ອງຟ້ອງ ແລະ ຄໍາຮ້ອງຂໍຄວາມເປັນທໍາ ເຊິ່ງເອກະສານທັງ 3 ຢ່າງນີ້ແມ່ນມີຄວາມໝາຍແຕກຕ່າງກັນ ເຊິ່ງນັກວິທະຍາກອນກໍ່ໄດ້ຈໍາແນກແລະຊີ້ແຈງໃຫ້ຜູ້ເຂົ້າຮ່ວມກອງປະຊຸມຢ່າງລະອຽດ ທີຖ້ວນເພື່ອຍົກລະດັບຄວາມຮູ້, ຄວາມເຂົ້ົາໃຈເຖິງເນື້ອໃນຂອງກົດໝາຍ ໂດຍສະເພາະຜູ້ທີ່ເຄີຍຜ່ານການຮຽນກົດໝາຍມາແລ້ວ ກໍຍິ່ງເປັນການເພີ່ມທະວີຄວາມຮູ້ທາງດ້ານກົດໝາຍໃຫ້ເລິກເຊິ່ງ ແລະ ໜັກແໜ້ນຂຶ້ນຕື່ມ; ຄວາມເປັນເອກະພາບຕໍ່ເນື້ອໃນກົດໝາຍເຫຼົ່ານັ້ນແລ້ວນຳໄປຈັດຕັ້ງປະຕິບັດໃຫ້ເຂົ້າສູ່ຊີວິດຕົວຈິງໃນສັງຄົມໃຫ້ກວ້າງຂວາງ ແລະ ເລິກເຊິ່ງຂື້ນເທື່ອລະກ້າວ ແລະ ກົດໝາຍ ວ່າດ້ວຍ ການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ (ສະປັບປັບປຸງ 2023) ກົດໝາຍສະບັບນີ້ ແມ່ນໄດ້ກໍານົດການເຄື່ອນໄຫວ ເກັບກຳສະພາບ, ຂໍ້ມູນ ແລະ ຕີລາຄາການນໍາໃຊ້ ສິດ ແລະ ປະຕິບັດໜ້າທີ່ ຂອງບັນດາອົງການລັດ ແລະ ບຸກຄະລາກອນ ໃຫ້ຖືກຕ້ອງ, ສອດຄ່ອງກັບ ລັດຖະທຳມະນູນ, ກົດໝາຍ ແລະ ນິຕິກຳໃຕ້ກົດໝາຍ ພ້ອມທັງສະເໜີໃຫ້ອົງການທີ່ກ່ຽວຂ້ອງ ມີວິທີການ ແລະ ມາດຕະການແກ້ໄຂຜົນການຕິດຕາມກວດກາ.

ພາຍຫຼັງທີ່ໄດ້ເຜີຍແຜ່ທັງສອງກົດໝາຍສໍາເລັດແລ້ວປະທານກອງປະຊຸມກໍ່ໄດ້ເປີດໂອກາດໃຫ້ຜູ້ເຂົ້າຮ່ວມກອງປະຊຸມ ສົນທະນາ ແລະ ປ່ຽນຄໍາຄິດຄໍາເຫັນ ໂດຍສະເພາະບັນຫາທີ່ເກີດຂຶ້ນໃນການຈັດຕັ້ງປະຕິບັດລະບຽບກົດໝາຍທີ່ຜ່ານມາຂອງທ້ອງຖິ່ນ, ຕໍ່ຈາກນັ້ນວິທະຍາກອນກໍ່ໄດ້ຊີ້ແຈງຕໍ່ກັບບັນຫາທີ່ຜູ້ເຂົ້າຮ່ວມກອງປະຊຸມສະເໜີ ແລະ ແລກປ່ຽນ, ທ້າຍສຸດປະທານກອງປະຊຸມກໍ່ໄດ້ສະຫຼຸບຕີລາຄາ ແລະ ພ້ອມທັງມີທິດຊີ້ນໍາ ໃນການຈະຕ້ອງໄດ້ສືບຕໍ່ຜັນຂະຫຍາຍຜົນສຳເລັດຂອງກອງປະຊຸມໃນຄັ້ງນີ້ໃຫ້ກວ້າງຂວາງ, ເລິກເຊິ່ງຂື້ນຕື່ມດ້ວຍການສືບຕໍ່ລົງໂຄສະນາເຜີຍແຜ່ບັນດາເນື້ອໃນຈິດໃຈຂອງກົດໝາຍເຫຼົ່ານີ້ເຂົ້າສູ່ລົງເລິກໃນການຈັດຕັ້ງປະຕິບັດວຽກງານຕົວຈິງຕາມຄວາມຮັບຜິດຊອບຂອງແຕ່ລະພາກສ່ວນ.